MAHAIZA  MANETSA  RAVALY

Eny Ravaly, hafa ny omaly
Mahaiza manetsa Ravaly
Fa hafa ny anio sy ny omaly
Miesora raha sarotra atoro
Ny ketsa aza asavorovoro
Ny efa naniry navotana
Ny vao nambolena nongotana
Aoka aza ataonao fanao
Fa fanahin-jaza ny anao
Eny Ravaly, hafa ny omaly
Mahaiza manetsa Ravaly
Fa hafa ny anio sy ny omaly
Aoka Ravaly, aza mamaly
Mahaiza manetsa Ravaly
Fa hafa ny anio sy ny omaly
Isika tsy manambitamby
Ka asan'izay mampitamby
Isika tsy vonon-kiady
Kanefa raha misy mitady
Rehefa hifanao ankaso
Isika tsy mikoso-maso
Eny Ravaly, aza mamaly
Mahaiza manetsa Ravaly
Fa hafa ny anio sy ny omaly
Isika Ravaly, maintimolaly
Mahaiza manetsa Ravaly
Fa hafa ny anio sy ny omaly
Isika tsy mamerin'asa
Ny lasa dia homba ny lasa
Tsy rehaka izany na hambo
Fa manana isika tsy tambo
Ny masaka feno vilany
Ny manta mitoby tsy lany
Eny Ravaly, hafa ny omaly
Mahaiza manetsa Ravaly
Fa hafa ny anio sy ny omaly

Andrianary RATIANARIVO