HAPPY亞ｂ既介紹
HAPPY
我係亞ｂ，我係主人小丸子屋企住左四年了。我好叻，點叻？我可以做到好多常狗做唔到既野。好似呢個扮死屍、訓覺有鼻杭聲等等…。好多狗都未必做得到。所以話我有幾掂。哈哈！講下我ｄ同類先，然後，先再介紹我小ｂ喇！
大家知唔知我地英文名叫乜先？係Shiz Tzu，所以好多人叫我地西施狗，我地仲有好多個名，例如：中國獅子狗、菊花狗等等…。我地既祖先係係中國出世，我地個時(大約一千年前)已經俾皇室入面ｄ人養，所以，我地好珍貴。我地既特點係個頭係以眼同鼻為中心向四周延伸既長毛，就好似開緊既菊花咁靚。我地四肢比較短，而面部既表情好Cute，總之見到我地你會情不自禁錫我地。而我地平均重量係4.5-8公斤，而高度唔超過27cm。
大家係咪有ｄ心動，想帶我地返屋企，好！等我小ｂ帶你點樣揀我ｄ同類。
| 毛色 | 以白、黑、金黃色為最好，另外，仲有ｄ咖啡、棕、米同埋灰色。我地頭部中央同尾端既毛色係白色，呢ｄ係我地既註冊商標黎。 |
| 眼 | 呈大圓形，明亮有神，冇神個ｄ肯定俾人打左針喇！ |
| 耳 | 耳朵要下垂，有長而密既毛毛。 |
| 鼻 | 鼻要呈黑色，多數要白色鼻樑。 |
| 口同牙齒 | 咀唇要黑色，下牙包上牙，下牙外露。 |
| 四肢 | 四肢要短小。 |
飼養西施事項
| 食物 | 小西施要每日餵三次，用開水將食物泡開，加入少許動物內臟。當然，如果你係一個懶惰既主人可以去超級市場買些幼犬罐頭都可以。至於大西施一日食兩餐，可以加入肉類等。此外可以餵ｄ脫脂奶，但當然唔好太涷，否則會肚瀉。 |
| 訓覺地方 | 小西施可以訓係紙盒、木盒或者狗鋪買間屋仔都可以，個竇口可以擺係房既角落，竇口入面放毛巾，等狗狗可以舒服訓覺。 |
| 健康 | 夏天最易有皮膚病，所以要用藥物浴液幫狗狗沖涼，大約一星期一至兩次。但係一定要沖得乾淨，否則因刺激皮膚而發炎，而且ｄ水唔好入耳仔，否則發炎。而狗狗進食後要抹乾淨個咀，同佢跑步完後要同佢抹腳同肛門，否則可以入菌，而得閒就同佢地掃下毛，等ｄ毛唔容易有狗蝨。 |
| 訓練 | 訓練小西施去廁所，可以係廁所放ｄ報紙，當佢有想去廁所既表現時，要帶去去廁所，等佢自己知邊度去，不過呢個方法，我亞ｂ係要一個月先得，仲要經過主人不斷訓練同打先培養到，所以，做主人要俾ｄ耐性。其實狗鋪有ｄ專教狗去廁所既噴劑，個ｄ味道可以讓狗狗知邊度去廁所。此外，亦訓練狗狗基本指令，如：手手、唔好嘈等等。我亞ｂ可以做到俾手手、執波波、反肚等…。 |
點呀，係咪覺得好煩，好多工夫？其實唔多，照顧一個ｂｂ仲麻煩，係咪？
有問題，可以問我主人小丸子，好！應承過介紹我自己俾大家認識。
我個名叫Happy，不過冇人再叫我呢個名，因為，叫下叫下已經變成亞ｂ，仲有我又叫小寶寶、小吱、吱吱、Mum
Mum吱，全部咁樣叫我，我都有反應架。我既生日係大一月七日，個個生日我都有生日禮物架。
我今年四歲，係勝利道某狗鋪俾主人個媽媽買回來，我個身世幾慘，我細細個ｄ同類已經唔理我，唔知係咪因為我較蠢，唔識埋堆。所以，我細個好自閉，直至媽媽出現，我既生命先有變化。我而家唔自閉，好鍾意同人玩，不過睇下ｄ乜人先，樣衰既我唔蘇佢架。而且，唔知係咪因為ｄ同類咁對我，我而家好高竇，唔係隻隻狗狗我都可以同佢做朋友，我而家最好既朋友係大熊人，係主人買俾我。
我最叻做既野係訓覺(可以隨時隨地訓)、食野，乜都食，包括：雪糕、蔬菜、肉類，仲有狗既零食等…。我最憎既野係主人去街唔理我、肚餓、俾哥哥嚇、冇冷氣吹、行雷等…。
好，俾ｄ玉照你地睇，不過唔好打我主意，因為我梳起唔嫁架！不過做朋友充無妨。
我個朋友亞Barbie，左面個隻，佢同我同類，不過際遇唔同，我幸福過佢，因為，佢日日俾人鎖起個籠度。我亞ｂ咁大個女都未試過係籠入面生活。
我好朋友狐狸先生同我主人個爸爸—劉先生
聖誕節映，為左慶祝，我仲帶了一朵黃菊花。