Woh ager ban sanwar gaye hongey
                                  (Ustaad Qamar Jalalvi)

Woh ager ban sanwar gaye hongey
Dekhne wale mar gaye hongey

Sham-e-wada aur intezaar un ka
Jaane woh kis ke ghar gaye hongey

Tum bhi dekh aao marne wale ko
Ab to sab charahgar gaye hongey

Jab giri hogi bagh par bijli
Ahl-e-gulshan kidher gaye hongey

Neend aayi na hogi raat unhein
Naale kya bay asar gaye hongey

O sar-e-rah-e-muntazir un ke
Woh to kab ke guzer gaye hongey

Tum bhi ahle junoon ko poojte ho
Kya khabar hai kidher gaye hongey

Chandni kam yakayak itnee "Qamar"
Ba'am se woh uter gaye hongey

Next >>