ZAZAVAVY

Anisan'ny zavatra manahirana
Mahazo ny sain' ny tovovavy
Na tokony ho lavina, na hidirana
Raha misy mangataka sy miangavy
Satria raha ho lavina
Sao hanenenana
Ekena avy hatrany toa misy tsininy
Tsara ho kendrena ny fitenenana
Fa tsy vita mora ny andinindininy
Tandremana koa ny maika loatra
Sao dia matahotra ho Iany zara
Manaiky lembenana tafahoatra
Mitady hampandroso ny tsy anjara
Misy dia misy ny maika hanana
Tsy mievitra akory izay hifaranana
Kanjo ilay ravina izay nihinanana
Tsy nahalazo akory dia noravana
Lasa nilefa ilay olon-tiana
Ny tena tsy afa-dratsiana
Ny ray aman-dreny fadiranovana
Mijaly eritreritra sy torovana
Ny taonan'ny zaza no afenimpeniny
Kanefa efa hitovy amin-dreniny
Tahak'izay re nekena na lasa
Toa nenina sisa mandatsa
Mafy ê! ny mitaiza zazavavy
Fa takona mantsy ny ho avy
Tandremo ny fatra-pifidy koa
Rehefa tara loatra dia mahavoa
Aza mitady izay fanaperena
Ny vitana mantsy dia indray miserana
Nahoana no antitra am-pijoroana
Ireo kirikiriana tsy hay toroana
Tsy ho avy intsony ireo tanora
Fa ny maty vady no hijaiko mora
Ekeo ihany na antitra aza
Tsy aleo mandray ve ny zaza

Naly