NAPUSACSAC NGA LINGSAT

Yuyeng ca ni ling-lingay, napnuan ca ti ayat
Agnanayon nga ragsac nga awan macaartap
Libnos mo ken pusacsac ken amin nga saguday
Kenca laeng LINGSAT innac naimatangan.

Adu metten dagiti luglugar nga innac nagtengan
Ballasiw ti taaw, maduma-duma nga ciudad
Babassit ken dadackel nga pagpagil-lian
Diac mabalin nga isucat ta pintas mo, LINGSAT nga nagasat.

Baybay nga calawaan dita laud mo
Nalinac man wenno naalluyo
Maduma-duma nga ic-ican, gur-guraman ken dadduma pay
Ranrantaen ti adu nga tattao, batoc-batoken da pay.

Amianan-daya ken abagatan mo, dua nga bantay
Timmacder da a prinsipe arig da tay sintenela
Nacasagana nga mangrungpir uray bagyo, gurruod ken kimat
LINGSAT nga ingunguten, agnanayon nga nalapsak.

Sapay coma ta awan to ti macaitured nga manggundaway
Mangdadael, mang-mancha ta libnos mo ken amin a saguday
Ta ti mangbucbukel ken mangtar-tarabay kenca LINGSAT
Dagiti tattao nga agnanaed ken sumangsangbay.

LINGSAT nga napusacsac, no sumken caniac ni liday
Iliw nga diac masbaalan ken luluac nga di agsarday
Gapu toy caadayoc kenca, LINGSAT nga ingunguten
Itured co latta amin, arapaap mo caniac matungpalen
Agsubli ac to kenca, urayennac, asidegen.
Caric kenca LINGSAT dican to lipaten.