Mentantu Yerguer y el vieyu Wulics Arguer cuidaben del cuerpu casi ensín vida, de Fexim Cann, pidió Aedrics al soldáu que taba a los piés de la cama, y que yera’l mesmu que lu traxo a aquel sitiu, que lu llevare a la presencia del cabudarmes Wironics Alla.

Comu bridem, bien sabía Aedrics que tinía de facer la ufierta de la cabezalería de Dob-Ar enantes de que saliere ‘l sol dos vegaes, ente presentes. O una lluna, ente ausentes. Tando comu taben, abellugaos nuna cueva, non diba ser difícil cumplir la misión.

Dempués de recorda-yos a los testigos, que yeren depositarios y conocedores de la voluntá de Fexim, marchó col soldáu a la gueta del cabudarmes.

Tornar de nuevu al ámbetu bien allumáu de la covayona, foi un respiru. Nunca nun tuvo cómodu dientru d’aquel abellugaderu. Nun sabía porqué, pero daqué na xente qu’había dientru producía-y cierta incomodanza y esmolecimientu.

Siguiendo al soldáu, resalvó delles estancies grandes, ganaes a la roca vivo, anque les mayores yeren productu del agua y el tiempu. Al fin, aportaron a un llugar onde taben los homes d’armes. El llugar taba bien siñaláu, y ensín dubia, ello yera comeniente.

El soldáu entrugó pola persona de Wironics, y dellos siñalaron a un requexu na parede. Y pellí fueron, pa atopar un llugar ensín comodanza dalguna y un catre ensín dixebra dala colos del restu de los que ya vieren fuera, ocupáu por un home d’aspeutu normal, vistiu al usu de los guerreros Kelt en campaña.

En cuantes que vió ésti a los homes, púnxose de pies. Presentáronse y coles reverencies debíes por tou común al cualuquier máxicu, Aedrics llevaba’l torque de la dewa bien visible, máxicu oxetu que lleven tolos druides, quedaren solos, máxicu y cabudarmes.

Aedrics cuntó-y la so misión. El cabezaleru morribundu nomábalu’l so sucesor na cabezalería de Dob-Ar. Y tinía que dicir al máxicu, comu bridem que yera, si aceptaba aquel nomamientu pa facelo saber al Conseyu de Grandes de les Castres. Si aceptaba, tomaría-y xuramentu ellí mesmu.

Wironics fincó abondo sorprendíu. Sentose na cama, pero a vueltes d’unos intres, aceptó’l nomamientu.

Pidió-y Aedrics que llamare a dos homes para que fixeran preba del xuramentu, y non tardaron en llegar los homes requeríos.

Delantre de los dos homes, y Wironics, Aedrics recitó les caberes pallabres de Fexim Cann y tamién lo fixo colos primeros salmos del Feneyu Sucesoriu:

Wironics amosose animáu abondo, y contentu col nomamientu. Dalgunos de los perpocos collacios d’armes que s’enteraren, felicitáronlu lluéu con grande folixa y foguiza.

Más non había tiempu enforma pa perder. Había de comunicase al Conseyu de los Grandes de les Castres, que’l nomáu aceptare’l nomamientu que fexere Fexim, y polo tanto, que ya habría nuevu cabezaleru en cuantes que’l malfadiáu Fexim entamare’l so viaxe al Wallol.

Había de dexase la foguiza pa otru momentín.

Asina que tornando sobre los sos pasos, Aedrics, comu home d’altu rangu, elli primeru, siguíu al delláu por Wironics, los dos testigos de la xura y el soldáu que lu traxere fasta aquella parte de la covayona, empobináronse faza’l cuartucu onde taba’l Conseyu y el cabezaleru morribundu.

Y ya calumbraben aquel llugar, cuando de sópitu toparon a Wanics. Parólos ésti, y entrugó a Aedrics que d’onde vinía con aquella cafarnaya, y que de pasu, desplicara-y peronde anduviere dende que lu llevare aquel soldáu.

Aedrics cuntó-y depriesa lo qu’asocediere dende entóncenes, y propunxo-y que lu acompangara’l llugar nel que taba Fexim dando les boquiaes.

Wanics mirolu un pelín ablucáu.

— ¿Tas xuru de lo que dicis, amigu?.

— ¿Por…? —entrugó Aedrics.

— ¿Qué ye, que nun conoces que ya hai nuevu cabezaleru en Dob-Ar? Acabo enterame que Fexim ya morrió y que nomó cabezaleru al so hermanu Lokan Mann. Andes mal de nuncies, nin.

— ¿Cómu ye, hom? —dixo Aedrics ente asuráu y perplexu. Y camudó la so cara de suyu serena con un biecu de sorpresa que foi tresformándose en coraxe calteníu.

— Si home, si. ¿Nun ves la garandaya contento, hom?.

N’efeutu, la tropiella xente que se vía pelos alrodios, cellebraba daqué.

Xuru que la xubida al tronu de Dob-Ar d’un nuevu cabezaleru que siguiría cola engarradiella que teníen cola borrina prieta. Y víase tamién cómu dellos soldaos, con cascu de cueru prietu y salles de cueru del mesmu color, desquiñonaben n’abondo, ente homes y muyeres, lo que paicia midre.

Aedrics díxose pa sí mesmu, en voz alto, que cómu yera posible aquello cuandu’l cabezaleru qu’elli dexare taba más muertu que vivu.

Resueltu a desfacer aquel entuertu, mandó Aedrics a la xente que lu esperaren, que diba dir pa dientru del cuartu rexu del Conseyu, pa esclariar la tema. Pero Wanics nun quinxo quedase ellí, ensín facer un res. Esmorullábalu la coruxía.

Abriéronse pasu los collacios con trabayu, ente aquel ensame de xente gayolero, y cuandu ya aportaren a la entrada, un soldáu vistíu comu los que viere enantes, viendo que viníen con cuenta d’aportar al llugar y que llevaben la dewa o ensiña de la nobleza de la druidada, torgó-yos el pasu diciendo-yos respetuosu:

— Nun podeis cutir adientru. Ta’l Conseyu aconceyáu, y Vos nun sois parte d’elli.

Y nun emprimare a fervé-y el sangre a Aedrics, cuandu darréu d’estu asomó pela portiella un risonderu Yerguer, que dixo al xixilante:

— Dexa cutir a los máxicos, soldáu. El gran Aedrics, y compaña, son invitaos d’honor del cabezaleru Lokan.

Asina que pasaren los dos collacios la puerte bien allendada y xixilada, ye la prudencia virtú tributaria de la llercia, y ésta yelo de la desconocencia de lo ayeno, o de la conocencia de les febleces propies, y nun tardó abondo n’oyese la lóxica entruga d’Aedrics a un Yerguer sorrisador y combayante:

— ¿Podéis esclariame qué ye lo que foi na mió ausencia?.

Wanics barbuxó-y ente dientes a Aedrics daqué asina comu qu’andare con tientu y prudencia, que nun yera tiempu de facese notar.

Anque la pregunta del máxicu tinía un claru tresfondu de barraza y noxu, Yerguer oyía al druida con cara esplandiente y escampiñada, comu nun queriendo entrar en fondures inconvenientes. Asina que contestó, politu y modosín:

— Vamos, vamos, mayestru Aedrics. Aposentáivos y aselái. Na vuesa ausencia nada raru foi, sinón que’l cabezaleru Fexim, qu’en Wallol tea, esconsoñó de la incosciencia, y anque esbardialaba un migayu pol so grave amalamientu, arrecaldó lo que dixere primero de nomar sucesor al tal Wironics, y xulgó meyor istituir na cabezalería al so bon hermanu Lokan Mann. Y ye que la fuercia del propio sangre ye grande, comu persabeis.

Aedrics mirabalu avisíu y becéu. Nun creyía un res de lo que-y dicía. Pero Yerguer siguía y siguía chipletiando y estolexando col enfotu del artista frustráu que tien el so gran díe.

— … y amás, bon mayestru Aedrics, rescamplante bridem de la viesca, comu vos sabéis y bien dicís, el Feneyu Sucesoriu sentencia a esti respective que " voluntá cabera, meyor y mas buena"….¿Non ye asina, mayestru?.

Asintió Aedrics.

— Creyéime —continuó Yerguer— dengún misteriu arrodia’l nomamientu de Lokan Mann. Entrugái al noble Wulics, que tamién taba ente nos.

— Si vos lo dicís, bástame —tragó cuspiu Aedrics y mordiose la llingua pa nun siguir falando. Peslló fuerte les manes fasta enclavase les uñes na palma de la manu. Y amás del dolor, sintió la homedancia del sangre propio.

— Pero pasái, pasái mayestros. Pasái y xunivos al intre gozosu del empicipiu la xubida faza’l Wallol del gran cabezaleru muertu, y el nomamientu de Lokan.

Yerguer basnió, casique a emburriones, a los collacios pa dientru’l cuartu nel qu’había un claru ambiente de lloqueríu y celebranza. Midre y sidre corríen ente la xente que gargoliaba tentando canciar los poemes d’amor y guerra que tantu gusten al pueblu Kelt.

La lluz ya nun yera la de la única candilexa qu’hubiere espetada enriba de la pared na que taba asitiada la noble tiesta del fallecíu Fexim. Agora milenta antorches afogaben y allumaben un ámbetu festeru dafechu. Y el calabre presidía aquella candanga encobertáu pol mantu de la cabezalería y el cascu doráu del xefe de tropa, con tolos ringorangos propios de la so alta condición guerrera.

Pero Fexim Cann ya nun garraba la "Palarus". Aquel símbolu meyor y mayor del xefe del castru, agora taba ausente d’una man desformada pol efeutu de la fuerza que se tevo d’emplegar pa rincá-yla. Inda na muerte, un home Kelt nun suelta fácil les sos armes.

Lokan Mann, el fíu primoxénitu de Behom Mann, dos vegaes escaecíu arrementes⁽⁾ na llinia sucesoria a la cabezalería de Dob-Ar, mandó trunfantemente que la xente callare. Y non ensín trabayu la xente de so foi a facer cumplir esti deseyu, porque nun son les mentes chumáes les meyores y mas freñetibles nel procuru de les aselar.

Mentantu facíen los suyos el traxín de llendar a tanta noble oveya alcolizada en midre , Yerguer dirixose misteriosu a Aedrics, que calláu, vía toos estos fechos comu si toviere nuna velea, nun mal suañu irreal.

— ¿Sabéis, mayestru? Fexim foi un grande, y curtiu, tamién percurtiu, cabezaleru en vida, pero nun supo escoyer los sos collacios al tiempu la muerte.

Aedrics quedó pensatible.

Y entamó a falar el nuevu purpuráu de Dob-Ar:

— Oyéime nobles Dob-Ar’uds, xente de les altes castres d’esti pueblu, collacios nesti duelgu. Oyéime bien. Pongo por testigu al noble y sabiu Wulics Arguer, fiel Amudarmes de mio Pá y del mio hermanu; y tamién pongo por testigu al máxicu Yerguer Atta, sucesor na druidada del gran Asurics, que’l mio gran hermanu Fexim Cann, de la castra de los Brehom, qu’al Wallol vaiga, quinxo nomame, y asina lo fixo, el so sucesor na cabezalería de Dob-Ar.

— Daveres vos digo, collacios toos, qu’elli llamome a la cabezaleria pa que lu siguiere nos sos drechos y deberes pa con vos y esti castru, y siguir asina tamién cola llucha que llibere al nuesu pueblu de la borrina prieta. Y ye poro, polo que tomo pa mí y pa la mio castra el poder de la ¡¡¡Palarus...!!!....

Lokan, infláu de sobeya y grandonismu, garró la espada Palarus, enganíu y melgueru. Quinxo llevantala cola dixnidá que se supón tien de poner un guerreru en tala xera.

Garrola, pues, con una manu. Y non seyendo a cumplir comu l’elexíu que-y cumplía ser, baxó de la so primera deidad a les humanes febleces más terrenes, y asina coyola a dos manes. Pero la espada malpenes si xubía a los cielos d’aquel aire cargáu d’ellectricidá y lloqueríu. Malamente el gran Lokan diba dir a cuelmu con aquel ritu, y la so cara yera’l meyor espeyu del fracasu. Porque ésta diba, pasín ente pasu, arroxando baxo’l sangre que se-y amaciñaba, en focicu y papos, comu cumplida culada polo que tendría de ser malpenes una xabatina pa un home d’armes, y que pal sobeyosu cabezaleru yera un esfuerzu llargu, y espurríu, d’impotencia.

Vio el cabezaleru Lokan Mann qu’aquel enchipamientu primeru se-y camudaba en rostru pesarosu y amarguriu de vieyu escagaleráu. Porque esu, y non otra cosa, semeyaba’l cabezaleru tentando xubir coles dos manes, una espada que-y perpasaba del so cinxu lo menos dos palmos, y que malpenes si yera a poner n’horizontal prestanza.

Porque, hai que lo dicir: yera la "Palarus" muncha, y noble espada, pa tan pocu, y fleque, home.

Mas la tropiella del llugar ya taba lloca pa ver estos detalles.

La cafarnaya xente que taba naquel rexu cuartu, nun bien acabó de falar el cabezaleru Lokan, estoupó, cual españíu, nuna sola aclamación, que restallaba ente aquelles paredes añoses y prietes de carbayu mugosu, amosando asina’l puntu de llocura que trai de suyu la xente en llobada.

Porque garraron les espades, y golpeando la so fueya plana escontra los hachos que llevaben, y cuantu víen que yera amañoso pa facer roídu, al empar que golpeaben el suelu de madera colos pies, glayaben al altu la lleva’l solu nome del nuevu cabezaleru:

— ¡Lokan! ¡Lokan! ¡Lokan!.

Y esto duró lo que tardó la xente en decatase que-y escosaba el midre en boca.

Aedrics y Wanics, ayenos a aquel xaréu, miraben maraviellaos aquellos intres, hestóricos ensín dulda dala, pa Dob-Ar.

Y cuandu emborniaba aquella clamida y clangoríu, de nuevu fixo Lokan esparabanes pa que la xente callare un migayu. Y anque non del tou, fue quien a siguir diciendo:

— Prepararemos la festecona que merez la muerte del héroe, el bon cabezaleru Fexim, y amburarémoslu dempués de prepará-y un tronu dixnu d’un dios, y asina qu’entame ensín duelgu d’esti mundu’l so camín al Wallol. Mirai ver qué muyer acompangará al cabezaleru nel viaxe.

De nuevu el xaréu d’aprobación pola folixa futura, foi de llocura.

Y mandó Lokan que llamaren a la Vieya Morriñosa.

En toa aldega Kelt hai una muyer, normalmente vieya poque nun ye sinón la sucesión de les estaciones lo que trai la esperiencia al humanu, que tien a la so caltenencia los vieyos arcanos que traten col llau prietu del Gwell.

Estes muyeres traten d’evitar que los homes provoquen esa corrupia y malina dimensión del Gwell, y a cambeu d’ello, pola etenra griesca de los contrarios, la natura apurre-yos el misteriosu poder d’arrevelación del futuru. Namái que les muyeres formen parte d’esta castra.

La Vieya Morriñosa tien al so serviciu varies moces dotrines, que caltienense vírxenes, tal dicin elles, y xuntes cuiden la ciencia y les estayes que finquen a la muerte de los homes, les ceremonies de llucha y desafíu reglados sigún los vezos de la viesca, y les relaciones de los homes col vinir.

Mentantu los máxicos caltienen la ciencia guaridora, les relaciones colos dioses de la viesca y dicin les lleis que s’espeyen nos feneyos y veceríes; les vieyes morriñoses alministren los rituales de muerte nel pasu al Wallol, sacrifiquen animales pal arrevelamientu del futuru, y executen les penes del cuerpu sobre siervos y esclavos.

Namái que la Vieya Morriñosa, y les sos sirvientes, pueden invocar al llau prietu del Gwell, y servir al innomable dios del poniente, que lleva los muertos al salón del Wallol nun viaxe que dura 13 soles.

Asina qu’aportó la Vieya Morriñosa al pocu de llamala.

Yera una muyer pervieya, con llargu pelu blanco y rala barba del mesmu color, que perdiere había tiempu los atributos propios del so sexu.

Aedrics vio comu-y xuxuriaben daqué y ella sacó trabayosamente d’una alforxa un saquín blancu, y d’elli, lo que semeyaben unes cuentes o piedres blanquiñoses. Tiroles en suelu y fixo esparamientos y esparabanes al empar que salmodiaba unes pallabres guturales d’invocanza.

Wanics, que tien meyor güeyu, avisó al collaciu de qu’aquelles piedruques yeren, o paicíen, güesos d’animalinos.

Darréu de char los güesos en suelu, pidió la vieya que-y apurrieren un gallu, y les sos axudantes apurrieron-y unu que coyíen peles pates. Mandó la vieya que-y garraren la cabeza , y la moza que lo fixo, alguardó una siñal, pa dempués d’ella da-y un tayu al pescuezu del animal y dixebrar asina troncu de tiesta.

El gallu entamó encambriulase al empar que salía-y a fristu el sangre, comu a güelpes, pel pescuezu. La vieya, garrando al ave peles pates, pasó el cuerpu sangrante sobre los güesinos del suelu, salmodiando daqué inatalantable mentantu el sangre espurríase nun orpín encesu.

Dempués que’l gallu dexare de retorcese, y tres de fixase llargamente en cómu y aú el sangre debuxaba manches en suelu, faló la vieya pa dicir:

— Esta lluna. nun vendrá la borrina prieta.

O seya, que polo menos, durante diez díes podríen tar tranquilos en castru.