AO AVARA-TANANA


Ao avara-tanàna no misy kamory
Nilaozan-tsiriry ka tonga oriory
Tsy ady tsy inona ka dia nilefa
Sao dia ho neninao izany rehefa

Nahita ny rano tambiazana angaha
Sa mbola haitraitra na te hizahazaha
No tonga nadao anie ilay farihy nahatamana
Ka lasa nirintona sady tsy tana

Ny ela nitoerana ve nankaloy
Sa ela ny ela ka naha iray rohy
Ry voro-nilefa tsy noho ny ankaso
Tandremo fa sao mifihi-dranomaso

Veloma ry vorona lasa nilefa
Masina indrindra kanefa
Ny soa nifanaovana aza adinoina
Ny tsara efa vita aza lotolotoina


Naka RABEMANANTSOA