Sentaos, frente per frente de la única mesa del cuartu, los dos collacios falaron. Primero Wanics.

- Aedrics, collaciu, conocémonos dende hai munches estaciones y masque nun me lleves abondes, siempre fuisti l’espeyu la xusticia nel que me miré. Dempués de tantu tiempu, calúmbesme perbién collaciu, pues nunca tuve contigu canil o embullu. Poro, amigu, pídote una cosa namái, una cosa que non ye pa mín, collaciu. Pídote solo una cosa, y con ella quedarete deldor pa demientres viva: pídote que seyas bridem y digas la llei sigún Sairina. Namái qu’eso collaciu. Nun ye muncho.

Aedrics mirolu comprensivu.

-Ai, Wanics , la vida nun ye xusto. Se polo que pases, y nun se bien qué dicite. Nin siquier se qué facer. Yo tamien teo-y ciñu a Sairina, quiciabes más de lo que camientes…

Aedrics llevantose. La silueta de la so cabeza recortose al bellume del ventanu que taba enriba la mesa, y dexando a Wanics sentáu, púnxose a pasear pol cuartu neto que fiera enzarrada, demientres tentaba filar con tinu les pallabres que-y cutíen del corazón y de la razón.

Wanics encaboxó-y la parola y cuntó-y los fechos tal como los vio y tal y como-y paicíen, y acutó con urxente esmolecimientu:

- Sabes que Sairina tuvo tresvolada, mui maluca de la tiesta desde lo de Dob-Ar fasta lo d’Ar-Eum. ¿Y los fechos polos que tevo pasar, collaciu? ¿Cuántes nenes podríen caltenese cuerdes con aquello?

L’enxitu nun foi normal, Aedrics: parió un dios, y nun sabemos bien cómo encarnó nella. Eses coses nun son normales, collaciu, tienes que lo ver...

Dende la oscura del cuartu, Aedrics respondío:

- Si, collaciu, sí. Tolo que dicis perselo. Tienes tola razón, pero como bridem tamién hai que sopelexar otros porgüeyos.

Wanics, al oyer aquello, enraxonose tou. Dió un fieru güelpe na mesa col puñu zarráu y entrugó con sofoquina, magar tentaba disimulalo:

- ¡¡¿Otros porgüeyos?!! ¿Qué hai mas importante qu’axuranos que Sairina nun seya espulsada de la mio castra y de les nueses vides? Sí, collaciu, de les nueses vides, y sábeslo tamién perbién.

Wanics alendó fondu y soltó l’aire seliquino pa aselar el coral que-y baltaba tou lloqueru.

- Mira, Aedrics, persabes que Sairina tráxome de nuevu la gayola. Que dende que morriome Llarina yo nun vivía y qu’agora, gracies al fechizu d’esa nenina, soi otru home. Aedrics, nun consientas en que nos separten d’ella, que tenga de colar de la castra los Welenos. Nun-y doi más al oru, collaciu, nun me pesia que la castra y yo mesmu, arrecostinemos col preciu del honor, por mui altu que se fixe. Nun m’importa, daveres, pero nun consientas que Sairina cole de mio vida. Pué faltame l’oru, collaciu, pero non el ciñu de la mio nenina.

Aedrics aparó de movese. Averose a Wanics pensatible, y guardó silenciu llargamente. Dempués d’un cachu, dixo:

- ¿Sabes, collaciu? Vo refugar la petición de bridem...

Oyer aquello foi neto que fincar un fierru en culu de Wanics. D’esmenu dio un blincu y púnxose en pies, encarándose con Aedrics. Mirolu con fuéu nos güeyos.

Aedrics punxo les manes abiertes delantre’l pechu del so collaciu, mandandolu aselar, y continuó falando:

-...Y vo facer dalgo meyor que xulgala. Vo defendela como Dha’y...

Wanics fincó sorprendíu.

-...Vo encamentar a Gwenal que pida bridem a otru...Non sé...mesmu a Drwdics. Sí, sedrá una bona escoyeta: Drwedics ye home cabal y persabe la llei de los Feneyos como’l meyor de nós. Amás, tien tiempu asgaya agora que dexó la druidada del castru Wodes pa retirase a la viesca. Si-y lo pido, aceutará de toes toes el cargu, y como home xustu que ye, emponderará perbien tolos porgüeyos en xuéu.

A Wanics nun-y paició bien aquello. Aedrics garrolu pel llombu y llevolu p’afuera.

-Nun t’esmolezas, collaciu. Quiero a esa neña más de lo que pienses, y nun vo consentir perdela. Perdón...-sorrió Aedrics-...quiero dicir que nun vamos consentilo, ¿acuéi?

Wanics asintió más tranquilu al empar que siguía falando Aedrics.

- Nun fadrán dañu a Sairina, collaciu. Como dha’y pueo facelo, como bridem, non ensÍn faltar a la xusticia. Y vaigamos ca’l cabezaleru Terics pa informalu d’estos socesos abegosos.

Enantes de cutir de la cabaña, Wanics parose, y dixo peratristayáu, apertando los puños fasta facese sangre coles uñes y mirando ensin mirar:

- Dwell cumplió.

Aedrics que primero sorprendiose, lluÉu decatose de lo que quería dicir el collaciu. Remembró qu’allá, na cuenya de les besties, la diosa abegosa predixo aquel duelgu, y entrugose pa sigo, por qué siempres había que pagar un preciu.

Tamién gachu, Aedrics garró al collaciu y dando-y unes palmaduques na espalda llevolu con él camín la casa-palaciu del cabezaleru Terics.

La muerte de Mann-U-Mittu súpose rápido per tola viesca. Y Terics, cuandu lo supo, atristayose tamién dafechu pol tipu muerte y polo muncho que-y quedaba por facer polos pueblos Kelt de la viesca a aquel privilexáu home. Entrugó a Aedrics y a Wanics que qué ye lo que podríen facer pa honrar la so alcordanza ente’l pueblu d’Ar-Bás. Y Aedrics propunxo sentenciosu:

-Manda picar nel Monte de los Antiguos, nel peñatu de Witagos, llugar nel qu’aconceyarémonos pa xulgar la so muerte, la so estela y los símbolos de la so castra. Asina, per etenros, tolos homes de la viesca, y non namái los nuesos, caltendrán l’alcordanza del fíu d’Aernu.

Y per dos díes coles sos nueches, siguiendo los encamientos d’Aedrics, picaron nel peñatu del Monte de los Antiguos la estela de Mann-U-Mittu, los símbolos de la so castra y les marques-de-fala qu’adebuxó primero Aedrics. Asina, si por ventura dalgún día fueren pronunciaes aquelles marques, darréu esconsoñaría Mann-U-Mittu del so alitar pel Wallol.

Cumplíu el décimu día de la muerte del semidiós, xubieron el so calabre escabeciáu y renegríu, pero rícamente vistíu y reblicocáu n’oru, piedres y pieles, a la cama tamién guapamente vistida y mangada enriba la gran talandoria de madera.

Costo-yos trabayu xubir por aquella montonera de madera, pero al fin, lloñe de la vista de la xente común, punxeron a Mann-U-Mittu na cama de cabezaleru, colos símbolos de los Welenos, la dewa de Wanics, les sos armes y les munches ufiertes d’oru qu’apurrió tola xente que quinxo.

Cabo d’elli punxeron tamién el cuerpu muertu ya inda calentino de Fadwina, la murnia y guapa princesina señardosa de la so familia, afogada poles morriñoses dempués de tenela bien chumada con fuerte oruxu de mazana, y de dicir a tolos presentes que ya vía a los suyos esperándola pa colar. L’hérue nun diría solu al Wallol. Asina, tendría quién lu servir.

Dempués d’escabeciar un par de gallos, arramá-yos el sangre pel suelu la talandoria y llee-yos les coraes, les morriñoses dixeron tar cumplíes les ufiertes, y propiciu el tiempu de marchar. Y a los pies del monte lleña sacrificaron cincu prietos asturcones. Mann-U-Mittu tendría montures abondo pa nun entardar n’aportar al Wallol.

Y dieron-y al fuéu tou aquello.

Xuxurió pa sigo Aedrics, güeyos húmedos y reflexu de foguera:

- Un home tá, aú tá la so alcordanza, y vive, demientres caltengan-y la so memoria. Nun hai otra eternidá sinón la fama qu’unu dexa, nin otra vida, sacantes esta....Magar quédamos el Wallol

Coló Aedric p’Ar-Bás, y con él fo Wanics. Enteque durare la foguera nun diba entamase’l conceyu de xusticia nel peñatu de Witagos. Y un collaciu de Wanics recordó-y del esguízaru y esmolíu Gwenal que’l diañu ya nun dormía en paya.

Vieno un nuevu día de branín con tiempu calmu nes tierres de la mariña d’Ar-Bás, y vieron, máxicos y Vulina, riscar l’alba del sestu día dende l’entamu la quema, abellugaos baxo’l doble sotechu caliar del peñatu Witagos del Monte de los Antiguos. Vieron, tamién, los oreos de la mar y cómo retiraba la encainada de la tierra pol sol del nuevu día.

Dempués de ver la estela de Mann-U-Mittu y dicir el so nome encarnando en vida y pallabra les mozquetes-de-fala, fexeron la ufierta a los dioses de la balse pola alcordanza del inmortal coláu. Y fecho aquello, entornaron pa la aldega. Cumpliríase un menr dende la quema y ya yera’l tiempu d’entamar el conceyu xusticia. Aedrics diba tener trabayu abondo.

Enfilaron el camín de vuelta.

Aedrics, el vieyu máxicu que viste llargues barbes, piel de bisón y, de xemes en cuandu cuernu d’uru, tenía la so estratexa al respective:

- ¿Sabéis, collacios lo que fadremos? Teo la solución a lo de Sairina. Mirái...