Yeh kya keh sab se bayan dil ki halatein karni
                                                                         (Ahmed Faraz)

Yeh kya keh sab se bayan dil ki halatein karni
"Faraz" tujh ko na aayein muhabatein kerni

Yeh qurb kya hai ke tu samne hai aur hamein
Shumar abhi se judai ki sa'atein karni

Koi khuda ho keh pathar, jise bhi hum chahein
Tamam umr ussi ki ibadatein karni

Sab apney apney qareeney sey muntazir us key
Kisi ko shukr kisi ko shikayatein karni

Hum apne dil se hein majboor aur logon ko
Zara si baat pe barpa qayamatein karni

Milein jab un se to mubham si gufttagu karna
Phir apne aap se soo soo wazahatein karni

Yeh loog kaisey magar dushmani nibhate hein
Humein to raas na aayeen muhabatein karni

Kabhi "Faraz" naye mausamon mein ro dena
Kabhi talash purani rafaqatein karni

Next >>