2004/07/15
月血來潮,心血也來潮,突然想執下自己網頁,覺得好似好麻煩,就決定更新一下個日記
呢幾日打三國志十,發覺左弓箭兵係最強果系.當然都需要d步兵同騎兵做肉盾
但發現,呢代d電腦好斯斯縮縮,部份人成日唔敢打埋身,用黃忠,連續火箭射埋去,簡直係屈
另外,用兩隊兵,就算係弓箭手打步兵都唔緊要.只要圍住用一齊,幫手隊兵好多時完全唔駛扣
主動果隊好多時扣極都唔夠500兵,但已經滅左人幾千,真係屈
同埋呢代,只要狂屈落穴,伏兵同誘導,只要你誘導者同被誘者智力差夠大,完全可以不費一兵一卒打贏一場仗,一座城

琴日見過為叔,原來只係普通小朋友一個.見佢平時串柒柒咁,仲以為佢係好旺角,懶得戚果d死o靚仔黎
果日日頭帶佢去信和同童年夢買書,去左旺電同百老匯之類幫佢個姨睇LCD芒,再去過幾間CD鋪.果晚食左一直想試既易牙妙手,佢叫左個排骨麵,估唔到係真係排骨,望落唔錯,下次我或者都會試.我就叫左個魯肉飯,一般,肉同汁都太少了,忽!仲叫左個炸拼盤,裡面有雞翼,腐皮卷,粟米海鮮(只得蟹柳...)卷,貢丸每樣各兩件,另有十數塊好細粒既炸豆腐.由於當晚好似好熱氣,牙肉又有潰瘍,豆腐我只係食左一粒就算,其他野當然都有食晒.總括黎講都幾好味下,不過下次睇落可以叫d更加抵食既野.
食完,同為叔過左隔離許留山,佢叫左杯乜野芒果乜西,個名幾核突下的...
我就叫左個椰汁龜苓爽.非常唔錯,濃厚既椰子汁,令d龜苓膏碎完全唔苦
缺點係,d龜苓膏碎太少了,唔似佢sample幅相,真可惜.而且飲到咁上下,有一層白色既類似冰既野響裡面,由於唔知係乜黎,唔敢飲,果d古怪野就廢事飲埋了
食完飯行左間cd鋪,見到隻最後武士DVD,為叔突然話"條女好正喎,我響戲院睇,睇到我黎晒料",佢黎晒料呢個口頭禪太不雅了,特別響呢個場合,仲要講條女,竟然用黎晒料呢個詞,勁驚俾人誤會,雖然主力都係誤會佢...
跟住睇一陣,見到我一直想買既Classic Fantasy賣$99,好似好平,頗想買下,但由於得番一隻,有少少驚唔知會唔會係二手之類,就無買到.跟住去下一間鋪,見到隻Classic Fantasy只係賣$80...仲要有兩盒可以揀,睇真d應該唔係二手,就揀左盒無咁污糟既了. 3CD,每隻碟30蚊都唔駛,抵到爛啦.買完走果陣,突然個防盜bibibi我,勁驚,突然三四個店員圍住我,叫我唔駛驚(咁又做乜咁多人圍我...),話佢地唔記得幫我消磁唧,我即時拎番張單同隻碟俾店員,佢地扯番條濕鳩bar code走,俾番張單同盒野我,為叔睇到依依不捨,我陪佢睇多半分鐘,有少少頂唔順,就扯埋佢離開了