NY FIAINANA LASA


Iniavina foana, hodian-tsy tsaroana
Ny lāla-nodiavina mahatsiravina
Kanefa ny vita na ahoana na ahoana
Tahiry mipetraka tsy azo soloana

Ny efa nafafy tsy maintsy jinjaina
Ny efa nitrosa tsy afaka maina
Tsy maty tsy akory, fa mbola matory
Ka mbola hifoha ny andro taloha

Ny fiainana lasa tarafina tsara
Tsy levona ireny fa vita tantara
Karazan'aretina mbola mitaiza
Takaitra manaraka hatraiza hatraiza


Andrianary RATIANARIVO