Mon livre (& je ne suis sur ton aise envieux)
Tu t'en iras sans moy voir la court de mon Prince.
He chetif que je suis, combien en gré je prinsse,
Qu'un heur pareil au tien fust permis à mes yeulx!

Là si quelqu'un vers toy se monstre gracieux,
Souhaitte luy qu'il vive heureux en sa province :
Mais si quelque malin obliquement te pince,
Souhaitte luy tes pleurs, & mon mal ennuieux.

Souhaitte luy encor’ qu'il face un long voyage,
Et bien qu'il ait de veüe elongné son mesnage,
Que son cueur, ou qu'il voise, y soit tousjours present :

Souhaitte qu'il vieillisse en longue servitude,
Qu'il n'esprouve à la fin que toute ingratitude,
Et qu'on mange son bien pendant qu'il est absent.