Garrólos l’escurecerín nortiando les muries y les ferraes portielles del castru. Un cuartu llegua endenantes d’aprucir a aquelles, yera evidente’l dexastre y tracamundiu na rodiada’l castru.
Xube que xube pela pindiosa costana, los viaxeros vieron con pesar cabañes, tendexones y artes del llaboréu desfechos y esfarrapaos, y gran númberu de renegríos calabres d’homes, muyeres y nenos desentrellizaos. Los mas d’ellos desgamellaos de les tiestes, podreciendo al ventestate. Aigles, cuervos y frañegüesos teníen bon platu naquel llugar.
— "Nun-yos tien de dar tiempu a amburalos. Llugar tan guapu nun merez llaceria tan xabaz" —afirmó Aedrics col alendar entecurtiau.
— "¡Dengún llugar merez esta llaceria. Nin siquier l’abisu de Wegos!" —acutió Wanics, de mala fostia.
Pesie al pocu claror, les defenses del castru víense esbarrumbaes per dellos llugares, y amosaben urxentes y eszarabayonos trabayos d’igua. De fechu, paicía mas propio, polo fácil, entrar per dalgún de los dellos furacos que se víen na muria, en cuentes facelo pela portiella na que morría’l camín. Yera evidente que’l castru ya nun yera llugar xuru pa resistir un sitiu.
Franquiaron la entrada ensín dificultad dala, magar que l’escombriu yera abondo. Les ferraes portiellones taben enteabiertes, amosando les coperes que les trancaben, francíes. Rinchaben les fueyes quexoses sobro pernes vencíos, emburriaes polos güelpes del aire xelón que sele les cañicaba.
Naide nun-yos pidió cuentes porque a naide vieron.
Un pocu más pa dientro, atoparon lo que podría ser una ronda de guardia que movíase cuidosa ente les ruines del llugar. Tratábase d’un grupín de vieyos y de dalguna muyer d’edá avanzao, que vistíen ropes de guerra. Taben armaos fasta la dentame con esmellaes y arramascaes espades, escudos de mesto cueru (los más d’ellos francíos, esfelpeyaos y malamente cosidos), y puñales d’unu y dos filos metíos pente los cintos. En cuantes que los nortiaron, foron a recibilos.
Acoyéronlos con contentu, inda diríemos que con gayola, pues na situación na que taben, nun yera pa despreciar l’aida de nuevos brazos. Pero la gayola nun tevo midida cuando decatáronse qu’ente aquellos viaxeros vinía’l so máxicu, el druida cam-ar-mann’ud que los dexare había lo menos dos llunes y que dende que colare con Aedrics teníen bien extrañao, pues naide nun quedó pa curiar de cuerpos amalaos y almes esprites pola llocada de la xabaz griesca que llevaben darréu escontra los fíos de la borrina prieta.
Aquella griesca que duraba, llevose, sigún cuntaron, a muncha xente, ente ella, al cabezaleru Fektos y a tolos sos nobles, que morrieron lluchando había media lluna.
Dientru l’aldega, el tracamundiu yera imensu. Habia dellos balagares de calabres embruyaos ya irreconocibles pol estrizu y espiazu, acabando amburar. Y mientres festexaben los encastiellaos el regresu de Wanics, Mann-U-Mittu púnxose a estudiar les buelgues y mozquetes de llucha que semaben tola redolada.
Paredes renegríes. Palloces desfeches. Caleyos emporcaos perdayuri de sangre cuayao y esfelpeyos de carne xelao. Fedor a carnizu nel aire que bregaba les ñarres. Ñeve vieyo, duro y chafarrinao. El cuadru nun desmerecía colo esfariellono qu’oldeaba aquella xente armao.
Visto lo visto, Mann-U averose al grupu festexante, y dixo:
— "Agora les besties son fuertes. El so cabezaleru lleva encastrando degorrios dende hai tiempu y nesta la so tierra d’aniciu, multiplicaron l’enfotu vengatible. El sangre de los vuesos alimenta un poderosu enemigu..."
La xente camudó la gayola pol esmuelgu. Les rises pola carona. Los vítores polos barbuxos inatalantables. Mann-U siguió falando:
— "Nun tenemos tiempu abondo. Enantes d’una, lluna tolo que conocemos sedrá alcordanza, y dengún home cuidosu de los dioses sedrá a cuntalo, porque pasu ente pasu, l’odiu espuxiga dende esa cueva".
Mann-U siñaló la fonda ferida, casi imperceptible pola falta llume, que yera la cueva de Peña Manín. De cote a los presentes, semeyaba doliosu esgarduñón en cuerpu de llobu blanco.
Oyer estes pallabres arició la piel de los presentes. Quiciavis porque ya paicía sero pa salvar la balse.
Fueron los viaxeros a la cume del castru, y dientru d’un pozu escaváu nun había muncho (Wanics nun lu conocía) allugáronse colos ultimos soldaos y homes d’armes. Les anuncies que-yos dieron nun fueron comu p’antroxar, pues yera la falta de noticies dende los otros castros lo más-yos esmolecía. Esu yera pesarosu ñiciu de que nun taríen meyor qu’ellos, por nun dicir muertos. Les caberes anuncies que vinieren d’Ar-bas, cásique había una lluna, falaben de xabaces matacíos y de que la xente fuxía faza la mariña.
Los refuxaos taben de ñube. Por cualquier caxigalina engardíense, y nun facía falta muncho pa que s’engarraren n’estériles marraces que namái facíen qu’amenorgar el númberu brazos sanos pala defensa del castru.
Aedrics faló col que facía de cabezaleru, un home grande y forníu que dixo ser del castru d’Ar-Aenes, llamáu Gwenal, de la castra de los Gawdios, que tenía sobrevivío a toles engarradielles que s’entamaren en castru escontra les besties de la borrina prieta dende que quedó ente los cam-ar-mann’ud por mor perder a tola so xente d’armes cuandu diben camín d’Ar-Bas. Plantió-y Aedrics la posibilidá d’unviar xente a Ar-Bas pa falar con Terics, y tamién a Cornel pa, de manu, axuntar cuanto más xente meyor, y asina ensamar un bon exércitu que siguiere a Mann-U-Mittu, el cabezaleru que’l mesmu Aernu mandaba p’acabar cola andancia de los Muen-Dol. Gwenal rióse con ganes al oyer aquello.
— "Nun tenemos homes pa defender esta puta corripia..." —cuspió con despreciu— "... y tovía quies que me colen un par d’ellos nun viaxe que nun ye xuru vaiga terminar bien. Y fales de siguir a esi tal Mann-U-Mittu que tantu ponderes, pero yo nun veo guerreru o cabezaleru arrechu nesi mozacu. Nin veo dios o dweliin del degorriu. Pémeque les munches privances del viaxe vos amalaron, noble druida".
Mann-U, qu’oyó aquelles pallabres d’escreyíu, averose a Aedrics y en presencia de Gwenal díxo-y seriu:
— "Nun marafundiéis cuspiu en tochaes. Ayeri ya foi sero. Mañana sedrá imposible. Nin mil cabezaleros arrechos comu Terics, o mesmu comu vos, Gwenal d’Ar-Aenes, sedríen a xubir per eses peñes pa dar fin a esta malicada. Acabar colos Muen-Dol nun ye namái misión d’home, por si inda nun vos decatesti".
Y darréu dicir esto, garró al druida y separtolu del cabezaleru pa pedí-y qu’unviara cola rayada a Vulina camín d’Ar-Bas, que nada malo-y pasaría por facelo, pa que pidiera a Terics "y a los suyos" (punxo enfotu en que lo dixere asina al cabezaleru ar-bas’ud) que vinieren con tolos guerreros a encastiellase en Cam-Ar-Mann, porque una gran batalla habría de ganase naquel sitiu. Y tamién pidió-y que se preparare xunto con Wanics pa abandonar el castru. Qu’aquella nueche habríen de visitar el llar de les besties.
— "¿Nós?" —entrugó tracamundiáu’l máxicu— "¿Quiés dicir nosotros solos?".
Mann-U mirolu un pocu fadiáu. Y arrepostió-y:
— "Los Muen-Dol son munchos, sí. Munches manes y pies, güeyos y oreyes, hachos y zarpes. Son la muerte propia per aciu ayenu, sí. Pero namái una, oyi bien, una, ye la cabeza: la vieya Má-Preñada. ¿Sabes de lo que falo, noble Aedrics?".
Asintió’l máxicu, qu’entainó ente prestosu y remolíu a cumplir la orde (¿qué otra cosa pué ser el conseyu d’un semidios?). Prepararíen el meyor celdón de los que traxeron, y cola alborada cutiría la moza pal castru d’Ar-Bas, siguiendo los encamientos d’Aedrics, a traviés les tres llegües de caleyu que lu separtaben de Cam-Ar-Mann.
— "Por si nun te veo enantes, toma, Vulina" —pidió Aedrics— "Apurre esti saquín al cabezaleru Terics, si inda ta vivu. Contién la dewa de los Swarios, el símbolu sagráu de la castra máxica d’Ar-Bas y Cornel. Y si pa dexastre nun toviere ente los vivos, apúrre-ylu al que faiga de talu. Xuru que seya quien seya, pescanciará y oyirate comu si fuere yo’l que falare. Cunta-y tolo que viesti dende qu’aportemos a Ar-Eum, y di-y estes pallabres: que vienga, élli y tolos suyos, a encastiellase en Cam-Ar-Mann, pues una gran marraza va ganase nesti llugar..."
— "Pero mayestru..." —tento falar Vulina.
— "Nun digas más. Ye importante la xera que lleves y nada pasaráte, pues asina me lo dixo Mann-U-Mittu. Sigue’l camín que vo desplicate y siñalar nesti cueru, y nun pares nin pa mexar. Wanics y yo diremos esta nueche a la cueva les besties con Mann-U. Creyo que ya ye tiempu. Si mañana nun mos ves nun t’esmolezas, que nun andaremos llueñe, y cuela camín d’Ar-Bas. Ye importante que faigas lo que te pido" —finó misteriosu’l máxicu.
Dispidiéronse con un abrazu dempués de les desplicances y encamientos, y coló’l máxicu pa con Wanics y Mann-U.
Dende qu’aportare la tropiella al castru de Wanics, Gwenal taba a la chisba. Xixilaba sollerte los movimientos de los recién llegaos, pero sobre tou, les andances pel castru, y los encamientos a la xente, que facía el vieyu Wanics. Quería saber qué yera lo qu’antroxaben o andechaben, si yera que lo facíen, ente ellos y la collación, y por ello, féxose l’atopaizu, acusbiando per tolos llaos pelos que se movíeron los viaxeros. Nun-y salió vien la xugada y nun algamó a saber un res más de lo que ya-y cuntaren los máxicos de la qu’aportaren.
Pero esta actitud del cabezaleru nun-y cayó embaxu a Aedrics.
Decatose al puntu el máxicu de la estraña esmolición de Gwenal, y poro, desplicó-y modosamente qué yera lo que diben facer. Si nunca nun convién tener a la escontra a daquién, menos si trátase d’un cabezaleru, asina que los máxicos refirieron-y que la xera que llevaben yera namái cosa d’ellos, por ser de triba máxica, y que la misión de Gwenal, comu cabezaleru, y la los suyos, sedría resistir y curiar de la xente del castru fasta que viniera una siñal dende la cueva a la que diben, y aportaren a Cam-Ar-Mann los homes de Terics pa echar un gabitu na gran marraza que s’emprimaría entóncenes. Y más, nada, que nun yera poco.
Aquello nun-y prestó muncho a Gwenal, que barruntaba que’l so puestu de cabezaleru podría tar n’entedichu si se-y antoxaba al máxicu cam-ar-mann’ud, comu home respetáu por tous, y curiaor de la tradición del castru. Aedrics decatóse d’esto tamién, y al puntu encamentó-y al collaciu, nun aparte, que nun entardare muncho en calmentar l’esmolíu coral del guerreru con tientu, diciendo-y que taba bien onde taba, de cabezaleru, y que nun s’esmuelgare pol tronu del castru. Ya teníen enforma colo de los Muen-Dol comu p’atopase agora cola casa entalamerada por fates cuestiones de poder.
Y asina foi fecho.
Taba’l tiempu emborrascáu a cachinos. Igual de rápido que cutíen les ñubes, colaben. Soplaba xelona la escarabana que cinflaba davezu, xubiendo dende Ar-Aenes pel valle del C’Ar-Ecs, tentando llimpiar de ñubes el cielu. Pola procesión d’aquelles, calistrabase intermitentemente la llunera. Magar nun diba ser nueche prestosa pa dir d’aventura, polo menos nun faltaría llume.
Bien armáos en fierru y cueru, allegáronse los máxicos al sitiu en que dexaren a Mann-U: la cabaña mayor.
Yera aquel llugar comu una gran palloza allargada, pero ensin techu paya. Remembraba un gran gwax vueltu del revés, comu cuandu se dexaben nes playes pa igualos. En cuentes de paya, víase qu’l techu tiníalu de tablazón, y dientro d’ella atopábense les traces de cincu bigades que xebraben dientru la casa otres tantes estancies. Forníos cabriales de carbayu sofitaron un combrial añosu qu’agora, esbarrumbáu y mediu carbonizáu, xacía trociau ente les bigades. Cabriales francíos qu’agora espidos, descargaben el pesu d’un teyáu inesistente pa escontra la filera pandes enfullides na cobixa de piedra caliar de les muries.
Na estancia del centru esbarrumbáu de la casa, abríose un día un furacu pel que se vío’l cielu y esmuciose’l fumu de la foguera qu’amburaba día y nueche; onde se celebraron les ceremonies comunales que rixeron la vida social del castru.
Con potentes muries, aquella casa foi’l llugar onde vivío’l cabezaleru y los de la so castra cola parte meyor de los guerreros; aquellos que, polo xabaz y caíu, amosaron los meyores modos pa la guerra y la so industria. Agora, pola llucha escontra les besties de la borrina prieta y los asaltos sufridos, malpenes les muries y un cachín teyáu, inda nun esbarrumbáu y anegratáu pol fuéu, falaba d’un pasáu de prestosos festexos a la lluz de la gran foguera y los cancios de vieyos alcordorios.
Mann-U taba acuruxáu, sofitando la espalda escontra la pared. Baxo la tremante llume d’un feble fuebín, la so piel llatía bien viva demientres élli alendaba pacetible, tal que tresvoláu. Al oyer les pisades de los máxicos, esconsoñó. Púnxose en pie y entrugó-yos si ya taben preparaos. Los máxicos afirmaron. Y silenciosu, fixo demán pa que lu siguieren.
Ún tres otru, fueron esguilando les tres figures pente oscures y solitaries caleyes de Cam-Ar-Mann. Fríes y enllenes de cascayu.
Resalvaron la portiella esgonciada y entamaron a baxar la costana, que-yos llevaría fasta la oriella del ríu, con muncho cuidáu pa nun marchar de capitón monte embaxu. Sonaba’l riu ente la negrura, y el canciu d’una coruxa foi avisu pa los homes.
— "El mieu tien la cara blanco" —xuxurió Wanics.
Naide-y respondió.
Finalmente aportaron al cantil que yera la oriella manzorga del C’Ar-Ecs. De cote teníen l’entamu del pelligrosu camín que baxaba fasta’l ríu, resalvándolu per aciu una ponte madera milenario y que darréu siguía xubiendo’l riu Wull pela canal que llamaben "del texu", allueñándose de Peña Manin.
— "Bien, ya tamos equí, fíu. ¿Y agora? ¿Cómu vamos resalvar esti caidón fasta la pared? Per esi camín que s’alvidra" —siñalo ‘l caleyu— "baxaremos y pasaremos el ríu, si, pero tamíen alloñarémonos de les paredes del monte, camín del castru Wull" —alvirtió Wanics.
Una sorrisa adebuxose na cara del mozu cuandu, darréu d’oyer, aquello dixo:
— "Nun baxaremos. Nin xubiremos les paredes del monte. Axuráivos les armes. Garráiles bien y coyéivos al mio cintu".
Los máxicos plasmaron. Pero nun pidieron desplicanza dala. Axuraron les espades escontra los cintos y mangaron los escudos de cueru arrecostines. Dempués de facelo, cadún d’ellos garró’l cintu de Mann-U per un costáu.
Y comu nun suañu irreal pelos que davezu pasaben nos ritos d’invocanza, tres unes pallabres inatalantebles que dixo’l mozu, sintieron que los so pies dexaben de tocar el suelu. Por dalguna razón que nun yeren a comprender, flotaben nel aire: ¡esnalaben! Mann-U sorreía con ganes viendo les cares que poníen los máxicos, porque aquello, dafechu, nun yera un suañu.
La fuerza que los elevó, emburriolos pa delantre seliquino, al alcuentru la buxa pared de Peña Manin, qu’entamó a averase-yos y a facese más y mas grande y rica en detalles. La escasa llunera que yera a cutir d’ente la trupa ñubada que corría emburriada pol vientu camín la cordal del meyudíe, malpenes dexaba aldovinar claramente dalgunos detalles del llugar al que diben esnalando.
Ceu decatáronse los máxicos qu’enfilaben xusto pa la mancha prieta que, comu una ferida na pared, constituía la entrada d’una cueva kárstica. Mancha qu’enanchaba y espoxigaba en grandor al empar que s’averaben a ella. Diríase qu’aquel negror yera la xigantesca boca d’un monstru dormiyosu.
Vafarades d’aire fétidu salíen d’aquel furacu.
L’esñalopíu del dweliin foi averándolos a aquel argayu prietu, que ganaba consistencia y relieve. Y tan sele comu aniciare l’esñalíu, asina entamaron a descender fasta casi tocar el suelu de la entrada de la cueva.
Nun esperaron los máxicos muncho más. Comu raposos cuidosos en corral ayenu, soltaron el cintu de Mann-U, y echaron a correr lloqueros pa escondese na pared que-yos cayía a la derecha. Y comu podría esperase, dambos dieron col focicu en suelu. Nun conociendo’l llugar, y ensín llume abondo, había que ser bien bobu pa correr naquel tenebríu.
Los cagamentos y bocayades de los máxicos fexeron rir a Mann-U-Mittu, que nun aforró facer dalgún comentariu pelín cruel.
Les rises yeren porque, comu-yos informó el mozu de la qu’atravesaben el sotanviu garraos del cintu, naide los vería y podríen posase en cualquier llau ensin pelligru de francese’l pescuezu.
— "Les prises son bones pa nada" —acutó Mann-U.
Guardándose les espaldes mútuamente, los máxicos ispeccionaron el llugar. Mann-U diba por llibre, y cualquiera que lu viere, diría que-y divertía ver lo cuidosos que se movíen los mortales.
— "Que yo sepia..." —dixo bien baxino y cásique roceanu, Wanics— "nadie del valle toviere nunca nesti llugar".
Aedrics acordió col collaciu.
Siguieron entrando más y más fondo, ensin ver un res. A palpu les más les veces, fexeron el camín de descubierta. Delantre d’ellos paicio-yos ver reflexos de rellumos de lluz. Y naquella direición empobinaron.
El tafu yera insoportable. Desque llegaren a la cueva, llevaben goliendo un aire fedióndigu dafechu que dacuando golpeaba en vafarades amalándo-yos espíritu y cuerpu, al remembraba-yos carne putrefacto.
— "Carnizu, o mortanciu...¡de la pior calidá!" —esclarió Aedrics pesllando les ñarres cola pinza que fexo con dea ya indiz.
Fuere cualu fuere l’aniciu d’aquel arrecendor, lo que yera xuro ye que yera un infiernu alendar.
Enfilando los sos pasos faza aquella feble lluz que más que vese aldovinábase, fueron pali que pali, caminando ensin saber mui bien perónde diben nin lo que pisaben, encantiando y entrancabellándose a cada pasu, tal que nenos primerizos, espalpayando una y otra vuelta na escuridá. Aquella sienda que seguíen entamó a ser más y más magosa sigún progresaben afondando na cueva.
Oyíase perdayuri’l soníu del colar del agua. y dacuando, víense, con disgustu, estrafullando ente ella. Más alantre, la sienda acuosa camudó en folleru pel que dacuandu fundíen los pies cásique fasta los xinoyos. Yera curioso que delles vegaes, en zones más ensuches oyíen francer dalgo baxo’l pesu abarques y calces.
Al fin, la sienda pela que diben abriose nuna gran sala pétrea.
Aquella lluz que siguíen vinía del reflexu amatagáu d’unes diez fogueres qu’embornizaben, parapetáronse tres unes roques y pudieron estudiar bien el llugar nel que taben.
La poca lluz nun dexaba ver claro, pero podría xurase qu’una especie de mancha oscura movíase circularmente, sele y dextróxiramente, alredor de lo que podría pasar per una chaboleta de paya de les davezu facíen los nenos cuando xugaben nes escampiñaes de la viesca. Tovieron d’alguardar un tiempu pa avezar los güeyos a la feble lluz.
Avezaos yá al poco claror, decatárense que la mancha non lo yera. Tratábase d’animales con traza d’osu o dalgo asemeyáo a aquelles besties, que movíense xuntos y llento, comu en procesión, dando una y otra vegada, vueltes y más vueltes alrodiu d’aquel tendeyón, a ritmu de patades en suelu.
Tratábense de besties, ensin dulda. Besties de mesto pelu prieto, de porte abangáu, faciendo dalgo que nun paicía propio de besties.
Dende’l llugar nel que taben nun yeren a ver muncho más. Había que tentar averase. Y asina lo fexeron siguiendo l’encamientu de Mann-U, basniándose pel suelu fedorientu de la sienda. Y asina pudieron saber qué ye lo que pisaben.
Descubrieron mecio ente arena, boldre y cascayu de toa triba, que tamién había una bona cantidá de cachos de güesos de toa mena y condición. Por dalgunos que nun taben inda francíos, yera fácil saber que yeren de suyu, humanos.