La bestia-Dwell sabíase trunfante, poro, sorprendió-y aquel sópitu movimientu d’alitamientu cuandu lo que bramente esperaba yera la última boquiada del mozu. Sintió’l xingón del emburrión y darréu, l’esñalopiar d’espaldes. Aquello nun-y esmoleció. Alguardó con enfotu y despreocupanza, atiñazando’l gargüelu de Mann-U-Mittu, sentir el que pensaba sedría’l caberu güelpe d’espalda amatagáu pol mestu pelaxe y el llardiu del espaldar, tal como los otros que ya tenía aguantao dende que rebotaben perdayuri la gran cuenya, pues alvidraba qu’al mozu nun-y quedaba puxu pa muncho más.
Pero nun foi asina, pa dexastre del degorriu. L’esñalíu que trazaron llevó a los engarraos nuna curva ascendente qu’aparó de sotrucu, y violentamente, con soníu de francimientu de güesos. Tres el güelpe, la bestia punxo los güeyos blancos, arremellándolos espantiblemente, y Mann-U-Mittu vió cómo la presión afogante de les manes de la bestia-Dwell cesaba darréu. De siguío, separtose d’una patada del degorriu y violu mover manes y piernes llento, echando sangre pela boca. La bestia taba enclavada pola espalda del carámpanu piedra al que Mann-U-Mittu dirixérese. Teníalu claváu al altor del coral y salía-y sanguinolentu per delantre furando polmones y costellame.
La bestia-Dwell dio les bocadielles rápido, y en cuantes abandonola la vida, pol propiu pesu precipitose al suelu nun caidón a plombu de lo menos trenta coldos.
Los cuasi tolos Muen-Dol taben silenciosos, y aquellos qu’animaben y glayaben fincaron espetáos, fuxendo al abellugadoriu de los munchos requexos del llugar.
Los máxicos, a carrenderes, fueron al llugar nel que la bestia xacía esfelpeyada. Xuniose-yos Mann-U-Mittu, y mientres la miraben cuidosos, oyeron un filu voz dicir:
- Llamentarás non tenete xunío a los míos. Saboria mientres pueas esta victoria pues tienes los díes cuntaos. Refuguesti sirvime pa vivir etenramente y ceu penarás por ello.
Y la bestia calló pa siempres.
Miráronse los máxicos incrédulos. Aedrics entrugó:
- ¿Quién fala asina? Si tenía de tar fiambre...
- Dwell, Aedrics. Yera Dwell. Ella yera la bestia, pero la bestia nun yera Dwell. Morrió’l cuerpu que tomó, pero non l’inmortal demoñu. Encarnarase de nuéu si ello ye bono pa los sos procuros de muerte y duelgu. Dwell siguirá alitando ente les solombres d’esti mundu
Wanics quinxo que-y esclariaren dalgo:
- ¿Qué querría dicir con eso de que teníes los díes cuntaos?
Mann-U-Mittu rápido buscó cola vista’l llugar nel que perdiere la llarga espada que-y apurriere Gwenal, y arrespondió gayoleru:
- ¡Escaeceilo. Son tonteríes de morribundu. Inda a los dweliins fadia-yos perder una marraza!
Como sintieren que’l xaréu diba xubiendo y que les roceanes besties salíen de los sos escondites, entainaron los máxicos pa colar del llugar. Garraron palos encesos de les fogueres a mou de tées, y llanzáronlos sobro’l chamizu, qu’emprimó a consumise nun gran llumeral. Mann-U-Mittu aprovechó’l tracamundiu pa emburriar al fuéu la gran figura d’osu que presidía l’antoxana,y que cayó con grande retemblíu faciendo xubir al techu la cueva una gran ñube de povisa y fuéu. Y tamién golpeó con puñu de fierru cuan tes figures de Má-Enxita vió naquel llugar fasta tornales polvu miserable.
Dempués d’ello, a orde de Mann-U-Mittu, garráronse los homes del cintu del semidios y xubieron polos aires dempués de desfacese de les fedorientes pieles d’osu.
Esñalopiaron fasta la furaca pela qu’entraren a la cuenya y d’ellí corrieron a l’antoxana de la boca la cueva desandando la estrencha sienda que los llevaría al caidón del C’Ar-Ecs. Trecegaos por un día claru y soleyeru, apararon un migayu los máxicos pa ganar fuelle y avezase a la clarencia. Asina pudieron ver cómo Mann-U-Mittu tenía’l pescuezu anegretáu y esfelpeyáu, manes y costazos esgaravexaos pol aciu les zarpes del Muen-Dol, y tol vistíu esfazayáu y bermeyo pol sangre propio.
Oyeron el ruxíu lloqueru de les besties xorrecer y xorrecer. Yeren gritos de venganza ensin dulda. Glayíos de vengatible enfotu y esfición.
- Ensin cabezaleru, los Muen-Dol ya nun tienen esperanza. Nenguna de les femes de la castra val pa llevar darréu la xera de Dwell. Agora vendrá el golpe llocu, y sedrá’l fin d’esta andancia -dixo Mann-U-Mittu pidiendo a los máxicos que se garraren a él pa cutir del furacu y resalvar l’escobiu del ríu.
Namái entamar l’esñaliu, un reflexu esllumante salió de la cueva, y l’españíu d’un troníu marcó la siñal que prometiere Mann-U-Mittu. De cote, alguardaba Cam-Ar-Mann baxu’l sol d’un nuevu día.
Como solombres vacilantes, salieron les besties per llugares qu’elles namái sabíen, y espurriéronse lloqueres polos alrodios de Peña Manín.
Ensin saber bien qué facer, nin qué golpear, ensin a quién siguir, fueron fácil presa de los homes de Terics y Gwenal, qu’encastiellaos, alguardaron la siñal prometida p’acometer a les besties.
Baxaron los homes del castru y enfrentáronse a los Muen-Dol con valentía ensin igual. Nunca enantes Alcordoriu dalu canció fechos de tantu hérue y valor.
Con saña y enfotu, esficiaos por desconocida fuerza, los pocos homes de los castros de Dob-Ar, d’Ar-Bás y Kórnel, d’Ar-Aenes y Ar-Ruens, de Cam-Ar-Mann y Ar-Ankas, de C’Ar-Reis, Gweres y Wores, y de les pequeñes aldegues del Cuera, acomuñaos baxo’l mandu de Mann-U-Mittu, fíu d’Aernu y de la castra de los Welenos por encarnar de la fía de Wanics, andecharon y fexeron tantu matacíu y estocín, que foi bien ciertu aquello que remembró Mann-U del home de la viesca d’Aucs-Ewam, pues....
...Los homes de la viesca fendieron,
desmigayaron muncho y cociparon,
esfarraparon abondo y sotriparon,
Los cuerpos de les besties, toos francieron...
.....
....
...y cunten que la mar tamien foi roxa.
De Xexia a Xuntam-Ar, toles sableres,
y más pellá del Dewa y sos alrodios,
roxos los xogarales, los bufonos
y, ¡Oh, dioses de la viesca!, toles lleres.
Nun conocieron enducía nin folgancia
caballos, neños, homes nin muyeres.
Fierru, día y nueche, nun aparó d’iguase
en forxes arroxaes, nin d’afilase,
en mueles y grebes aguzaderes.
Naide nun refugó la xera que-y tocaba.
Mann-U-Mittu dio-yos la victoria allampiada.
Y corrieron les anuncies per tola viesca. En Cam-Ar-Mann ganada foi la vida pa la balse. Y otres anuncies aportaron: ellí onde les besties fueron reis un día, amburaben anguaño los sos calabres en montoneres.
Día y nueche el fedor de carnizu destilose de forniellos y llumerales, y gran favor afayó en Wallol la fazaña de los máxicos, el mozu fíu d’Aernu y tol pueblu Kelt de la viesca.
Una lluna dempués de los primeros fechos de la cueva de Peña Manín, metanos los montes del Cuera, na patria d’Aedrics, tolos cabezaleros y tola xente de la viesca entamaron la ufierta a los dioses. El pagu de la delda d’unviar a un fíu que los llevó a la victoria, y el pagu de la reconocencia pol valir de tolos viaxeros faza poniente. Los nomes del máxicu Aedrics, del arrechu Wanics, la dulce Vulina y la madre-neña Sairina sedríen amestaos a tolos Alcordorios de les castres, y el de Mann-U-Mittu grabaríase a fueu nel Alcordoriu Primeru, por pautu de toles castres.
Y de siguío a la ufierta, vieno la gran folixa n’Ar-Bás. Emprimó la mayor festecona qu’Alcordoriu dalu recoyera, y el gran campu qu’arrodiaba aquel castru, semose de tiendes y chamizos apinaos de xente de toa triba y llugar, veníos a saludar la fazaña de los sos hérues, y chumaron y xintaron ensin medida nin acute.
Y con razón el bardu canció a la lluz del sol y la foguera:
… L’aire enllenu de sones musicales,
de xente mozo baillando ensin respiru.
Blincos, xaréu y rises perdayures.
Moces y mozos perdíos cabo’l ríu.
Nunca’ l sidre tevo
cuerpos meyores
nos qu’encarnar primero
Mozos una vegada
-nun lo escaecer-
Namái una vegada
sangre mozo peles venes
Cerveza, sidre y midre corrieron como cuentu risa. Y masque escasu, naide resistiose a saboriar el bon xabalín de la viesca, y tamién el meyor pescáu de la mariña, gochos, cabritos y tienra carne de xatín y, cómo non, les prestoses farrapes y tortos d’escanda, centén y trigu un pelín llampuriaos al untu gochu del pais.
Y asina foi, fasta que Terics llamó a conceyu al Conseyu de les Castres, y oyida por enésima vegada la hestoria d’Aedrics, Wanics y Mann-U-Mittu, nomáronlos hérues cimeros de la balse d’Aucs-Ewam, y los sos nomes amestaos a los Alcordorios d’Ar-Bás y de la castra de los Swarios.
Desque acabare la llucha de los Muen-Dol, ganada la paz relativa de la viesca, Sairina sintió empucherase-y la razón. Sintió xorrecé-y dientru una grande esmolición y un non-vivir camentando al rodiu del so fiu y aquello que-y pasaba cuandu taba con él.
Pero lo que más-y dolía yera decatase de que Mann-U, home ya, ya nun tenía namái güeyos pa ella. Diba tres les moces del castru, ya inda tentaba cortexar a Vulina, la cuala refugábalu por mor el so enfotu na druidada.
Mann-U-Mittu ya nun folgaba de les mamielles de Sairina. Ya nun-y prestaba chucase cabo so má pa xugar. Agora, como hérue, yera’l brazu drechu de Gwenal y del so Conseyu, y taba de contino de viaxe pola balse recibiendo honores y riqueces de castros y aldegues. Agora, el so mundu yera más grande, y sabiu como dios, ensiñaba a máxicos y morriñoses aquella ciencia y aquellos ritos que desplicaben la vida y la natura, el mundu y el somundu.
Morría la primavera. Había tiempu que les camparines acuriosaben la verdoliega balse d’Aucs-Ewam colos colores de vida. Había cinco llunes que la viesca tornare a ser la que yera davezu, y de les besties de la borrina prieta ya nun quedaba sinón los rescaldos de les munches fogueres que los quemaron.
Na casa los Welenos había fiesta.
La castra de Wanics , agora cabezaleru d’ella, cellebraba el cutimientu al Wallol del primer de los Welenos y poro, tolos cabezaleros de les castres, y muncha collación y amigos d’otros pueblos, acudieron a la folixa. Sairina tuvo al cuidu de la cocina y traxinó per ella cuanto quinxo.
Corrió la bébora como l’agua del ríu Purón, abundantible y ensin medida n’añu de ñeves, y la comida, como namái lo fai nuna folixa Kelt.
Los guajes corríen revolvicos y xugaben a los bolinos, a la escondidiella o la bita. La gayola de la xente amosaba a les clares que dempués d’aguantar el cachón tornaben les ganes de vivir y l’escaezu de los murnios tiempos de los Muen-Dol. Y Wanics taba exultante.
A un garrapiellu nenos, el máxicu cuntába-yos hestories fantástiques, recitaba-yos Alcordorios de fazañes de los vieyos homes de la castra los Welenos y cantába-yos refranes y cosadielles. Quinxo desplica-yos lo difícil que ye encarar ciertos llabores y qu’una cosa yera discurrir soluciones y otra, faceles realidad. N’eso taba, cuandu-yos dixo:
- Vo cuntavos una hestoria, y vais dicime qué se vos antoxa. Oyéi :
Yera que se yera un gatu,
zorramplíu, malu y arteru,
-polo menos palos mures
que taben fartos de velu-,
que pasabase too’l día
dietrás d’ellos pa comelos,
o si cumplía-y tar fartu,
cola sida d’escorrelos.
Por ello, y pa iguar les coses
los mures mas solliviegos,
aconceyaos nun cuartucu
entamaron un conceyu.
-Por más qu’a esto-y doi vueltes
nun soi quien topar un plan,
¿Cómu s’habrá de facer
pa quitamos al manguán?
-El gatu ye pa espabiar
y va damos un disgustu.
Pero tompoco yo atopo
soluciones nesti asuntu.
Y nesto taba la cosa
cuandu ún, encaramielláu,
llevaltó la voz melguera
solmenando fuerte’l rau.
-Nun ha facese tantu cuentu
pa iguar esta situación.
Ponemos-y un ruxideru
y acabose la cuestión
porque oyeremos al gatu
cuandu tea al so llabor.
La idega yera perbona
-polo menos, paicía-
y tolos mures glayando
votáronla en mayoría.
Y entamose una folixa
pa cellebrar aquel día.
Tou yeren rises y bailles
desque la xinta corría.
Pero cuandu esti xaréu
taba nel mayor altor,
entrugó-y un mur pervieyu
al Conceyeru Mayor:
-A min lo del ruxideru
nun me parez mala idega,
¿pero quién sedrá‘l primeru
pa dir al gatu con ella?
Los nenos rieron con ganes, afayáronse prestosos col relatu y empicipiaron un bon alderique al rodiu de lo que quinxo dicir Wanics .
Dotramiente, cerque d’u taba la cafarnaya, los homes más mozos entamaron a retase.
Chumaos fasta l’alma, empicipiaron a solmenase ente los mas gallos de les castres, y dientru d’éstes, ente los mas arrechos o cumplidores. Bien se conoz que nun hai folixa Kelt na que cibielles, puños, pates ya inda fierros, nun entrancabellen, misteriosamente, con focicos, tenyeres o costazos. Y tou esto con gran contentu de tolos folixeros que, o cruzaben apuestes o facíen parte del xareu.
Mann-U-Mittu, al ser el más gallu y el más honráu de la castra, tamién foi el que más comió, peleó y chumó, y tamién el que más esbabayó. Tantu escesu traxo que’l mozu anduviera al debalu pela rodiada, más fuera que dientru d’esti mundu, y que viéndolu Sairina naquel dexastrosu estáu, quinxera llevalu pa dormir l’enfile nel que taba. Llevolu Sairina de buenes maneres a la cama, masque protestó por nun xulgar comeniente dexar el campu del honor mentantu otros, con menos méritos, s’engarraben.
Cerró la puerta del cuartu, y encontiándose escontra la mesma, miró al fíu. Aquel cuerpu perfeutu nes proporciones yera xentil como pocos. Marcaba los músculos en reposu con perfecha armonía, y anque ya home, la cara inda la tenía de nenu.
Sairina remembró’l so partu y tolo que fexera por él. Y él por ella. Lloró de rabia por nun poder tenelu asina, para siempres. Xuxurió ente dientes:
- Dioses que me lu distis y nun me preguntasteis si asina tenía de ser. ¿Por qué nun me francistis tamién coral y entendederes pa nun lu amar como home? Esto que m’ambura les vidayes día y nueche. Que dame sede que nun calma agua. Que traime fame que nun mata una fartura. Esti vivir que nun lo ye...
Acercose a la cama y acarició al fíu amorosiega y cuidosa como namái fai una má-amante. Y esmormió llárgamente acancallando-y la cara, esmesando la melota del fíu. Dixo misteriosa, sollutiendo:
- Nunca sabrás cómo y cuántu te quinxi...
Darréu dicilo, salío del cuartu y vieno bien lluéu. Dientru’l cuartu otra vuelta, trancó la puerta echando l’alberruyu y empobinose a la cabecera de la cama. Ellí taba Mann-U-Mittu alendando comu un nenín, cola tiesta xirada, amosando-y la ñuca.
Sacó Sairina un corón d’ente la saya y miró al neñu, ya home, llargamente. Féxolo amatagando l’empapuxamientu que la llevaba a embanzar bien de llárimes nos güeyos. Y asina tuvo fasta qu’un ríu baxó-y peles rosadines mexelles, y ya llorando, d’un tayonazu a dos manes, esgargoló al mozu. Y darréu facelo, salió de batabolén un bastiazú lluz d’aquél cuerpu coráu, y Sairina viose llanzada per una fuerza invisible escontra la pared que taba tres pasos. De siguío, una truena oyose en tola viesca y per unos intres anubriose la lluz día. El sangre que surdió del cuerpu de Mann-U-Mittu tornose neto qu’agua, y ellí onde chiscó, roxes roses punxo col so arume y esplendor. Y Sairina cayó n’ayén toa chiscada de roses y llárimes. Ya nun oyó cómo picaben lloqueros a la puerta, y cómo a emburriones esbandorraron pesllera y armelles pa cutir al cuartu.
Delantre los presentes, el cuerpu escabeciáu del hérue Mann-U-Mittu paicía inda dormir ayenu al socesu. Pero lo más estraño foi decatase, que nun taba la cabeza per nengún llau.
Entrugaron a Sairina una y otra vuelta. Xiringáronla pa que desplicara aquello, pero la guaja repetía mecánico, testerona y cafiantemente lo mesmu:
- Namai míu...namái miu...
Dexaron a la moza al acoldu de les muyeres, y los vieyos estudiaron la situación.
Nel suelu del cuartu atoparon el llargu corón, xusto cabo’l llugar nel que taba la moza, y naide más qu’ella o les otres muyeres traxinaron con cuchiellos pola cocina. Ensin dubia, Sairina yera la responsable de la muerte de Mann-U-Mittu, masque Wanics terció na falta prebes.
Yera grave cosa la muerte d’un hérue. Pero más lo yera la forma na que morrió: na cama. Los homes de la viesca nun afayen honor nuna muerte asina.
Wanics aconceyose de baramenta con tolos nobles de la castra, y espuso que namái los homes de la castra teníen de xulgar aquel socesu pues, ofensor y ofendíu yeren de la mesma castra. Amás, puntualizó, quiciabes Sairina podría nun ser responsable de la muerte de Mann-U, sinón testigu de dalgún fechu misteriosu, pues Mann-U yera tamién fíu de dioses. Pero los más vieyos de la castra refugaron facer el procesu: Mann-U yera hérue de Cam-Ar-Mann y del pueblu Kelt, y la decisión tendría de tomase nel Conseyu de les Castres de l’aldega.
Aconceyáronse na casa del cabezaleru tolos representantes de les castres de l’aldega. Xunta la morriñosa, presidió Gwenal y los sos nobles la sesión.
- Trátase de grave cosa: la muerte d’un hérue fíu de los dioses, masque seya por aciu so má y dientru d’una castra -dixo Bogar, el cabezaleru de la castra de los Cámar, que por ser el más vieyu de la castra fundadora del pueblu, correspuendía-y dirixir el debate. Y recitó un cachín del Feneyu Log-Eneich (del preciu del honor) pa recordar la posible pena a imponer:
...Aquel que matare a otru
por falcatrúa o embullu,
seya espulsu de la castra,
y sinón, a la llabastra...
Tratábase d’una pena pergrave: o la muerte social (espulsión de la castra, y poro, del castru, o seya, perda d’indentidá social y por tanto, del status del drechu de la Feine del home llibre, colo que podría Sairina cayer na esclavitú), o muerte física, si daquién pidía l’usu, en xusticia vengatible, de la piedra maldita, la llabastra.. Y ello, ensin cuntar con que l’ofendíu yera un semidiós, colo que la pena podría ser inda más grave ya que la castra respondería de la ofensa y del preciu del honor del fallecíu.
Tolos presentes, sacante Wanics, que s’abstuvo, acordaron que l’asuntu meritaba un xuiciu que perpasaba al que-y correspuendería facese dientru la castra ofendida, pues Mann-U-Mittu yera más que fíu de los Welenos. Poro, el Conseyu dicidió que fuere un bridem el que dixera la llei d’alcuerdo a los Feneyos de la Feine. Y tendría de ser el meyor de tola viesca.
Afayaron que’l más propiu pa xulgar aquel socesu, por cabal y correchu y la fama los sos pareceres, yera Aedrics d’Ar-Bás, el máxicu de la castra de los Swarios.
Wanics nun yera a creyelo. Aquello yera una llocura ensin xacíu y vía cómu les coses s’enguedeyaben pa la fía y la so castra. Poro, decidió partir cola primera rayada camín Dob-Ar pa ser el primeru en dar anuncies al so collaciu. Si diba ser bridem, quiciabes la cosa tendría igua.
Masque hérue de la viesca, Mann-U-Mittu nun yera rei nin cabezaleru de castru o castra. Pero la so fama per tola balse ya perpasaba dalgunos fechos del gran Mann-U de C’Ar-Ecs, el gran trebeyón, y sinón cabezaleru, meritaba nel so camín al Wallol igual o meyor tratu qu’aquellos. Y el Conseyu de Cam-Ar-Mann pidió a Gwenal qu’aperiate la mayor foguera d’asturcón que nunca nun se viere, pues había qu’amosar a los dioses que nun yera aquel pueblu desagradecíu pa colos daos divinos. Y asina acordose.
Mandó Gwenal que los filids de la madera tentares sacar de la viesca los cuatro más grandes y forníos carbayos que se pudiere pa llantalos como pegollos sobro los que mangar l’asturcón de madera nel que reposaría l’hérue, la so acompañante nel viaxe al Wallol, les sos armes, regalos y caballos. Y mandó que se cortara madera abondo como pa entamar una foguera qu’amburare por más de cincu díes y cincu nueches.
Diez díes trendríen pa cumplir aquella manda. Los que tardaríen les muyeres en coser les riques ropes ya iguar tolos preparativos pa facer fumu y fuéu el cuerpu del semidiós. Y tol pueblu andechó, xunto con muncha xente d’Ar-Aenes, Wull y Kórnel.
A los pies de Cam-Ar-Mann llantaron los cuatro grandes sofitos de carbayu, y enriba d’ellos aperiaron un gran talandoria con forma de caxón con cabeza caballu, y apilaron dende la base tanta madera, que diríase naciere un monte nuevu al lláu del C’Ar-Ecs.
Al quintu día dende la muerte de Mann-U, mandó Gwenal qu’entrugaren ente moces y muyeres del castru, ya inda fuera d’él sinón fuesen afayaes, por aquella qu’acompañaría al hérue nel so viaxe al Wallol. Y magar munches quinxeron facelo, diose-y el privilexu a la mui noble, formosa y prestosa virxe de la castra de los Welenos, Fadwina, que quería volver cola so familia, muerta toa ella na marraza escontra les besties de la borrina prieta. Y fecha la escoyeta, Fadwina quedó al cuidu de les morriñoses, que la guardaríen día y nueche, dando-y de beber y comer cuantu quinxere, fasta el día de colar.