SAKAFO MENDRIKA   

         Mba fantatro ve ramatoa
         Fa ny fahaiza-mahandro koa
         Ilaina aminao mana-tokantrano
         Ka amboamboary fa aza kamo
         
         Hitadiavo hevitra miaingitraingitra
         Ny atody, ny anana sy vinaingitra
         Ampiasao mba hanana endrika
         Sy hanamboary sakafo mendrika
         
         Aza hadinoina ny nentin-drazana
         Amboary tsara fa be karazana
         Toy ny hena ritra sy ny lasary
         Maro mpitia raha hinanam-bary.
         
         Rehefa avy vizana mikorana
         Ny vary amin'anana atao mafana
         Raha toa ravitoto no atao matetika
         Asio trafon-kena voatetitetika
         Ny trondro gasy sy tavin-kena
         Endaso tsara ho menamena
         Asio tongolo sy dipoavatra
         Handramo kely fa tena zavatra
         
         Fatratra koa ny taolam-pifika
         Kanefa ny nify no sao dia mipika
         Ity anefa no hiadiko varotra
         Kendreo ny sira fa tena zavatra.
         
         Rehefa mivelatra ny latabatra
         Avelao ho hita indray mitambatra
         Ny tsiro, ny hanitra sy ny endrika
         F'izay no atao hoe sakafo mendrika
         
         Jeanne Naly - Fara