| Iuj diris al LoLoZam, ke ili pensas, ke liaj pensoj eble estas interesaj por aliaj homoj. LoLoZam simple esperas, ke iuj respondoj pensigos vin kaj ke aliaj respondoj ridigos vin. Tamen, liaj pensoj estas nur liaj pensoj. Chiuj aliaj havu siajn proprajn pensojn. Kiam LoLoZam esprimas opinion, li pensas, ke tio estas tauga opinio au... bona sherco. Tamen, aliaj havu siajn opiniojn kaj... faru siajn shercojn. Kiam LoLoZam donas konsilon, li pensas, ke tio estas tauga konsilo... au bona sherco. Do neniam sekvu la konsilon de LoLoZam, escepte, se ankau vi mem pensas, ke ghi estas bona konsilo. LoLoZam mem respondecas pri siaj agoj en la vivo. Tio jam estas sufiche peza tasko. Li tute ne povas respondeci pri la agoj de aliaj. Chiam do pripensu, antau ol vi faras demandon kaj post ricevo de respondo, ke pri viaj opinioj kaj pri viaj agoj respondecas sole vi mem! [Demandoj kaj respondoj nur en Esperanto. - Se LoLoZam pensas, ke demando estas tro persona au specifa, li ne respondos, au gheneraligos ghin.] |
LiLiZum demandis:
Kion signifas "Some words from one of our sponsors ...", kaj kial vi chiam sendas tiun fenestron en malfacila, malinternacia lingvo sur mian ekranon?
Karega LiLiZum,
LoLoZam tre ghojas, ke skribas al li forfora similnomito!
LoLoZam pensas, post interkonsiligho kun iuj TTT-majstroj, ke LiLiZum estas viktimo de sia modemo (ne la modulilo, sed mod-em/o!).
Se LiLiZum uzus malpli lastmodan TTT-vagilon, ne elsaltus tiu reklamo (per kiu GeoCities enspezas por povi disponigi senpagajn paghojn,
se ghi ne disponigas senpagajn paghojn por povi enspezi per reklamoj...).
(La lingvo uzata estas unu el la oficialaj lingvoj en la shtato Kalifornio, kie trovighas GeoCities, sur kies mashinoj stokighas chi tiuj paghoj.
Temas do pri unu ties nacia lingvo. Kaj kiu volus malpermesi al iu, uzi sian nacian lingvon por voki ion en dezerto? Chu iu auskultas, tiu mem decidas.)
Lau tiuj TTT-majstroj, LiLiZum simple forshaltu tiun modernajhon nomatan "Java", kiu ebligas tiajn ghenajhojn.
Tiuj TTT-majstroj pensas, ke entute estus saghe, forshalti tiun "Java", char ja ne estas prudente, lasi aliulojn seninvite manipuli vian aparataron.
La TTT-majstroj pensas, ke troveblas solvo kun malpli "elsalta" reklamo, kaj serchos tian.
Eble ili trovos.
Ghis tiam, uzantoj de malpli laumodaj paghumiloj (kiuj tute ne scias, pri kio LiLiZum zumas...) havas klaran avantaghon.
P.S.: Pro la lauvole ignorebla paghofina reklam-bloko, "elsalta" reklam- fenestro devus ne plu aperi.
Francois demandis (denove):
[...], sed kie LoLoZam loghas?
Kara Francois,
LoLoZam pensas, ke la homoj en diversaj partoj de la mondo estas esence samaj; ke ili do havas pli da pensoj komunaj ol malkomunaj. Kvankam kompreneble la respondoj de LoLoZam estas bazitaj ankau je spertoj specifaj lau lia chirkauajho, tio, lau LoLoZam, estas tute ne esenca.
Chu vere devus esti diferenco en la respondoj (krom se temas pri iuj tehhnikajhoj), lau la naskigh- au logh-loko? Chu vere la demandanto devas scii, chu LoLoZam loghas en meza au orienta Azio au en suda au norda Ameriko? Au eble en tre norda Europo? LoLoZam pensas, ke scio pri tio povus ech vuali la menson de la leganto, tiel, ke tiu ne pripensas la enhavon de la respondo, sed (kredeble falsan) imagon pri la signifeco de tiu enhavo, bazitan je antaujughoj pri la logh-regiono de LoLoZam. Io simila povus validi, se LoLoZam konus precize la fonon de la demandinto.
Do tial LoLoZam ne mencios klare, kie li loghas. Kaj ne postulas tian indikon de la demandantoj.
Andre demandis:
Chu mi povas gratuli vin pro via interesa rubriko?
Kara Andre,
Vi jhus pruvis, ke vi povas. Tamen lau LoLoZam estas iom tro frue por akcepti gratulon.
LoLoZam bonvenigos veran demandon de Andre.
aboco demandis:
kioma horo estas?
Kara aboco,
LoLoZam kompatas abocon, char tiu havas nek horloghon, nek proksimulon, al kiu fari tiun demandon.
Bedaurinde, LoLoZam ne povas helpi al aboco, char ghuste tiu chi estas tia demando "tro specifa", al kiu LoLoZam ne volas respondi.
Kaj "gheneraligi" ("inter 00 kaj 24") ne helpus...
LoLoZam ankau ne povas enmeti programeton en chi tiun paghon, kiu mencius al aboco, kioma
horo estos en la momento, kiam aperos tiu chi respondo al aboco, lau la aparato, per kiu ghi aperos, se tiu aparato povus plenumi tian programeton.
Tamen, se aboco disponas pri inteligenta TTT-rigardilo (au ech stulta Windows), aboco povus aranghi tiel, ke dekstre au maldekstre malsupre
au supre sur la ekrano aperos la horo, almenau la horo lau la mashino...
Se aboco havas klasikan DOS-mashinon, aboco sentime tajpu "time" por ekscii la mashino-horon.
Al LoLoZam shajnas, ke la pli praktika, respektive plezura, solvo por aboco estus, acheti horloghon, au ekkoni (ne necese Biblie) proksimulon (de sekso preferata au de alia sekso (ol tiu preferata)) kun horlogho, char, almenau che LoLoZam, ofte okazas, ke la mashino indikas tute alian horon ol tiu, kiu validas en la chirkaua mondo.
LoLoZam iom miras, ke aboco scivolas pri la horo dum legado de la pagho de LoLoZam! Aliaj skribis al LoLoZam, ke, legante liajn respondojn, ili ne atentis la horon, kaj pro tio ghi farighis tro malfrua...
Pawlo demandis:
Kial la respondoj de LoLoZam estas triapersonaj?
Kara Pawlo,
LoLoZam tuj kaj plene agnoskas, ke liaj respondoj fontas el la sagho de multaj "triaj" (au "kvaraj"...) personoj.
Vivantaj kaj mortintaj.
Sed LoLoZam supozas, ke Pawlo parolas pri gramatiko.
La klarigo pri la gramatika "tria persono" estas simpla: LoLoZam neniam lernis tajpadon.
Kvankam LoLoZam legas la demandojn, la respondojn li donas bushe - kaj mi au alia pli juna parenco, kiu ja kapablas tajpi, tajpe redonas ilin.
Por ke estu klare, kiu donas la respondojn, LoLoZam pensas, ke gramatika "tria persono" tre taugas.
Tatjana demandis:
Chu LoLoZam iam vizitis Esperanto-kongreson?
Kara Tatjana,
Nek vizitis, nek partoprenis. Ech ne organizis...
Peter demandis:
Aspektas, ke chiuj, kiuj demandas al LoLoZam, tre bone regas la lingvon. En aliaj lokoj en la Reto (ekzemple en s.c.e.), la meza lingva kvalito de la kontribuajhoj estas tute alia. Chu LoLoZam (au iu alia) redaktas ankau la demandojn?
Kara Peter,
Redaktas: jes. Ech vian demandon (kvankam ne enestis eraro)...
LoLoZam opinias, ke ne havas sencon, lasi lingvajn erarojn en la demandoj,
char tiuj deturnus la atenton for de la - ofte ja serioze traktinda - enhavo.
Foje, tamen, LoLoZam preferas lasi malgrandan eraron, se tio povas pli plezurigi la respondon.
Ghenerale, LoLoZam pensas, ke la enhavo de Reto-paghoj kaj -komunikajhoj estas pli grava, ol plena lingva ghusteco. Kompreneble estus bone, se chiuj tekstoj en la Reto estus en bona lingvajho. Sed, se iu havas ion interesan (au gravan) por diri en la Reto, shi au li diru, ech se enestas lingvaj eraroj. Ju pli da interesaj paghoj en komprenebla Esperanto en la Reto, des pli bone! Eble tiuj, kiuj vidas lingvajn erarojn en iu Reto-pagho, amike sugestu plibonigon al ghia autoro.
Hiro demandis:
Responde al Riita, LoLoZam diris multon pri homoj, kiuj volas fini sian vivon. Kion LoLoZam pensas pri la efiko de tia decido al aliaj homoj?
Kara Hiro,
LoLoZam scias kaj konscias, ke tia decido estas tre ofte konsterna kaj tre malghojiga por proksimuloj.
Sed LoLoZam scias ankau, ke ne malofte proksimuloj tamen tre bone komprenas tian decidon.
Kaj aliaj, kvankam ili ghin tute ne povas kompreni, respektas ghin, kun doloro en koro.
Chiuj tiuj bezonas la aman apogon de amikoj kaj najbaroj, kiel ajn konsterna kaj nekomprenebla estas la okazajho ankau por tiuj.
Tamen ne nur al proksimuloj efikas tia decido.
LoLoZam audis interalie pri veturigantoj de vagonaroj, kiuj nekuraceble malsanighis, char iu saltis antau la lokomotivon.
LoLoZam esperas, ke iu, kiu volas fini sian vivon, elektos manieron, kiu ne fushas la vivon de aliaj homoj.
Aliflanke, LoLoZam pensas, ke ekzistas homoj, kiuj tiel fushas la vivon al iu, ke tiu pro tio povus decidi, fini sian vivon.
Tiel ne estu. Se ni chiuj bone, zorgeme kaj respekte traktas aliajn, almenau nia sinteno ne estos kauzo por tia decido.
Frank B. demandis:
Chu Usono estas la morala gvidanto de la mondo?
Kara Frank B.,
LoLoZam neniam audis, ke shtato (regno) kiel tia havus moralon.
Certe ne chiujn elpashojn kaj intervenojn de Usono au nome de ghi oni povas karakterizi "morale bonaj",
do honestaj, justaj, decaj kaj virtaj.
LoLoZam pensas, ke tio validas vershajne pri chiuj shtatoj.
Individuaj regantoj de shtato povas konduti bone, honeste, juste, dece kaj virte.
Sed estas klare, ke ne chiuj regantoj de shtato kondutas same bone, honeste, juste, dece kaj virte.
Ankau ne en Usono.
Ankau ne chiuj loghantoj de Usono chiam agas bone, honeste, juste, dece kaj virte.
En tio ili vershajne tre similas al aliaj homoj en la mondo.
(LoLoZam pensas, ke ekzemple ankau tiuj en Usono, kiuj kritikas siajn regantojn pro "nemorala" konduto, ofte mem nehoneste kaj nejuste kondutas...)
Do je kiu bazo Usono (au alia shtato) povus esti morala gvidanto de la mondo? Ech la morala gvidanto?
Kvazau ghi, ghiaj regantoj kaj ghiaj loghantoj estus senmakulaj?
El interparoloj kun diversnaciaj vizitantoj, LoLoZam ricevis la impreson, ke ekzistas multaj homoj en la mondo, kiuj pensas, ke ilia shtato,
iliaj regantoj au iliaj samlandanoj (ech se pri chiuj tiuj ili krome tute ne estas kontentaj)
ghenerale kondutas pli "morale bone", ol ghenerale faras Usono, ghiaj regantoj kaj pluraj el ghiaj loghantoj.
Almenau lau la ekzemploj, kiujn ili audis, legis kaj vidis.
LoLoZam pensas, ke estas ne eble, diri, ke iu popolo au homgrupo havas "pli altan moralon" ol iu alia.
Chiu provu mem esti honesta kaj justa kaj konduti dece kaj bone. Nur tiel la "ghenerala morala nivelo" plialtighas.
LoLoZam pensas, ke proklami sin "morala gvidanto" estas fakte maldeca ago.
Klachemulo demandis:
LoLoZam fumemas, sed chu li ankau trinkemas?
Kara Klachemulo,
LoLoZam pensas, ke sen trinkado oni rapide ghismorte sekighas.
Tamen, LoLoZam supozas, ke Klachemulo pensas pri tiu trinkado, kiun la Antauuloj nomis "drinkado". Nu, foje LoLoZam ne malshatas iujn fermentintajn sukojn. Chu nomi tion tiel? Sed LoLoZam foje vidis ebriulojn, kaj li ne shatus mem aspekti kaj konduti tiel.
LoLoZam pensas, ech, ke tro-uzo de alkoholo estas en multaj lokoj la plej granda fonto de krimoj, kaj ke do ebriuloj devus esti izolitaj ghis malebriigho, en remburita loko, por ke ili ne krimu kaj ne dolorigu aliajn au sin mem.
/Paris/Rue/6429 demandis:
Mi kuriozighas pri via lando. [...] Chu plachis al vi ero de l' enhavo de mia hejm-pagho? [...]
Kara 6429,
Jes ja. LoLoZam pensas, ke alilandanoj (almenau, kiam ili vizitas lian regionon) ofte estas sufiche kuriozaj. Sed shajnas, ke ankau lia lando vekas scivolon au miron che nekonantoj. Eble char la vivo tie fluas malpli rapide ol aliloke, kaj char malmulto raportinda per alilandaj televidostacioj okazadas (certe malpli ol en Parizo, se Parizo estas tia, kia ghin priskribas oni), kaj char pro tio, homoj tie havas tempon kaj trankvilon por pensi. Ekzemple antau ol oni faras demandon.
Por ke LoLoZam rigardu al hejmpagho necesas longa vojagho.
Do restas al li nur resti scivola pri la hejmpagho de 6429.
LoLoZam pensas, ke aliaj ghin trovos kaj recenzos la poemojn kaj kanto-tradukojn en ghi...
Sed LoLoZam dankas al 6429 pro la invito.
Joao demandis:
Kiel eblas, ke LoLoZam havas paghadreson a-vip.com/lolozam/, dum la paghoj trovighas en www.geocities.com/Athens/5685/?
Kara Joao,
Iuj aferoj en la Reto funkcias bele. Al LoLoZam tre plachas, ke GeoCities disponigas senkostajn paghojn (kvankam foje iu reklamo surprizos vin), sed li pensas, ke ghiaj adresoj estas iom longaj kaj nepersonaj. (LoLoZam tamen vidis adresojn multe pli longajn kaj multe pli komplikajn...) LoLoZam preferis, ke lia pagho havu (ankau) simplan, facile memoreblan adreson. Se Joao volas scii, kiel tio funkcias, Joao iru al a-vip.com au al iname.com au al come.to (="venu.al" - interesa por anglalingvanoj!... Chu iu disponigos similajn transsendo-adresojn: venu.al/... au hejmo.de/... au jen.ni/... au trovu.ie/...?)
Riita demandis:
Kion LoLoZam pensas pri la rajto fini sian vivon?
Kara Riita,
LoLoZam pensas, ke almenau teorie tio estas tre malfacila demando.
LoLoZam pensas, ke homoj ne decidas pri la komenco de sia vivo, do chu homoj decidu pri la fino de sia vivo estas malfacila demando.
Tamen LoLoZam pensas, ke tio estas malfacila demando chefe por aliaj homoj, ol tiuj, kiuj volas havi la rajton decidi.
En pli fruaj tempoj okazis (sed ankau nun okazas), ke homoj foriris de sia hejmo "por pripensi la vivon", "por pripensi la mondon", au simple "por iom pripensi".
La avo de LoLoZam rakontis, ke en lia tempo, tio estis tre kutima afero por junuloj kaj por aghuloj.
Chiuj tion respektis. Neniu postkuris, se ne temis pri infano nekapabla defendi sin kontrau sovaghaj bestoj kaj simile.
Ofte tiuj homoj revenis post tri tagoj, au post nova luno, au ech post jaroj.
Sed foje ne. Foje iu trovis ilin post iom da tempo, mortintajn.
Tiam la parencoj kaj konatoj diris: "Li pripensis sian vivon, kaj opiniis ghin plenumita." Au: "Shi pripensis la mondon, kaj opiniis ghin ne plue esplorinda."
Au simile. Kaj funebris.
Kiam homoj estis tro malsanaj au malfortaj por foriri "por pripensi", okazis, ke ili subite mortis. Kiam LoLoZam estis malgranda, lia patro au patrino diris al li: "Tiu onklo tenis sian spiron." Poste LoLoZam audis, ke ankau okazis, ke iu malsanulo petis pri pli mola kuseno. LoLoZam pensas, ke ne chiuj facile povas chesigi sian spiradon se oni ne havas molan kusenon.
Nuntempe la homoj ofte ne estas hejme, kiam ili estas grave malsanaj.
Kaj LoLoZam havas la impreson, ke en malsanulejo oni molajn kusenojn ne shatas.
La doktoroj -medicinistoj povas kuraci certajn malsanojn, tiel ke la vivo por la malsanulo poste estas denove tute bona vivo.
Sed doktoroj -medicinistoj ankau multajn malsanojn ne povas kuraci.
Kion doktoroj tre bone kapablas nuntempe, estas zorgi, ke malsanulo pro iuj malsanoj ne tiel rapide mortos, kiel antaue.
LoLoZam pensas, ke tio estas tre bona, se pro tio la korpo havas pli da tempo por mem kuraci sin;
sed tre malbona, se pro tio la malsanulo nur pli longe suferas.
En la tempo, kiam medicinistoj ne studis en lernejo, sed en la vivo, ili konsciis, ke por multaj malsanoj ne ekzistas rimedoj por resanigho.
La avo de LoLoZam rakontis, ke en lia tempo la medicinistoj, kiam ne eblis resanigho, chiam estis inklinaj, paroli kun la malsanulo, au, se tiu ne plu kapablis, kun la parencoj kaj proksimuloj, pri medikamentoj por "la fina kuracado".
(Tiu esprimo lau LoLoZam estas tre bela kaj trafa.)
LoLoZam pensas, ke ankau la nuntempaj doktoroj -medicinistoj devus konscii, ke iujn malsanojn kuracas nur morto. Kaj ke plilongigo de suferado ne estas tasko de medicinisto. Krome, LoLoZam pensas, ke foje povas esti bone, foriri por kelkaj tagoj por pripensi ion, sed... ke post pripensado (kaj ankau: post priparolado kun aliaj, eble tute fremdaj, por havi pli kompletan bazon por la pripensado) oni, se iel eble, prefere revenu por fari ion belan el la vivo!
Ina demandis:
Chu tiuj rulajhoj apud la kolo de LoLoZam estas harplektajhoj?
Kara Ina,
Tio estas ceremoniaj harligajhoj (foje de iuj, tute senrespekte, nomataj ''kolbasoj'').
Harplektajhojn - prefere tre longajn - havas junulinoj.
LoLoZam dankas al Ina pro la interesigho pri tiuj liaj haroj.
Votero demandis:
Chu estas vivo post morto?
Kara Votero,
Najbaro de LoLoZam diris, ke post morto lau li estas au nenio, au io bona - char lau lia scio, ghis nun neniu kolere revenis...
LoLoZam pensas, ke se estus iu vivo ie post morto, ni, vivantoj, nenion povus scii pri tio, char de post morto oni ne revenas por rakonti. Tamen lau LoLoZam ja ekzistas alispeca vivo post morto. Multaj homoj ja pluvivas en niaj pensoj. Amataj au ech malamataj. Sed plie: Ni chiuj ekkonis homojn, kiuj vivis antau centoj au ech miloj da jaroj. Ni konas rakontojn pri iliaj agoj, sed ni konas ankau eldirojn iliajn, kiuj ankorau nun prezentas al ni saghon, plezuron au instruon, kvazau ili tion dirus al ni persone. Se homo nin daure igas, plurcent jarojn post sia morto, lerni, pensi au - chefe - ridi, LoLoZam pensas, ke tiu homo vivas post morto. Chu ankau LoLoZam tiel postvivos? Au Votero?
Helena skribis:
Reage al via respondo al Guenter:
Estus bone, anstatau la malnovajn "Shlosilojn" enmeti en la Reton la pli ghisdatan "Bazan Radikaron" kun nacilingvaj tradukoj kaj klarigoj. Oni ne bezonas "Malshlosilon", char per komputilo oni povas serchi ankau la nacilingvajn vortojn.
Kara Helena,
Al LoLoZam plachas tiu ideo. Li nur iom timas, ke malhelpas la fakto, ke "Baza Radikaro" estas pli ampleksa ol "Shlosilo". Eble por iuj tio estus ghena afero. Krome, LoLoZam pensas, ke de "Shlosilo" jam ekzistas tre multaj lingvo-versioj, kiujn oni bezonas nur elektronikigi, sed ke de "Baza Radikaro" ekzistas nur tre malmultaj pretaj versioj kun nacilingva traduko. Do LoLoZam pensas, ke estus saghe, kaj jam nun enmeti chiujn ekzistantajn "Shlosilojn" kaj iom post iom prepari multajn lingvo-versiojn de la "Baza Radikaro".
Duglas Adams demandis:
Pri la vivo, la Universo kaj chio cetera...
Kara Duglas Adams,
Nu, certe, sed krome...
