|
1 Mo ghaol, mo ghràdh is m'eudail Thu! M'ionntas ùr is m'èibhneas Thu! Mo mhacan àlainn, ceutach Thu! Chan fhiù mi fhéin a bhith ad dhàil. Sèist A-le-lùia. A-le-lùia. A-le-lùia. A-le-lùia. 2 Ge mór an t-adhbhar cliù dhomh e, 'S mór an t-adhbhar cùraim e, 'S mór an t-adhbhar ùmhlachd e - Rìgh nan Dùl bhith am làimh. 3 Ged as leanabh dìblidh Thu, Cinnteach 's Rìgh nan Rìghrean Thu; 'S Tu'n t-òighre dligheach, fìrinneach Air rìoghachd Dhè nan gràs. 4 Ged as Rìgh na Glòrach Thu, Dhiùlt iad an taigh-òsda dhut, Ach chualas ainglean sòlasach Toirt glòir don Tì as àird'. 5 Bu mhór sòlas agus iongnadh Buachaillean bochda nan caorach 'N uair chual' iad na h-ainglean ag glaodhaich, "Thàinig Slànaighear chun an t-saogh'il." 6 B'e sin an ceòl 's an naidheachd àghmhor Sheinn na h-ainglean anns na h-àrdaibh, Ag innse gun d'rugadh slàn'ghear Am Bethlehèm am baile Dhaibhidh. 7 B'e sin sgeula binn nam beannachd Mun aoigh rinn teàrnadh gu talamh; Chan iongnadh mi bhith mùirneach, geanail Is gile na ghrian mo leanabh. 8 Dh'fhoillsich reulta dha na Rìghrean, Lean iad i mar iùil gu dìleas; Fhuair iad ann am achlais fhìn Thu, Is rinn iad ùmhlachd dhut gu làr. 9 Thairg iad òr dhut, mirr is tùis; Thug iad adhradh dhut is cliù - B'e turas an àigh don triùir Thàinig a shealltainn mo rùin. 10 On a dh'innis aingeal Dè dhuinn Gu robh'n fhoill an cridhe Hèroid, Dh'fhalbh sinne leat don Eiphit, Ga sheachnadh mun dèante beud ort. 11 O Hèroid a' chridhe chruaidh, Cha choisinn d'innleachd dhut buaidh - 'S lìonmhor màthair dh'fhàg thu truagh Gu dian an tòir air bàs mo luaidh. 12 'S fhada, 's fhada bho Iudea Tèarainte bho d'chlaidheamh geur E. Measg nam mac cha d'fhuair thu fhéin E. 'S fallain, slàn Thu, 's fàth dhomh èibhneas. 13 Dh'aindeoin do mhì-rùin is d'fharmaid, Bidh mo Mhac-sa cliùteach, ainmeil, Cha chuir E ùidh an òr no 'n airgead - A rìoghachd cha rìoghachd thalmhaidh. 14 Gur galach, brònach, tùrsach iad An dràsd' ann an Ierusalem, A' caoidh nam macan ùra sin - 'S b'e 'n diùbhail 'n cur gu bàs. |
15 Tha Ràchel an-diugh fo bhròn A' caoidh a pàisdean àlainn, òg; 'S frasach air a gruaidh na deòir Bho nach eil iad aice beò. 16 Tha mi 'g altram Rìgh na mòrachd! 'S mise màthair Dhè na Glòrach! Nach buidhe, nach sona dhòmhsa! Tha mo chridhe làn de shòlas! 17 Thàinig, thàinig am Messiah: Fhuair na fàidhean uile 'n guidhe; 'S fhada bhon b'àill leo Thu ghighinn - 'S àlainn Thu air mo ruighe. 18 A ghnothach gu talamh cha b'fhaoin e - Cheannach sàbhaladh chloinn-daoine: 'S E am Fear-rèite 's am Fear-saoraidh, Is E;n Slàn'ghear gràdhach, caomh E. 19 Ciamar a dh'éirich dhòmhsa Measg an t-sluaigh a bhith cho sònraicht'? 'S e toil is cumhachd Rìgh na Glòrach Mac bhith agam ged as òigh mi. 20 Is mise fhuair an ulaidh phrìseil, Uiseil, uasal, luachmhor, fhìnealt': 'N-diugh cha dual domh bhith fo mhì-ghean Is coltach ri bruadar an fhìrinn. 21 Cha thuig ainglean naomh' no daoine Gu là deireannach an t-saoghail Meud do thròcair is do ghaoil-sa Tighinn a ghabhail colainn daonnda. 22 Bheir mi miladh, bheir mi adhradh, Bheir mi cliù dhut, bheir mi gaol dhut; Tha thu agam air mo ghaoirdean - 'S mi tha sona thar chloinn-daoine. 23 Mo ghaol an t-sùil a sheallas tlàth! Mo ghaol an chridhe tha lìont' le gràdh! Ged as leanabh Thu gun chàil, Is lìonmhor buaidh tha ort a' fàs. 24 M'ulaidh, m'aighear is mo luaidh Thu! Rùn is gaol is gràdh an t-sluaigh Thu! 'S Tus' an Tì a bheir dhaibh fuasgladh Bho chuibhreach an nàmhaid uaibhrich. 25 'S Tu Rìgh nan Rìgh, 's Tu Naomh nan Naomh; Dia am Mac Thu, 's sìorraidh d'aois; 'S Tu mo Dhia 's mo leanabh caomh; 'S Tu Ard-cheann-feadhna chinne-daonnd'. 26 'S Tusa grian gheal an dòchais Chuireas dorchadas air fògairt; Bheir Thu clann-daoin' bho staid bhrònaich Gu naomhachd, soilleireachd is eòlas. 27 Thigeadh na slòigh a chur ort fàilte, Dhèanamh ùmhlachd dhut mar Shlàn'ghear. Bidh sòlas mór am measg sìol Adhaimh - Thàinig am Fear-saoraidh, thàinig. 28 Thig, a pheacaich, na biodh sgàth ort; Gheibh na dh'iarras tu de ghràsan: Ged bhiodh do chiontan dearg mar sgàrlaid, Bidh d'anam geal mar shneachd' nan àrd-bheann. 29 Hosàna do Mhac Dhaibhidh, Mo Rìgh, mo Thighearna 's mo Shlàn'ghear! 'S mór mo shòlas vbhith 'gad thàladh - 'S beannaichte am measg nam mnà mi |
This page hosted by
Get your own Free Home Page