「開工咪『哈哈哈』囉！大家開開心心開工、收工，就係咁簡單……一齊開工好傾的耐了就會（疏）遠啦，咁多年來都化喇……
「每次我開工，我諗十次有八次都唔會有記者走過來跟我傾偈，只會話『方中信影相吧！』我就『好呀！』知唔知點解？ 因為我冇說話嘛。
「我憎唔憎做這行？憎又不覺得憎的，始終呢行係我的職業同興趣。舉個例，你未必鍾意同我做訪問，但你都要做，就好似這樣而已。」
聽完這類說話，的確會令人覺得方中信好難親近，無論對同事、對傳媒，還是對自己的職業，他都覺得幾無奈，給人幾不投入的感覺。不過這個人，又可以十幾年都仲有戲做，仲有一班唔算太多唔算太少的朋友。你話這種人，究竟又會有幾難接近？
 

對方中信而言，朋友來來去去離不開那幾位。合作做生意的是那幾個，一起潛水賽車的又是那幾個。雖然不太愛說話，但面對朋友，一場普通飯局可以由晚上七時吃到別人舖頭打烊。「其中有個朋友，佢老婆見佢成日三、四點都唔返屋企，以為佢去了那兒 ？於是個朋友帶埋佢老婆出來同我們一起吃飯，才知我們一班男人真係可以咁多話題傾！」方中信與朋友的相處，多少反映平時寡言的他，只因與其他人有「道不同」的感覺。

潛水 鯊魚仲驚過我
不過談起他的好友，又絕不能不提他們的共同嗜好。「鍾意玩潛水係成班朋友玩開，叫我去玩，那時我還未有牌，但他們捉了我去買了成萬元器材，我話我唔鍾意玩咪好唔抵！不過去玩了一次又覺得幾好玩喎。潛水會見到好多生物，平時冇可能會見得到。」於是方中信便開始興高采烈的談到浮台上的海鷗BB和深海的鯊魚。
「有一次出海潛水，見到有些海鷗BB在浮台上面，我們就奇怪點解會有海鷗BB？原來海鷗在浮台上生完蛋，之後飛走了，太陽就曬到隻蛋孵化，所以咪有隻海鷗BB囉！這些也是問人才知道的呢！又好似我們見到鯊魚，通常有六、七呎長，就好開心，唔會驚，因為牠仲驚過你！」他說最瘋狂的時候，一年會去足八次潛水，次次出埠，一去五、六日。就算最近「好耐冇去」，都只不過是「都有兩個月喇」！

賽車 係撞的扶實都有用
至於賽車，不用說也是一班朋友的共同嗜好。不過人人以為危險的賽車，在他眼中卻原來頗安全。「意外會有，但不是咁大問題，其實潛水受傷的機會同危險性仲大過賽車。」他承認「唔驚」的首要條件必要是自己駕車。
但有趣的是，在他好像太信任別人的駕車技術時，卻又承認只要坐在乘客位，就只好信任別人，要怕亦怕不來。「有一次我試車，我開一百（車速）『片』了個細彎，坐我那位的反應是緊握扶手、用腳頂住、側晒身。我一睇，覺得好得意，可見那個人對我的信心有幾多！其實要撞車，你扶到實一實都係冇用的！」

女人 得閒先一齊玩囉
連坐他車的乘客，亦需要對方對自己投信任票，可想而知，做他枕邊人的首要條件，也是要對他絕對信任，給予他最大的空間。「空間好緊要，最好甚麼也不要理我。」也許對他而言，無論駕車還是與女友相處，信任對方是最重要的。
他與女友的生活，一直都好「獨立」。例如問他會否帶女友與老友一起玩時，他答得懶懶的：「得閒囉……真係得閒囉！就好似佢都有朋友，他們都未必鍾意同我玩?！大家有多些空間會好些的！」女友不但止不可理他，更不能給機會傳媒理他。「唔好咁張揚……因為太公開，好咪『哈哈』囉，唔好咪……」

事業 識做人我做影帝啦
對他而言，與傳媒由始至終都存有距離。「老實講，一來我又冇新聞價值，二來我都唔想（同傳媒）咁坦誠相對……」因為從不主動與傳媒打交道，所以方中信認為自己十多年來都「有戲拍」，是因為「好運」。
「好多演員都識做戲，但有好多演員已經轉了行。好運囉！我覺得自己講說話又唔夠得體，人唔係好Social，又唔係好識同傳媒打關係……」雖然不願意，但為了自己的事業，仍會主動與別人溝通。「我會睇對手做戲的，睇睇點接波、點交波，最重要係同對手要溝通。對住些唔鍾意的、溝通唔到的，影帝都打八折啦！」
對於有些演員可以對住自己討厭的人做戲，他的反應絕對是記者意料之內：「我唔得囉，如果唔係我成功過依家啦！」

未試過飲可樂飲到咁忐忑！
一直以來，直覺上會覺得方中信與劉青雲、黃秋生好相似，相似的是那種……唔知點講的感覺，好似話……他們的角色可以交換演啦、青雲秋生的角色都?方中信做啦……那種！
講俾方中信聽，他的反應先係笑一笑，之後輕輕咁話：「好多謝囉，你有這樣的感覺，好多謝囉！（點解先？）他們咁好戲……請你飲多罐可樂啦！」之後就跳過水吧，走去拿了罐可樂俾我飲。
佢呢個反應，當堂令我諗了好多，究竟佢係咪以為我乙水佢？定係佢覺得我講大話呢？他的多謝係「真多謝」定係「假多謝」？佢冇理由覺得我咁講係踩佢嘛？我真係咁覺得嘛……
呢罐可樂，令我飲得有些忐忑不安。
 

東周刊    第365期    21/10/99