Armes Prydain Bychan
Llyfr Taliesin XLVII

Dygogan awen dygobryssyn.
Maranhed ameuued a hed genhyn.
A phennaeth ehalaeth a ffraeth vnbyn.
A gwedy dyhed anhed ym pop mehyn.
Seith meib o veli dyrchafyssyn.
Kaaswallawn alludd a chestudyn.
Diwed plo coll iago o tir prydyn.
Gwlat uerw dyderuyd hyt valaon.
Lluddedic eu hoelyon ym deithic eu hafwyn.
Gwlat wehyn vargotyon.
Kollawt kymry oll eu haelder.
Ynrygystlyned o pennaeth weisson.
Rydybyd llyminawc
A uyd gwr chwannawc
Y werescyn mon
A rewinyaw gwyned.
Oe heithaf oe pherued.
Oe dechreu oe diwed.
A chymryt y gwystlon.
Ystic y wyneb
Nyt estwg y neb
Na chymry na saesson.
Dydaw gwr o gwd
A wna kyfamrud.
A chat y gynhon.
Arall a dyfyd
Pellenawc y luyd
Llewenyd y vrython.