文︰YY & Billdyke

早晨啊高山!!一早打開窗，清楚見到寧靜的高山市，遠遠的山上已經舖上薄薄的一層雪了!!好期待玩雪啊!!
食過早餐(今朝我決定要食西式早餐!!)，就開車去到附近的宮川朝市行下，搵呢個朝市真係搵到傻左，本來行路由酒店去，可能只係十幾分鐘路程，不過我地開車去，兜來兜去，就係搵唔到!!

結果要麻煩路經、踏單車的Obasan，婆婆真係超好人啊，我地向佢問路，雖然佢都唔多清楚，但就好耐心咁幫我地睇地圖，再教我地去，真係好多謝佢呀，祝Obasan身體健康，長命百歲!!
終於到左宮川朝市，其實個人就覺得無乜特別，係D公公婆婆擺地攤賣D自己種既蔬菜呀！工藝品呀咁囉！唔知點解有人會提議我地去？不過見識下都無妨，但提提大家，小店賣的飛驒牛肉串燒，實在不用試，貴兼唔好食!!@_@
不過有樣好似用蛋白造類似豆腐狀的甜品就*****推介啦！好味到想買番香港食呀！u-ma-i！！

逛完朝市，1045開車向白川鄉進發!!
沿途已經開始有飄雪了，仲好凍，路上的溫度顯示器打出黎的溫度，越前越低，得0度甚至-1度，山同樹都舖上雪，好似聖誕樹咁，好靚呀!!提早過聖誕!!

去到白川鄉喇!!白川鄉D合掌屋，未係好似靚靚postcard咁舖滿雪!!不過呢個地方好似世外桃園咁，真係好有特色!!
上到觀景亭!!雪開始越落越大，大到都分唔到係雨定雪，又濕又凍呀!!終於又買左把遮!!我地都凍到tyty震!!!

影張"到此一遊"後離開山頂觀景亭，都係落番下面好D！入左其中一間叫"和田家"的合掌屋參觀(每人300yen)，呢間係當年村長的家，己被聯合國列為"世界遺產"。入面真係好大，仲要分幾層，全部都係用木建，據講一粒釘都唔用，屋頂就全部係禾桿草，好厲害，果然係世界級文化遺產!!
雖然d屋而家絕大部分都無人住，但唔少都改為收錢俾人參觀，或者做生意，我地就入左一間小舖食天婦羅同松茸手打烏冬暖暖身!!嘻，食暖左見到人地食軟雪糕我又想食，結果暖完又凍過!!!哈哈哈!!

黃昏回程，我地順道去埋"屋台會館"同相連的"櫻山日光館"參觀。每年夏天高山市就會舉行屋台祭，當地人推著巨形屋台遊行，相當熱鬧。而日光館係依日光東照宮而建的模型，手工精細，在聲光效果襯托下很有氣氛。之後仲求左支簽 (係入錢跌出黎果d)，嘩哈哈，係大吉呀，嘩哈哈!!!晚餐在酒店食西餐，都係走唔甩飛驒牛扒，哈哈!!味道一般，賣相都唔錯!!