ERITRERITRA


Raha sendrasendra miampita ny eritreritrao
Hitodika ny lasa hisaina izay atao
Ary indro fa tsaroana ao an-doha
'Lay lālana nizoran'ny fitiavanao taloha

Raha sendra misy sento kely toa tsinahinahy
Izay mitaraina anarana mitovy amin'ny ahy
Miala avy ao am-ponao manirery te-hivoaka
Eo amin'ireo molotrao roa izay toa tsy sahy miloaka

Raha sendra misy ho'aho sento kely toy izany
Dia aza tanana izy f'avelao handeha hatrany
Vao mainka koa hitombo ny fangirifirinao
Raha toa tsy alefanao izy fa fihininao ao

Dia aza asiana resaka na mba arahan-teny
Fa alefaso mora toy ny fofonainao ihany
Omeo veloma batsaka tsy hisy fanindroany
Sento diso vala anie izany ka aza misy toy intsony

Ny sentonao dia ho entin'ilay rivotry ny lanitra
Hidona ao an-tsofina toa feo avy any lavitra
Indrisy anefa fa ny akony izay tena ory
Tsy mahay manaitra intsony ilay fitiavana efa matory

Raha fitia natao vola
'Zaho anie tsy hahavatra
Ny vola be dia vetivety d'indro indray hiratra
Ny neninao sy ianao no aoka sisa hifampitafa
Izaho sy ny fitiavana efa tojo any an-kafa


Andrianary RATIANARIVO