ALINA PARIS

Maizina sady mangatsiaka ny amin' ny enina ririnina
Ora firavan' ny mpiasa
Mihaohao ery ny mpandeha, tototra fiara ny araba
Alina ririnina mitabataba
Jiro an' alin-kisa maro, fotsy mena, ny hafa koa
An-dàlana, an-trano, hatreny amoron-drano
'Zay rehetra mba haleha, na magazay na kafe
Toa foara avokoa etsy sy eroa...

alina Paris ! Alina Paris ! Mihira ny fitia !
Fitia tsy mety maty, miaina ao anaty
Fitiavana 'lay tany niaviana, 
Tanindrazana malala tena tiana...
Embonembona sy vetsovetsom-po
'Ndray mitraotra ho azy avokoa
Anivony mamiratra ny taniko, no laniko
Tsy manam-paharoa, hafa mbola hafa,
Mamy tena mbola mamy...
Alina Paris ! Alina Paris ! mihira ny fitia !

Na alina sady mangatsiaka, ny toerana malaza dia sariaka...
Toa fety lava miravaka hazavana,
Saint-Germain na Champs Elysées, Pigalle
Sy ny hafa be dia be, mifanjevo samy revo mikorana
Matetika an-dalan' eny hitanao, mpihira na mpandihy milalao,
Arahin' ny gitara na koa ny agorodao,
'Reo mpifakantia moa, mahazatra anao tokoa
Fa mifanorokoroka etsy sy eroa
Alina Paris !...


Ny Railovy
J. Randria , 1975