Kwvtij hmoob       uas hlub tshua
Nej sib sua        los mloog kuv hais
Nej sib cais       los mloog kuv zaj
Kuv yuav tshaj     txog Tswv Yexus
Vajtswv lus        yeej cog muaj tseeb
Txhob txhawj xeeb  thaum hnov kuv hais
Tus tau txais      uantej dua cov
Xub tau hnov       twb yog Maiv Liag
Tim Tswv kiag      tau tshwm los hais
Maiv Liag txais    tau los lus tseeb
Nws thiaj xeeb     peb Tswv Yexus
Tau ib ntus        Yausxej thiaj yuav
Coj los tuav       Yausxej lub neej
Yausxej yeej       tsis kov Maiv Liag
Mus txog kiag      Maiv Liag tus Tub
Muaj neeg xub      ua ntawv tawm tuaj
Leej twg muaj      kwvtij nyob zeb
Mus sau npe        raws nyias tej moos
Muab los txoos     ua ib hais neeg
Nkawv ob leeg      tau sawv kev tsees
Npev-les-hees      yog nkawv qub zos
Ntuj tsaus nyos    nkawv thiaj mus txog
Neeg zej zog       tsis muaj chaw so
Nkawv thiaj kho    chaw hauv nkuaj nyug
Muaj neeg yug      pab yaj nram liaj
Hmo ntsiag txhiaj  tsis muaj dabtsi
Yam qhaim hli      ci zoo ci tshiab
Ci ntsa iab        lawv thiaj vau hlias
Timtswv tias       muaj ib txoj moo
Tau poob nroo      saum Ceebtsheej los
Menyuam mos        yuam qhuav yug poob
Yam noob qoob      twb muab tseb lawm
Yuav los cawm      txhua tus lub neej
Nej txhua leej     cia li khiav mus
Tswv Yexus         twb yug los lawm
Sawvdaws txawm     tso sas los tsev
Thiaj pom kev      rau hauv nkuaj nyug
Pom ib tug         menyuam mos liab
Muab phuam khiab   pw hauv dab zaub
Lawv thiaj paub    yog Tswv Yexus
Mam hais lus       qhia niam thiab txiv
Hnub qub kiv       nruj nrees nruab ntug
Muaj peb tug       tub saib hnub qub
Pem ntuj ub        thiaj taug kev raws
Lawv li ntsaws     lub hnub qub loj
Hnub qub coj       lawm tuaj mus txog
Hauv lub zog       Yes-lus-xas-lees
Lawv tsi nrees     mus nrhiav Hemlauj
"Peb tau nrauj     peb vaj tsev cia
Raws qab ntsia     lub hnub qub tuaj
Hais tias muaj     menyuam vaj yug
Rau rooj ntug      ntiajteb sab no
Koj qhia tso       peb yuav mus pe"
Hemlauj ntse       thiaj ncua sijhawm
Hemlauj txawm      hu kev sab laj
Tej neeg ncaj      raug hu tuaj tas
"Ua li cas         kuv twb tsis paub
Tswv yawm saub     txawm muaj nyuam Vaj
Yug los ncaj       ntiajteb sab no
Nej puas nco       puas yug los tseeb?"
Sawvdaws ceeb      tej uas lawm hnov
Hemlauj rov        kom cov tug txawg
Nrhiav kom kawg    kom tau nyuam Vaj
Kav tsij npaj      los qhia nws thiab
Hnub qub tshiab    thiaj coj lawv mus
Thiaj mus tus      rau Npev-les-heev
Lawv tsis nkees    vim nrhiav tau lawm
Sawvdaws txawm     thau nyiaj los pub
Tus me Tub         uas yog nyuam Vaj
Vajtswv tshaj      dua xov los qhia
Tsis pub cia       lawv rov qub qab
Tsis pub tshab     xo tawm ntawm ncauj
Rau Hemlauj        tus neej siab dub
Tseem tshuav tsub  ntau yam tawm tuaj
Lwm zaug muaj      sijhawm txaus tso
Kuv mam ho         hais rau nej mog lawm.