Los cumales del Cuera semeyaben xigantes xixilantes escontra’l prietu cielu del almanecerín. Ellí víase’l Cumal Güeres, el de Vigueres, y faza’l poniente, el Torbina y Peña Caresa. Munchos díis tendría de caleyar ente fondos cintos⁽⁾ y estrenchos y solombriegos escobios, xubiendo y baxando altísimos montes, cruciando xabaces arroxos y escures florestes, u’l cielu ta tapecíu dafechu pola verde follasquera de milenarios árboles.

Tou ello pa aportar a lo más fondo de la viescona d’Aucs-Ewam. P’allugase xunto los llagos, a u dengún home mortal, sacantes los druides, punxere dala vegá los pies. Y so tou, el misteriosu llagu iniciáticu onde los máxicos pasaben la sabencia a los elexíos polos dioses de la viesca. Un llugar sagráu dende la nuechi los tiempos, llugar bayurosu n’agua puro y bonatible.

Y aquél yera’l tiempu de dir col acólitu, col bon mancebu al que-y pasare les artes físiques de la cura’l cuerpu. Tiempu de la fiesta iniciática del solsticiu d’iviernu. Pero esta vegada, esta estación, tendría d’alguardar tiempos meyores.

Calculaba, cola cencia que podía, que tardaría cincu soles a bon pasu. Siempres xubiendo per pelligroses caleyes, vadiando ríos con fogosos rabiones, arreblagando per fondes simes, y tomando respiru y aliendu nes guapes y esfrecides fontes de les sos amigues les xanes, collacies na maxa bono.

Cuando esapaeció l’aldega dietrás d’él, el sol inda illuminaba los cumales del Torbina. Pero non diba durar porque trupes ñubes ya encobertaben el cielu. Nesi tiempu, el castru d’Ar-Bas esprecetábase cuando Aedrics facía la primer ufierta de "sub-missio" a los dioses de la viesca, avocando pa si mesmu la maxa la natura por aciu de misteriosos cancios en llingua estraño a oyíos mortales.

Y continuó el viaxe.

Dexando el máxicu, a la mandrecha, los cumales ñevaos del Torbina, empobinose pela caleya d’Ar-Ruens. Perpasó l’aldega, y fixo nuechi nos alrodios d’Ar-Aenes.

La viescona d’Aucs-Ewam ye grande, comu lo diz el so nome. Espúrrese faza’l naciente tres llunes a bon pasu, anque dempués d’esclariase, torna facese trupa nes tierres de los Eusc-Ar’ud, quienes camuden-y el nome. Faza’l poniente, nun se conoz el so fin. Cuenten que naide que s’empobinare naquel camín tornare a cuntar lo que perende viere. Ye’l llar máxicu de los dioses. Y en direición al meyudíe, la viesca xube la cordal del Cuera, y sigui espurriéndose y xubiendo per montes altísimos que nun tienen caleyos, pero pelos qu’enforma xente pudo trespasar, cuntando los que tornaren que tres d’ellos la tierra tornase seco y probe en xinta. Naide d’Ar-Bas toviere perende.

Al tercer sol, perpasando les tierres d’Ar-Aenes, aportó al pueblu que llamen Cam-Ar-Mann, siguiendo’l ríu que pellí llamen de C’Ar-Ecs porque la xente de la zona axura que ñaz de la fonte que crió la diosa Ecswa cuando parió al so fíu Ar-Ecs, que toviere del prohibíu y torgáu axuntamiéntu carnal con un mortal llamáu Mann-U.

Entró en pueblu y pasó la nuechi en compaña del so collaciu na maxa y nos arcanos druídicos, Wanics, de la castra de los Welenos. Yera un migayu más mozu qu’el. Cuntó-y el collaciu los estraños fechos qu’asocedieren aquella llunada na viesca. Que taba probe en xinta bono y que della xente mozo nun tornare al pueblu tres dir a la caza. Llevaba cinco soles faciendo maxa, ya invocances, pero los dioses nun paecíen tar pola llabor de char un gabitu.

Aedrics faló-y de lo mesmu. Pero cuntó-y tamién lo que-y dixere había tiempu el so maestru Gaarl, al que-y lo dixere Gundwell, y a ésti el grande Astow, y a ésti el más rescamplante de los máxicos de la viesca de los que se tien conocencia, el pergrande Fatwin. Tous ellos arrecoyeron l’anuncia so la malura que vinía del naciente en forma de pueblu xabaz, de rara castra y bravura en sin igual. Xintaores de carne roxo y caliente, y en sin medrana fasta la muerte. Cuntó-y al so collaciu de les estrañes componedories que fixeron los dioses de la viesca d’Eusc-Ar bramente, los mesmos que los d’Ausc-Ewam había permunches estaciones, y de que s’empobinaba a los llagos iniciáticos, Ar-Zina y Zimeru, pa pidir una igua asemeyada. Porque sinón, los pueblos de la viescona d’Ausc-Ewam diben tener de fuxir faza’l poniente y la ribera. Y eso, si teníen suerte.

Wanics desconocía la sabencia de los alcordorios inmemoriales de la castra de los Swarios, a la que pertenecía Aedrics y los sos druides predecesores. Poro, fincó tan impresionáu col alcordoriu⁽⁾ recitáu por Aedrics, que propunxo-y acompangalu nel viaxe, y axudalu si fuere aquello, nos ritos y ufiertes sagraes nos llagos iniciáticos. Aedrics, agradeció-ylo de veres. Nun camentaba que pudiere ser d’otru mou.

Al almanecerín del dii siguiente, cutieron los dos máxicos camín del Picu Llerosu. Dos soles dempués, aportaron al primer llagu máxicu, el llagu d’Ar-Zina.

Aposentáronse na Cueva de l’Entamu, llugar a u allugaben a los acólitos pa purificase enantes de pasar al Llagu iniciáticu, llamáu Llagu Zimeru, que taba un pocu más enriba, dietrás d’una balsina de lloreos y fayales con abondu arfueyu. Prepararon los preseos pa la invocanza divína. Los dos, ensin abondo que se dicir, fixeron los empicipios de la Pergrande Ufierta esa mesma nuechi. Nun había tiempu pa perder.

Calteniéronse los máxicos tres soles n’ayunes. Namái que bebíen agua purificao del Llagu Zimeru.

Cumplíos esos díes de mortificanza, oración y agradecimientu, al meyudíe entafarráronse tol cuerpu con gordura fresco d’uru añal. Vistieron les cigües de los primeros máxicos, guapes talles n’acebache prieto rescamplante, con símbolos tapecíos pa los mortales non iniciaos na cencia druídica del Gwell, engrampaes ente si con cueru mestu de pexe de sangre caliente, coles calaviyes d’oru.

Darréu d’ello, empobináronse al sablón blanco que se vía nun requexu del Llagu Zimeru, na so oriella que nortia, xustamente al empar d’una buelga que facía una canal bien curiosa, llugar nel que se teníen de facer les abluciones preparatories.

Sacante los glayíos de dalgún ferre, el silenciu yera trupu. Fendíu a vueltes pel xuxuriar del vientu escontra les altes copes del cercanu balse de xardón.

Namái aportar al fino sable, adebuxaron nella, col gabitu d’un bixu de madera del texu sagráu de l’aldega d’Ar-Bas, estiella segrada que namái podríen tener los máxicos y los sos ellexíos, un complexu xueu xeométricu de figures máxiques. Antropomorfos curiosos decoraben un ensame espirales tantu destróxires comu levóxires. Círculos concéntricos y flores imposibles. Númberos máxicos que calteníen la vieya y poderosa cencia del Gwell.

Fixeron cuatru montoninos de lleña fresco y prendiéronlos. Al fuéu, amburaron biltos secos de texu, mariellos yerbatos y povisa de fongos saprófitos del tueru del carbayu muertu, que sacaron de saquinos que portaben al cintu. D’otru saquín, coyeron burraya seco y fino d’arfueyu y xardón.

El fumu entamó xubir seliquino, pasín ente pasu, en güezques, comu imitando les espirales que desurdíen de la sabla magosa.

Pintáronse’l focicu y alrodios. Entiñaron los párpagos. Ceyes y sobreceyes esapaecieron baxu la collor del tinte natural de la Cocinella septempunctata.

Cuando’l sol cayía, xintaron el so primer alimentu en tres díes: una pastia de polvu roxu de centenu encesu, mecíu con quesu vieyu formentáu dafechu nuna proporción esáuta y midida. Farrapes d’escanda y centenu non faltaron.

Prepararon un ferviatu con piel seco de culás. Amestaron a ello, llíquidu destiláu de sidre vieyo qu’aveyentaba en caciplos de madera de carbayu espinosu.

Y sentáronse. Unu de cote al otru. Sigún les normes de ritual Gwell de la bona concencia.

Sentaos, colos costazos orientaos al septentrión y al meyudíe, entamaron a canciar. Casi xuxuriar, na llingua de los máxicos, les oraciones d’agradecimientu y bonaporte.

El soníu gutural d’aquellos gargüelos non yera d’esti mundiu.

Ente canciu y canciu, libaron del ferviatu de culás qu’amburaba-yos el gañote, neto que si tovieren mormiella, produciendo-yos una permolesta gañotera. Al aportar al estómadu aquella mezclienda, provocaba una pasaxera ardentía que darréu siguía a un estáu d’euforia indesplicable.

Y asina, cayó el dii.

Intre tres intre.

Dica la nuechi.....

...y la lluna.

Naquel tiempu entamaba la llunerada. La lluna espurríase coqueta, pasín ente pasu, dempués de fuxir del cielu per un tiempu. Yera’l tiempu en que diba a servir a los dioses de la Tierra profundo, y a renovar la promesa de frañer les tiniebles nocherniegues pa que l’home nunca nun toviere d’escaecer que yera fíu de la lluz.

El fuéu de les fogueres, qu’amburaba amás de la povisa, madera y yerbes fresques, afumaba tol ámbetu, enllenándolu del prestosu arume a madera de faya, de gramínea verde en fuéu, de romeru y taramillu, de menta fresco y yerballuisa, filtrayando los rellumos que pulsiaben baxo les bocaraes de la foguera llampurdiante. Si el fuéu emborniaba, Wanics, el más mozu y por ello l’obligáu a servir, xorrascábalu chando-y más materia.

Cuando la lluna cayía pel Peñal de la Utre, Aedrics aportó al tresbolamientu divín. L’estáu primixeniu que non tolos mortales son a algamar.

Colos güeyos abiertos, comu pozos prietos en sin fondalada, clisaos nel infinitu, más pellá de lo qu’un mortal quinxera tar, entamó un sele xuxuriar que foi in crescendo. Los dioses de la viesca aportaben a la so boca.

Aedrics yera tolos dioses. Tolos dioses taben n’ Aedrics.

Wanics xixilaba. El, por ser el más nuevu, tendría de tomar nota. Duru destín pa un máxicu comu él.