NOTES FINALES

ALCORDORIU. Ensame oral d’hestories, anuncies y fechos pasaos que se recueyen y caltienen, de vida en vida, polos máxicos de los pueblos de la castra "Kelt" , a la que pertenecen tolos pueblos de la viesca d’Aucs-Ewam. Los "Alcordorios" son poemes en versu curtiu que caltienen socesos, fechos curiosos, llinaxe de castres, métodos de guarimientu, etc. Arrecueyen fechos variaos y cada castra, castru o máxicu pué facer los suyos como forma d’alcordamientu d’aquelles coses qu’interesen, bien al pueblu, bien a la castra, bien al propiu facedor del alcordoriu. Son de tradición oral y hai tantos cásique como homes los reciten na viesca.

AMUDARMES Ye l’heraldu del cabezaleru o home. encargáu del control y bon estáu de les armes del cabezaleru, relaciones públiques y del protocolu. Güei sedría tamién el xefe de la intelixencia militar, supuesto que los militares tean intelixencia.

AR. Prefixu o sufixu propiu de nomes de llugar, masque dacuando tamién puéa atopase incorporáu a nomes de persones por mor describir el so llugar d’orixe. Por estensión, pueblos d’Ar significa, pueblos kelt de la balse d’Aucs-Ewam

BRIDEM. El bridem ye’l llabor de xuez o xurisconsultu qu’exerce´l máxicu énte’l pueblu Kelt. Los druides, o máxicos, teníen dos funciones, por ser dambes igualmente máxiques y divínes: xusticia y sanamientu. La misión de xulgar resérrvase al máxicu de la druidada porque xulgar ye midir l’alma y los fechos de los homes, y talu conocimientu nun ta na sabencia de cualuquiera. Los dioses acutaron tala misión al máxicu, masque posteriormente tamien los cabezaleros podrán impartir xusticia

CABEZALERU. Gallu la quintana, rei o mandamás del castru. Ye cargu electivu por parte del Conseyu de les Castres qu’hai en tolos castros. Sicasí, tien un importante conteníu hereditariu.

CABUDARMES. Ye l’heraldu del noble en funciones de guerra o campaña.

CONSEYU DE LES CASTRES. Conseyu d’ancianos de toles les castres d’un castru. Si tá formáu namái polos vieyos de la/les castres fundadores del castru, apellidase tamién Conseyu de los Grandes de les Castres

DHA’Y. El dha’y ye una triba d’abogáu o componedor que los homes llibres de les aldegues Kelt podían emplegar si lo quinxeren, nos diferendos ente castres. Igual que’l llabor de bridem tamién los máxicos puen exercer tala función, masque nun seya propia solo d’ellos

DIOSES DE LA VIESCA. Entes sobronaturales d’aniciu "gwéllicu" encargaos del gobiernu de cada una de les manifestances o fuerces de la Natura. Hailos "normales", que constitúin una gran familia, con zunes y enfotos neto que los humanos, con un pá, Aernu, una má, Ecswa y fíos a esgaya, tanto divinos como semidivinos, y toos ellos cuiden d’aidar al home de la viesca na so llucha pola sobrovivencia; y hailos "inferiores" o "meninos", que gobiernes el llau prietu del Gwell, con Wegos como ‘l más malu y corrupiu de toos ellos. Wegos gobierna el somundu, el llugar pel qu’hai que pasar durante trece soles p’aportar al Wallol y xunto con gorcs y dweliins persigue ‘l dexastre de los homes, comu forma de reciclar la materia humana.

DRUIDA. Ver MÁXICU

DWELIIN. Son semidioses, fíos de dios y mortal, siguidores de Dwell fía de la diosa Ecswa y del mortal Mann-U-Mann que con cuenta de ser diosa dafechu rinde vasallaxe al llau prietu del Gwell, y que foi condergada por so pá Aernu a tar ente los homes y nun aportar al Wallol fasta que l’ultimu home esapaeza de la tierra. Por estensión, cualquier semidiós

FEINE. El pueblu de la Feine ye como se llamen así mesmos los homes de la viesca que son llibres, o seya, que nin son siervos, nin esclavos nin foriatos. Define un status de ciudadanu dientru les castres y los pueblos de la viesca.

FENEYU. Poemes qu’arrecueyen los vezos sociales que tienen fuerza coercitiva abondo como pa desixise a los homes de la viesca. Los "Feneyos" nun son Alcordorios, pol so conteníu de mena, podría dicise, "xurídica". La pallabra vien de la vieya llingua Kelt d’Erim, "Fenechs" que pué traducise por llei, norma o regla a siguir. Igual que los "Alcordorios", los "Feneyos" tamién son orales, anque na dómina dAedrics y Wánics ya hai delles compilances o coleiciones de vezos o costumes con fuerza social explícita, escritos en piel curtío de bandullu tienro d’oveya. El Feneyu recueye los vezos xurídicos, diríemos güei que la xurisprudencia, el seyellu "dichu" pola boca, la sabencia y el corazon del "bridem" u home bono componedor, que trai soluciones práutiques a la convivencia de los homes del castru, y a les frecuentes engarradielles de les castres, y tou ello por aciu del precendente resueltu, y, sobro tou, el bon xaciu del home bono, o seya, del "bridem". Tala misión reservase al máxicu de la druidada porque xulgar ye midir l’alma y los fechos de los homes, y talu conocimientu nun ta na sabencia de cualuquiera. Los dioses acutaron tala misión al máxicu.

FILIDS . Castra d’artesanos, xente con profesión distinta de la druidada o de la guerra

GORCS. Triba de diaños trebeyones de la viesca, collacios de los dweliins, anque nun tan corrupios como éstos.

GRAN NUECHE. Solsticiu d’Hiviernu

GWAX. Barcu mui marineru de vela y remu propiu de los pueblos tresmarinos d’Erim, de costruición de tingladiellu, imbricada o de solape, qu’emplegaba atadures p’axurar les tables a la cadarma. Esti métodu de costruición facía al cascu del barcu muy flexible, pero apurría gran resistencia. Ideal pa pelear les agues del mar norteñu. Los barcos propios de la balse d’Aucs-Ewam nun teníen el porte del gwax, por ser d’emplegu más bien costeru y tener el cascu de piel. Por embargu, la xente de la mariña nun refugaba la pesca d’altura de los grandes mamíferos: ballenes, cachalotes y marsopes.

GWELL. Principiu xeneratriz indefinible. Unu, mas múltiple, cara pero al empar cruz. Caltién dos manifestances cimeres: la del llau prietu, relacionada colos dioses inferiores del abisu, y la otra, que por esclusión, nun ye la prieta.

HYWERN. Gúesinos, normalmente de mamíferos pequeños y de coruxa, que llanzaos al suelu cabo sangre fresco arramao permite arrevelar el futuru. Xunto cola llectura de les coraes d’aves ye’l principal mediu d’adivinación.

LLECHI PRIETO. Llamen los máxicos de la viesca d’Aucs-Ewam "llechi prieto" a un caldín fechu a base de quesu afongáu por una clas de mofu, güei sabemos que ye Penicillium, que criase en dalgunes cueves caliares especiales, que da esi collor y que tien perbones propiedaes esontra la calentura y mancadures engafentaes, pero en dosis homeopátiques o perpequeñes

KELT. Pueblu espurríu pela viesca d’Aucs-Ewam, ya inda de más pellá d’ella, faza’l naciente, dixebráu en castres y castros y d’aniciu inciertu masque munchos siñálenlu pal septentrión d’Eurasia. Nun son sátamente celtes. Caltuvieron una cultura y tecnoloxía del fierru común con aquellos. Los propios del pueblu amesten al nome del mesmu la terminación "‘UD" para dicise "homes de..." Asina, del castru d’Ar-Bás tenemos Ar-Bás’ud o home d’Ar-Bás.

LLINIA DEL ANCHU. Nel llinguaxe propio de los homes d’armes significa atacar el pescuezu del contrincante dando un tayu nél cola espada, y poro, esgargolandolu. Tala llinia describe la trayeutoria que tien de siguir l’arma, por contraposición a la LLINIA DEL ENTRULLÍU

LLINIA DEL ENTRULLÍU. Parte central del cuerpu del enemigu, ente ‘l pescuezu y la vería. Pa los homes de la viesca, lluchar significa, cimeramente, batise cuerpu a cuerpu, que ye la forma más noble de pelear. Ye poro, que la espada inxamás utilizase fundiéndola nel enemigu, sinón moviéndola n’arcu a la gueta de la LLINIA DEL ANCHU. En cámbeu, fleches, llances, venablos, hachos, puñalos, dagues y navayes fúndense nel cuerpu l’enemigu a la gueta de la LLINIA DEL ENTRULLÍU, parte central del cuerpu, ente pescuezu y iyargues.

MARCA-DE-FALA. Símbolu gráficu de la vieya llingua de los Nean-Der que caltienen conceutos que permiten ser asociaos con soníos de voz.

MÁXICU. Druida o chamán. Home dedicáu al guarimientu y a la relación del restu los homes pa ente sigo y pa colos dioses bonos de la viesca, y la Natura. Exerce funciones de conseyeru, xurisconsultu y de sanamientu de cuerpu y alma.

MENR Selmana, o si se prefier, siete díes.

MEXU CONCENTRÁU. Amoniacu. Los homes de la viesca fervíen el mexu de vaca fasta concentralu, guardándolu dempués en zapiques. Ye un escelente blanqueador y desinfectante y como tal lu emplegaben davezu.

MIDRE. Aguamiel fermentao. Bébora de bon gráu alcólicu y preferida a la sidre, que ye mas floxa, masque de mayor consumu ente la collación.

MISWA. Místicu/a. Dizse d’homes o muyeres separtaos del mundu la viesca qu’anden a la gueta idegales superiores. Suelen ser máxicos o morriñoses añosos o añoses, respeutívamente.

MORRIÑOSA. Castra namái de muyeres, que sirven al llau prietu del Gwell, calteniendo dellos poderes y maxes rellacionaes cola adivinación y les invocances a los dioses inferiores del abisu. Cuidense de toles ceremonies mortuories o que tienen que ver cola muerte, presente o futura, de la xente de la viesca,

MUEN-DOL. Ensin-Nome. ¿Quiciabes descendiente del pueblu Nean-Der? Lléase cuidadosamente la novela y saque la so propia definición. Los Muen-Dol, a diferencia de lo qu’avecen los homes de la viesca qu’amburen los calabres, sapócenlos.

NEAN-DER. Antigu y escaecíu pueblu qu’ocupó tola faza de la viesca d’Aucs-Ewam enantes que’l pueblu Kelt, y que caltuvo una cultura de la piedra y de metales non ferrosos. Fexeron grandes corripies de finxos y pegollos pela balse, con dioses propios rellacionaos cola fertilidá femenina. Desendolcaron les marques-de-fala. Desapaicieron na borrina del tiempu misteriosamente y la so alcordanza malpenes caltiense en dalgunos alcordorios, como nos de la castra de los Swarios

PORTALGU. Impuestu que cobraben soldaos recaldadores de tributos nos castros, por cuenta l’ayalguería del cabezaleru, a los comerciantes y viaxeros que queríen feriar en castru, o usar istalaciones del mesmu. D’aquella nun esistía l’IRPF, pero desplumaben a la xente igual de bien.

SUAÑU/SUEÑU La dixebra ye la siguiente: "sueñu" con "e" ye l’acontecimientu físicu, periodu de descansu que sigui a un periodu de xixilia, y "suañu" con "a" manifestación psiquica involuntaria qu’asocede dientru’l sueñu y de la que davezu nun se ye cosciente, salvo meyor opinión.

‘UD Ver KELT

WALLOL Ye’l cielu, por emplegar esti términu cristianu, de la xente Kelt de la viesca. Nél atópense los dioses y tolos mortales dignos de tar. Llugar onde nun falta comida nin bébora, onde los homes entamen una llucha eterna colos collacios, ensin muerte nin dolor, resucitando al atardecer los vencíos pa folgar y trebeyar de contino por puru placer. Nun falten les muyeres nin tolos antepasaos de toles castres de la viesca

WISKA-LECH, Lliteralmente, "Piedra de la Vida" Llábana de pizarra que suponse qu’arrecueye escaecides marques-de-fala de la vieya llingua Nean-Der que cunten ritos propiciatorios

Y COLORÍN COLORÓN,

ESTI CUENTU ACABO

Que vos preste