Vajtswv tsim ntiajteb   tsis tau ntau xyoos
Neeg tsis zoo           thiaj tso Vajtswv
Neeg sib hlwv           txog Vajtswv zaj
Lawv sib npaj           nrhiav poj nrhiav sev
Lawm siab ntev          qhuas lawm tej ntxhais
Neeg tuaj hais          thiaj yuav rau nrauv
Lawm tej vauv           tsis paub Vajtswv
Lawv tseem xwv          ntsaw luag tej ntxhais
Lawv thiaj hais         coj los ua nyab
Lawv ua dab             ntau heev zuj zus
Vajtswv lus             thiaj hais li no
Neeg twb tso            thiab ncaim kuv lawm
Neeg tsis sawm	        yuav txojkev zoo
Kuv lub moo	        yuav ncaim lawm mus
Kuv Txojlus 	        yuav nrog los ncig
Kuv Ntsujplig	        tsis cav noog neeg
Neeg txhua leej	        ib puas nees nkaum
Kev tuag caum	        yuav caum los coj
Nus-es koj 	        thiab koj tsev neeg
Yuav tau lee	        thiab txua nkoj loj
Tag nrho koj        	thiab koj ib yig
Txhob siab lig	        nej yuav tau uas
Nus-es txua	        puas nees nkaum xyoo
Thiaj li zoo	        txaus tsiaj nruab nrag
Khiav los nkag	        Nus-es lub nkoj
Nus-es coj	        niam tub txiv nyuag
Tej kwv luag	        noj tshoob hauv kos
Lawv tsis nco	        txog txojkev tuag
Lawm tseem luag	        thiab hais lus twm
Nus-es vwm	        thiaj ua li no
Vajtswv tso	        dej nag los poob
Tej noj tshoob	        sib tw khiav tuaj
Tej suab quaj 	        nrov loj nrov ncha
Dej twb nqa	        Nus-es nkoj sawv
Tag nro lawm	        thiaj tau kev tuag
Dej nyab puag	        qab ntug puv tuaj
Neeg tsis muaj	        leejtwg yuav dim
Kaum tsib tshim	        saum tej roob siab
Tag me liab 	        me cuam tuag tag
Tej nees zag         	kuj tuag tus noob
Tej noob qoob	        nws qauj nws mus
Muab xaus lus	        ib xyoos txwm nkaus
Dej mam lau	        los ti ntiajteb
Nus-es qheb	        qhov rooj tawm los
Av tseem nkos           tsuas yog nram tiaj
Tag tej tsiaj           kuj tawm los mus
Tsis hais lus           nyiam tawm nyias tiag
Nus-es kiag             thiaj tua yaj los
Rauv taws ntsos         thiab muab yaj hlawv
Nus-es sawv             nrog Vajtwv tham
Vajtswv mam             cog lus dua tshiab
Kuv lub siab            hlub nej noob neej
Nej txhua leej          kom mloog kuv hais
Tom qab cais            hluav taws yuav kub
Nej tu tub              tus ntxhais hlob cais
Nco ntsoov hais         txog kuv zaj mog lawm.