— Respective a lo de les tos velees, ente les coses que fui pescanciar de la doyura conocencies qu’amosaba Xolimbei, llamome l’atención la so creyencia de que la tierra, al tar viva, tinía, comu nos y los animales, unos camínos o venes. pelos que corría’l so sangre, el so alendor, y una clas de fluidos o fuercies que nun se veíen, que marchaben na direición dende’l meyudíe al norte. Amás d’ello, embaxu de la piel de la tierra caneyaba l’agua formando ríos, regatos y arroxos, llagos y pozos, fondigaños enllenos d’esti llíquidu vital.

— Ye por ello que sigún la vieya ciencia de Xigadar, enantes d’aperiar o facer cualaquiera obra de vivienda, fortaleza o pueblu, habíen de facese invocances a los dioses, y que los máxicos mirasen si embaxu del llugar pasaben eses venes de la tierra. Porque si les había, la xente y los animales que nelles s’asitiaren diben tener amalecimientos y andancies sigún tovieren orientaos los sos peselbres, comederos y llugares de descansu. — Que yera perimportante pal home nun dormir, por exemplu, cola cama aviesa respeutu la direición de les venes de fuercia invisible, porque ello traía velees y amalecimientos de tiesta, y el descansu no se coyía fácilmente. El casu tuyu, sigún veo.

— ¿Venes? ¿Fuercies invisibles? ¿Qué son? ¿Coses máxiques? — Wanics ablucaba.

— Non, nin un res de maxa. Sigún Xolimbei, son fuercies riales, físiques, que nun se ven, comu l’aire, pero que tan perdayuri. Mira...

Aedrics foi pa l’arforxa a u tinía les herbes seques qu’emplegaba na so ciencia sanadora, caltrió nella y esmesó con trabayu del so fondu, un cachín de daqué que semeyaba una piedrina allargao, prieta, con unu de los llaos mozquiáu. Amosó-yla al so collaciu. y siguió la parola:

— Esta piedrina, con esta forma tan curioso, y curiosa reblanea, apurriómela Xolimbei cuandu taba permalu. Gusta-y el fierru porque s’apega a esi metal. Mira comu se coye a esti torque de fierru.

N’efeutu, en cuantes qu’Aedrics averola al torque del cintu, la piedruca fincó apegada a elli, comu si toviere una invisible pegamía.

— Amás, tamién díxome Xolimbei que tien la propiedá de movese ella sola na direición pela que marcha esa fuercia invisible que va de meyudíe al norte. Vas ver.

Coyó Aedrics un cachu rama seco de xunta’l llar, y abangola dafechu dica que la franció, dexando cayer col españíu, delles callopes y estielles perpequeñes. Garró una callopa, punxo la piedrina enriba, y axurola a ésta apegándola con una migaya de pan moyá con cuspiu. Darréu, cho na escudiella vacío un gotu d’agua, pero abonda comu pa perpasar dos deos del so fondu. Y con curiáu, asitió la estiella cola piedrina nel centru la escudiella.

Wanics, que taba de cote d’Aedrics, nun alendaba.

Darréu d’ello, la maderina, por aciu de maxa o cosa invisible asemeyada, entamó seliquino a movese dando un xiru a drecha, y tres d’unos intres, talamente inacabables, fincó flotando nuna direición. Wanics entaramingose al ver que cá vegada qu’Aedrics sacábala del agua y poníala d’otra miente, la tabluca tornaba a xirar y a fincar de igual forma, apuntando a la mesma direición una y otra vuelta.

Maraviellosa cosa.

— Home, Aedrics, ¿nun taras ciflando-y, verdá? Colo revolvicu que yes, nun diría que non. — Y Wanics miró faza la boca d’Aedrics, que la caltenía pesllada.

— A lo meyor hai airiquín perequí, — xustificó Wanics.

— Vamos, collaciu, que nin ciflo-y nin hai airiquín. Ye una cosa natural. Esta piedra tien esi poder. Cola mozqueta que tien pues conocer siempres au tal norte, por exemplu. Y tamién pues conocer si un metal tien fierru o non.

Wanics coyó la piedrina. Mirola y remirola. Y darréu, sorriendo comentó:

— Cenciellamente, máxico, collaciu. Si Xolimbei amosó esto a los Eusc-Ar’ud, colo tochos que son, xuru que lu adoraron comu a un dios.

— A lo meyor, tamién sorrió. De toes formes, amás d’eso tamién tien otra propiedá perinteresante. Mira, teo una hermana d’ella. Apúrreme la piedrina, Wanics pasó-y la piedruca. Si agora la xunto por esti lláu, que tamién ta mozquiáu pa saber peronde cai’l norte, cola hermana que tien la mesma mozqueta, fíxate comu nun quieren tocase. En cambeu, dando-y la vuelta, pel otru estremu, fíxate, xunense comu si se conocieren de tola vida.

— Interesante —dixo Wanics— pero nun veo mui bien pa que pue valir tanta maxa.

— Yo nun-y topé denguna utilidá, a non ser prebar que la piedra tien dalguna fuercia dientru, igual que les herbes tienen fuercia sanadora o d’amalecimientu; porque’l cuentu que me dixere Xolimbei, esi de les venes de la tierra, nun soi a creyelu dafechu. De toes formes, polo que me dixiste, trata camudar d’orientación la cama, asitiala mirando al meyudíe o al norte, a ver si descanses meyor. Nun pierdes un res por tentar.

— Oyi, y eso del mostruu prietu qu’echa agua pela tiesta... — entrugó Wanics.

— Sigún les falucaes de Xolimbei, sedrá que’l sitiu u chuqueste anguañu tien una vena d’agua perbaxo. Esu que suañes ye un pexe, un mostruu marín de los que falen los mariñanes, y poro, rellacionáu col agua. Y si non ye asina, collaciu, sedrá que fais males dixestiones, y que ties de curiar les comides....y tomar mazaniella más davezu.

Aedrics sorrió clisándo-y un güeyu al so collaciu. Y siguió:

— Y ya ta bien de parola, qu’hai de preparase pa la invocanza del Tresvolamientu Divín. Ya ye tiempu.

Aedrics tornó llevantase, y empobinose a l’ensame alforxes que taben encolingaes de la parede. Alloñábase del escañu cuando oyó a Wanics entruga-y:

— Oyi, pa finar, esi tal Xolimbei ¿siguió camín del poniente, non?.

Silenciu trupu.

Aedrics tornose esmorecíu faza’l so collaciu.

— ¿Comu creyes que pude algamar tener estes piedres? Yeren de Xolimbei. Morriome dos díes dempués en sin que pudiere facer cosa dala. Tinía el fríu de la muerte ya bien dientru. Non caleció ni con hidromiel fermentao, nin con esfriegues en pechu y espaldar. Foi bien murnio velu dar les boquiaes dempués de cuntame tantes coses estrañes y maravielloses. Y comu non sabía qué facer col calabre, si seguir los nuesos vezos y amburalu, o los de so, que nun me los dixo, empocelu al pie del tochu comu fai la xente de pellá la cordal de la viesca. Que los dioses lu lleven al cielu Kelt o al suyu, si toviérelu.

— Tchss. Ya lo dixi. Bien murnio ye vinir de tan lloñe pa morrer.

Mentantu Aedrics traxinaba ya colos preseos y les herbes de la invocanza, comentó-y a Wanics los so camientos al respective del alcuentru con Xolimbei.

— Sabes, collaciu, ún inxamás dexa de deprender coses. O ye de la Natura, o ye de la xente. La sabencia humana non ye una corripia, un círculu peslláu au vamos chando los biltos de conocencia qu’atopamos. Tien más que ver coles espirales que cuadramos nos maderos y tallamos nes piedres. Damos vueltes y vueltes, y cuando atalantamos que tamos nel mesmu puntu, bramente ya tresnemos abondes coses y caleyemos enforma camínos. Con Xolimbei vi que nunca nun ye sero pa maraviase y adeprender puntos de vista distintos. Puen compartise o non, pero ye prestosu ver que cualaquiera pregunta pue tener abondes más soluciones de les que somos, de manu, a atopar. Y ello ye bono pal home.

Wanics apuntó:

— Tolo que cuntó esi Xolimbei parez bramente increyible, anque a lo meyor dicía coses ciertes. Ye una pena que se perdieren les sos conocencies. Col trabayu que cuesta apinales equí y señaló la propia tiesta.

Mentantu traxinaba nos preseos, Aedrics faló:

— Tamién lo camentare, collaciu. Por eso fixi un alcordoriu que llamo "Del lloñe naciente". Recítolu dacuando al mio acólitu, que ya lu conoz. Asina axúrome que xunto al Alcordoriu Primeru y los demás que caltienen la hestoria y conocencies de la castra de los Swarios, les coses de Xolimbei pasen a los futuros homes de la viesca, qu’a lo meyor fain meyor usu de lo que me dixere porque agora yo nun soi a pescancialo. Si quies, recítotelu.

— Si, hom. Préstenme los Alcordorios de la to castra, la de los Swarios —Wanics fixo un pequeñu engolamientu de voz—. Son bonos. Bona rima y meyor música. Tendríemos d’adeprender los Welenos del bon gustu qu’emplegáis pa facelos...

Rieron xuntos l’afalagu, y la tochez de los Welenos. El pueblu que sabe rise de si mesmu, de veres que ye un gran pueblu.

Aedrics entamó la salmodia: