VETSO  MAMATON'ALINA


Nahoana kosa hono itony alina
No toa mamohafoha ny fitiavana
Izay miafin'any amin'ny lalina
Tsy hita avangavana

Mitepotepo mafy izany foko izany
Mangitakitaka
Mangitakitam-pijaliana
Ny saiko verivery sy lasana vinany
Manembona manimanina 'lay olon-tiana

Raha vao noseraniny monja
Dia taitra ny foko e nanonja
Ny foko dia babon'ny fony
Ka tsy afa-mivadika intsony


Andrianary RATIANARIVO