FITIAVANA  MOANA


Tia azy izany foko, eny tia
Nefa kosa ho tereko mba hangina
Raha ny handrafy olon-tiana, sanatria
Fandeferana no manda nofidiana

Raiki-po tamin'ny olona tsy manina
Niomankomana ny hamandrika tsiriry
Kanjo tojo 'tony ady mahafanina
Ny fanahy foana re no mangirifiry

Tsy maninona eny hoy aho Ranivoaly
Ny hisompatra dia zavatra tsy haiko
Izao no zavatra ho kendreko ho idealy
Ny adidiko aminao, io no tontosaiko

Ny kapoaka atolotrao dia ho sotroiko
Na mangeroka aza dia zakaiko ihany
F'ilay fitia 'zay tsy mivaly ho vonoiko
Ho vonoiko tsy hitrebona eto an-tany


Andrianary RATIANARIVO