Los entamos de la Pergrande Ufierta son siempres iguales. Hai que preparar madera abondo pa cuatru fogueres que miren a los cuatru corneyales de la tierra. Fogueres que cellebren el camín del Sol y de la Mar.

Darréu d’ello, hai que mecer el pelleyu de culás esfuragáu, y la povisa del centén roxu, a partes iguales, y algamar el ferviatu a fuéu sele. Ferviatu que s’amestará con igual midida de sidre vieyo fermentao en madera de carbayu espinu. Esta sidre ye de fuerte gráu alcólicu, neto que’l hidromiel fermentáu, anque ye bébora más noble qu’esti pol tiempu que tarda en maurecer. Aedrics, pa la sosiega, suel tirar de la zapica na que cuida esti llicor de los dioses.

Tamién hai que preparar, pa quemar nes fogueres, los biltos secos de texu, los mariellos yerbatos, ente ellos la cirigüeya y la povisa de fongos saprófitos que namái xorrecen en tueru de carbayu muertu. Mécese esto cola burraya seco y fino d’arfueyu y xardón.

Los dos máxicos habíen de refacer los adebuxos xeométricos del sable, que fixeren la nuechi anterior, col gabitu del bixu de madera del texu sagráu de l’aldega d’Ar-Bas, estiella sagrada que namái puen coyer, y tener, los máxicos y los ellexíos, y bruñir les cigües que reblicocarán los añosos pechos de los máxicos de la balse.

Tamién el tinte de cochinela hai que lo preparar, meciendo la magaya inseutos n’untu templao de xabalín. Asina, faise’l tinte roxu que val, amás de pal ritu d’invocanza, pal ringorrangu de les teles de llinu blanco.

— Bono Wanics, agora a ver si yes tu el que fais la comunicanza colos dioses. Asina pué que nun seya tan pelligroso pa min facer un nuevu viaxe. Pero sedrán ellos los que dicidan. Que’l gran Aernu m’oya.

— Qu’elli lo quiera. Apostielló Wanics.

La nuechi vinía neto que la precedente. El Peñal de la Utre, mayestáticu, espeyaba la ñeve blanco baxo la feble rellugada llunar.

Bona nuechi pa falar de nuevu, colos dioses de la viesca

Tomaron aliendu los collacios, dientru la cueva careso enantes d’entamar el llabor.

Aedrics pensatible, miró l’horizón recortáu pel cumal prósimu. Y calumbó l’enfotu badanu de la lluna llunera. Badanu enfotu que nun diba ser francer, col so pálidu rellugu, la trupa ñubada que dende había unos díes encobertaba dafechu los cielos de los llagos. Sacantes la rayada llunar que s’arrevelaba faza’l naciente, y que diba morrer enantes ñacer, la más prieta de les nueches alguardaba a los máxicos d’Aucs-Ewam.

Y ya yera tiempu d’entamar el llabor.

Siempres que se va facer una invocanza, convién facer del silenciu, l’amigu meyor. Porque nun ye cosa de gratuitu camín, usar de les fuerces de la Natura pa xubir la costana de los dioses. El silenciu acueye meyor al espíritu propiu, y al ayenu, y fai el meyor cumplíu de respetu polo impescanciable de la divinidá.

Y en silenciu, Aedrics fexo los preliminares.

Tamién ye’l silenciu la midida del respetu y el camientu interior. Trai esconsolancia al alma buiciega, y esclaria los güeyos interiores que tolo ven ensín los ver. Que non ye dable, nin pacetible camentalo, falar coles divinidaes ensín nidia conocencia d’ello.

Aedrics, encegoláu, asitió la maera seco nuevo, so la burraya muerto de les fornielles de la cabera nuechi. Apinó, darréu, los caciplos cola bébora de culás, y entamó entafarrase’l focicu col roxu bermeyu y el carbonizu que davezu s’emplega na invocanza de la Pergrande Ufierta. Reblicoques y cigües a manu. Los máxicos colgaxos, prestos.

Sicasí, Wanics, que ye más mozu, tien la gayola de los años curtios que baxen la costana de la vida. Conoz que nun ye la primer vegada que va tentar falar colos dioses. Conoz qué facer porque-y lo dixeron los sos mayestros, y elli, comu ellos, ya lo fexo. Y comu elli, otros enantes d’elli lo fexeron. Y asina, pa dietrás y dietrás de la solombra que trai l’alcordanza propia, y la alcordanza de los alcordorios de los Welenos.

D’esta vuelta nun va salir Wanics ensín el gozosu intre, pol que tantu s’esmolecen los mancebos nuevos. L’enfotu qu’elli hai tiempu nun siente, y que renaz delantre cada nueva invocanza. L’enfotu de ver la cara de los dioses de la viesca d’Aucs-Ewam. Cara que bramente naide nun conoz, nin naide sedrá a conocer, sigún repiten los cancios de los máxicos dende les dómines del Alcordoriu Primeru.

Pero ya nun se trata namái ver les cares, o tentar facelo. Ya ye otra cosa. Ye más el retu de sentise valir entavía pa intentalo. Un máxicu tamién tien los sos finxos. Tien les sos llendes. Y fondigaños, tamién. Y comu home, tamién trai d’aniciu’l pecáu de la sobeya. Servidume primera, que tou mortal arrecostina.

— Ya ye’l tiempu, collaciu. — Dixo Wanics.

— Si. Ya anochemos enforma. Ya valió, Aernu espera.

Trabayosamente, col aquel que dan los munchos años, y la poca lluz, baxaron la costanina que diba dende la puerta la cueva al sablón que, de cote a la mesma, amosaba los curiosos adebuxos iniciáticos que fexeren la nuechi anterior. Aquel ensame güezcos minerales, espirales y deves que train a la Tierra de los mortales un migayu del orde inatalantable que flui pel cosmu Gwell.

N’aportando al llugar, Wanics dexose cayer de xinoyos, dandu un sopliatu de galdez. Aedrics siguiolu, pero con más tientu. A la so edá, nun ye comeniente facer munchos esparabanes cola güesada.

Dexó Wanics el conxuntu preseos que llevaben: cazos y zapiques colos sicotrópicos y allucinóxenos naturales. La corexa cola povisa máxica. La fardela coles fueyes bones de la viesca.

Ordenolos na sabla.

Colocolos a manu.

Y nel orde xustu.

Y de nuevu en pie, Wanics foi prender les fogueres col calicor encesu que tamién traía, de la fogarata la cueva. Pa ello, apurrió paya seco al ascuara, y foi ciflando, foguera tres foguera, les brases que se formaben pel contautu ente la paya seco y el calicor. A cada golpe d’aire, pequeños candellinos semeyaben fuxir gayasperos dende la boca de Wanics.

— Collaciu, toi galdíu... y afogáu... — Dixo Wanics tomando fuelle dende la foguera que miraba’l setentrión. Ellí la mar. Ellí la cabera llende.

— Si. Parez que ya nun tamos pa estes coses... — Rió Aedrics.

La maera entamó facer un bon fuéu, non ensín enllenar primeru de fumu tou l’ámbetu. La homedancia yera abonda, y na cueva non había maera seco abondo pa fornar dafechu, de talu comburente, les cuatru fogarates. Pero’l fumu blanco arumaba l’aire col arrecendor a castañu verde, a maera de carbayu fresco, a fueya verde y viva. Wanics punxo povisa de lloréu so les cadolles más grandes de les fogueres, pa espurrir nel tiempu l’efeutu del arume prestosu del so fumu.

Y tornó Wanics al lláu d’Aedrics, pa siguir faciendo los caberos preparativos. Enantes de coyer el trance divín, había de vistise l’alma del máxicu, tamién, colos cancios afayaizos y amañosos. El cuerpu ye una cueva más na que s’abellugar del mundu hostil, pero tamién el camín pa conocer l’alma mesma y los dioses de la viesca.

— ¿Entamamos? — Entrugó Wanics.

Aedrics asintió. ¿Pa qué les pallabres que tolo tracamundien, cuandu’l camientu ye tan claru?

Y los dos homes, sentaos de xaoyos, un de cote al otru, col espaldar piqueru, los güeyos pesllaos, el cazu escontra’l pechu y les manes xuníes en cuencu sol banduyu propiu, empicipiaron el canciu de la invocanza primera.

— Grande Aernu, folixeru rescamplante....

Ente cada invocanza, d’unos diez minutinos, chumaben del llicor de la mazana maurecío, y bebíen del ferviatu roxu del centenu y del culás.

L’arume de fumu de lloréu y texu yera prestosu.

Tres de cada invocanza, canciaben a lo baxo, faciendo grande bocín, calteniendo l’aire nos papos asina entullíos, y asitiando’l llugar de vibranza del canciu, xusto pelantre’l gallarín⁽⁾. Asina, el soníu grave facía vibrar los güesos de la tiesta cuando xuníen la punta de la llingua col cielu del paladar, y zarraben la dentame sobre sí mesma.

Perdíase la noción del tiempu.

Ganábase l’estáu d’invocanza.

Comu yera d’esperar, Aedrics non foi quien a siguir cola llabor. La xatá qu’arrecostinaba dende la nuechi anterior, nun-y dexó concentrase na invocanza. Sintíase aldebalu, perdíu ente solombres ensín forma que de sotrucu apaicíen de cote, de lláu, d’enriba o d’embaxu... Toes veníen dende dalgún llugar situáu ente les sos propies sobreceyes. O asina-y paicía.

Tevo de dexar la invocanza. Tornó a alendar, primeru fuerte, pa esconsoñar y ganar puxu, y magar lo fexo, seliquino, pa calmentar el propiu coral⁽⁾, que-y cutía lloqueru en pechu.

D’otra miente, el so collaciu Wanics siguió. Tocaría-y a el cudiar del so amigu, qu’entamaba a tremar y a mover los güeyos pesllaos embaxu los finos párpagos qu’amosaben una piel de nenu. Y falaba y falucaba ensín xacíu.

Non hebio muncho de facer Aedrics, sinón garrar a Wanics dacuandu, sigún paicía que diba cayer o esboligase, y aguyar l’oyíu, pa coyer nota y rellación de tolo que salía pela boca del máxicu. Porque yera entos cuandu podía unu conocer.

Si. Conocer. 

La nuechi foi enfriando más y más. Aedrics, al non tar nel trance, nin tener l’abellugu del alcol de sidre, sintía ariciase-y la pelleya pol airiquín fríu. Engorropelló al so collaciu col sayón propiu, pa evitar que coyere fríu, y elli chose un gañipu enriba, dica embozase peles oreyes.

¿De qué taría falando Wanics colos dioses?

Yera cosa finar d’una vegada cola invocanza. Pasu ente pasu, los díes caíen de les calendes Kelt, y la xente de los pueblos d’Ar xuru que taríen sofriendo l’andancia⁽⁾ de los "En-Sin-Nome".

Aedrics nunca nun sintió medrana. Nunca, sinón yera agora. Porque’l pelligru yera rial y non d’esti mundiu.

Mui rial.

Tan rial comu aquella nuechi prieta. Nuechi de llobu afamiáu. Nuechi de velea.

Un gran respingu, mezclienda de fríu y de rocea, xubió-y a Aedrics per el carrastiellu, hasta la base la tiesta. Y ellí españó-y l’espelurciu nun xabaz bastigazu que malpenes foi dominar apertando los brazos escontra los propios costazos.

Hai fríos que non son humanos. Aquel, yera unu d’ellos.

Y ensín l’axuda de los dioses de la viesca, ¿comu salvar el mundu de la viesca?