小小軼事 p(^.^)q

10.11.2003 mon 04:21pm 冬天來了!

我寫緊個故仔，女主角就係叫「樂皚雲」，
真係唔好意思....嘿嘿。

之前睇到有篇新聞話友愛�h高空擲磨刀石傷到個細路女，
(*磨刀石*真係痴x線)
作為前友愛�h住戶都感到非常氣憤，
早在我住在個條�h個陣，
單是我親眼看見的高空擲物，
就已經有衛生巾、紙包飲品、牛奶樽(玻璃)，
甚至見到有人小便(將xx放在窗框外進行)，
唔係講笑，所以今次磨刀石事件只不過令我憶起當年事而已，
我明白做得出以上動作都應是精神有問題的，
可是，這些傷害到人的事，
還是早早阻止好吧，
不過我現在都不太常在那裡出沒，
每次到那裡都小心翼翼的，
陰影哪，豈敢輕舉妄動，
希望大家高空擲物前都想想大家的安危吧。

呆子現在睡在我的床上，咕咕聲，
哈哈，希望他盡快搞掂他的電腦吧，
你咁叻，一定好快搞掂的。

我偷偷地像索柏般看著呆子，
很感謝你能在人海之中找到了我。

10.11.2003 mon 12:59am 著多件衫仔呀!

原本想大修個 page，
但係睇完王貽興的homepage之後，
就失去興致了...哈哈。
王貽興是我近期非常非常喜愛的作家，
我想我是在閱讀上愛上他了，
讀他的文章是一種享受，
而且，唔知點解，次次睇親佢的文，
我都會諗起「十面埋伏」呢首歌，
好有mood。

今日係義工表演日，好好玩，
基本上都係去玩，
表演個陣雖然有d學員失控，
但係其實呢d先係搞笑的地方。
呀，我做緊的義工係和一些弱智人仕玩，
他們都是被忽略的一群，
雖然他們是殘疾人士，
可是他們都很善良呀。
其實做咁耐義工都學到好多野的。

在等待出場的時候，我又埋chole身，
問下有關社工的事，
她告訴我，就算係dip.，都要讀兩年起碼，
而且*社工係要註冊的*.....p@__________@q
o my god，我被恨恨地摒棄在這個世界之外，
掉進懸崖，直插谷底。

在我們同行的一組義工當中，
有一個只有12歲的小妹妹，
個名叫"樂皚芸"，好聽到不得了，
如果叫"樂皚雲"仲好聽，
不過......當佢叫我陪佢去玩的時候，
我感覺到相隔於我們之間那十年的洪溝。

讀過王貽興的日記，
我發現自己的日記其實好表面，
完全不能夠發人深省，
不過，睇住黎，我唔會咁樣落去...哈哈哈。

功課密密來，但係見到沙田新城市的聖誕樹，
就非常有幹勁的繼續努力。
我要的是生活，而不是為了飽肚而食，
為了金錢而工作的機械人。
所以，我和珮吃晚飯的時候就要多了一客香蕉船。

一客香蕉船就能令我感到*生活*，多簡單。

02.11.2003 sun 11:24pm

剛知道的事又可以讓我跌蕩好一陣子。

昨天zoe來我家拍 private box，
又再一次翻箱倒篋，
找回了很多東西，好好笑，
而且當時的心情也給掏了出來，
中學時的我對自己的目標是多麼的明確?
想什麼做什麼要什麼，
現在的我究竟怎麼了?
好吧，來要殺便殺，
我承認係我自己的心態問題，
同埋個種以為匿在過去青蔥歲月就乜都唔使理的諗法，
不過，我唔知點樣出返黎，
「你算吧啦。」

今日義工日，下星期就表演了，
(拿大家有時間就下星期日下午去樂富個商場睇下投下票啦)
社工chole就話想請part-time社會福利員，
我眼睛一亮，立即舉手要做，
之前我點搵都搵唔到，
而家有機會接觸下緊係唔錯!
當係做唔到社工的心靈補償都好。
至少，在我做義工個陣，
我感到我的人生有意義，
而不是只有一直困擾著我的問題。

說到這個問題，近日的情緒又向下滑，
雖說我已經忍了多年，
但我一直都冇出聲，
今次一出聲，就比人話，
人大了就反叛了，又駁咀了，
我聽罷又只能不作聲，
默默地吞了下來。
真的不明白，要反早就反了，
難道到了廿幾歲人講多幾句就叫反叛?

我好想有個窗比我攀出去，
而不是呆呆的待在這個密室�堙C
反正我都預左要靠自己而不能依靠任何一個
去逃離這個充滿藤蔓的小斗室。

27.10.2003 mon 1:58pm

星期六永遠都係最寂寞的一晚...
哈哈哈，所以我地g4就上左阿聯度睇波同埋玩，
都好耐冇試過了，又過夜，
我在阿聯屋企發現左個磅，
等我自己靜雞雞匿埋磅個陣，
嚇到叫左出黎，到左第二日，
我在樓下買左個呼拉圈....

近期微涼的秋，感覺好歲月，
尤見身邊朋友出來做事，
我就會諗我將來都會係咁，
我又會做咩工呢?好似都冇咩工特別想做，
剩係覺得，如果可以突破到某d框框，
都未嘗係一件壞事。
我都有諗過，做教師，做社工，
但係我讀緊的係media呀，
media，我又可以做乜呢，
搵到一份冇壓力又開心的工真係好難。

唔知點解近排好冇安全感，
在任何一方面都是。

我開唔到阿聯個page好唔開心呀，
阿其踢超聯加油呀，
阿菊可以快d搞掂d project，
阿珮可以寓工作於娛樂，
阿茶可以做返入面唔使抄簿，
阿聯就快d搵到好工啦!!
其他同學仔fyp、功課都要比心機呀。

呆子就....贏多d錢然後帶我去食好野! =)

20.10.2003 mon 2:45pm

有蚊咬，好癢。

昨晚因為邊做scriptwriting邊諗到野寫日記，
所以就好快咁寫左一d感想，
今日再睇返，我原來都係一個未長大，
同埋一個拒絕長大的死靚妹。
哈，我為我的孩子氣冷笑一聲。

睇到阿菊話我地冇人update日記會覺得失落，
我就立刻想到要寫了，近期真的懶了點，
一定是轉天氣的關係，我才會這麼渴睡。
呢幾日要趕四份功課，有一份星期五已交，
然後由今日至星期三一日一份，
當然，今日交的我已經做了，
我真係一個乖巧的死靚妹。哈哈。
上次post的故事，雖然很多人也說不錯，
可是譚家明卻不太滿意，
認為我那個故事只是一個文案，
我的結局對他來說只是剛開始而已。
我要努力!

呢幾日和呆子嘈了一嘈，
很汗顏的在我發哂癲的時候，
他也可以冷靜地叫我「冷靜d」p_____p
呢d唔通就係白羊座同埋水瓶座的分別?
好可怕，我呢，有乜就辟辟拍拍講哂出黎先，
即係得個嘈字，而水瓶座的他則會在我嘈的時候唔多出聲，
然後待我嘈完了，知道錯了，才一針一針的吉入來，
智慧型果然同我呢d衝動型唔同，輸哂。
不過我都只不過會進一步覺得，自己的缺點已經去到不值一提的地步。
從中學開始我就同自己講，我要做一個好人，
一個不會落後，開通，關懷別人，有愛心，令人開心的好人。
可是....似乎距離目標還很遠。
現在大家看不到我這樣的一面不要緊，
我會努力成為那樣的人的，
不過，到時呆子可能已經等不及，
找別人結婚去了，
他看到這裡，一定又會話我智障，
然後又摸摸我的頭。

我都係對文字比較坦白。
呵呵呵，天涼了，穿多衣呀。^o^

20.10.2003 mon 12:41am connie 生日快樂!好耐冇見啦!

我明白冇可能全部人都可以了解明白我，
但當別人這樣睇自己的時候，
那種好像被屈的感覺，那種心中的苦，
又有誰人可以明白呢?
我知道可能有時也會有一些不好的性格為外人道，
可是，同我講，我會知道，我會改，
而不是這樣莫名其妙呀!
有好些的還是在我檢討後，
我會想:「我是這樣的人嗎?」
心�媟t暗吃驚之餘，
為自己給人這樣的印象而悲哀。
點解呢?點解呢?
我會這樣問自己。

10.10.2003 sat 02:08am 大家澳門行快樂!!

這個星期沒有特別的事，
都是上學做功課拍野，
每天都很累，所以發呆的時間就多了。
這個星期交了一個故事，
用了阿微、阿輝和阿茶的名字作為故事主角，
之前那些是真實故事，所以我就不post出來了，
今次這個是虛構的，
所以就post出來讓大家看看，
故事中的主角我是以阿sa和孫耀威的性格做藍本，
寫的時候我又不斷播許志安的"時差"，
大家看的時候可以作為一點reference。
有些人說故事多少會流露作者的內心世界，
呵呵呵，看倌們看到什麼，就是什麼樣的我了。

#--我要睇故仔--#

呆子開心時與誰分享也好，
我只希望他不開心的時候會第一個想起我。

05.10.2003 sun 12:54am lego人與她的朋友們@歲月如歌

G4古怪嗎?我不知道，我只知道我們臭味相投。
930那天我們又再聚了，G4和A4，
每次聚的時間不長，但總是嘻嘻哈哈，
雖然我總是被人話是最嘈的一個，
但，我在此告訴大家，我平時係唔會咁嘈的，
和你們一起時的嘈我想多了三四倍左右，
當然耍白痴的次數應該相對地少，
因為我唔想比人「圍」，哈哈哈。
希望珮喜歡那些禮物啦，
想來妳知道我大頭蝦，
自妳告訴我生日禮物要nana的一天起，
我便每天默念十次「阿珮要nana除了第八期」，
直至菊再約我們的時候，我第一時間便和菊講「nana呀」，
驚死冇人會記得咁，
不過，當然，阿菊的記性比我好，
所以這個情況就絕對不會發生。
當晚在bigibigi食日本野，
我其實覺得hilton的出現係好美妙的，
就著一個電影角度來說，
我們眼角不停地望著「吃不完一碟五蚊」牌子的時候，
hilton的出現令我們巴不得把已放在口中的食物全吐出來，
衛生情況雖然可怖，但無他，
我們叫得太多了，又食唔哂，所以...呵呵呵，
果然不到多少時間，hilton已經食哂，仲多叫了一個三文魚手卷，
非常dramatic，所以，我今次一定要記低佢。^o^

之後我們去了七仔買雪條，
坐了在市中心某個位置談近況，
大家談呀談，才突然醒起，
下年就只有我還在讀書了，
時間走得真快，而且大家已經談結婚這些話題了，
在談笑間我有個幻覺，都只看到大家穿著譚記的校服，
都幾搞笑。
知道大家的近況，談不上很了解，
但希望大家都快樂，做到自己想做的事。

前個排同chris傾左次偈，
講開「我係唔係真係咁」呢個問題，
其實講真，我諗我做完兩個月intern之後，
有d諗法真係唔同左，
chris話我用一種退一步的想法做事，
完全唔似我，不過其實都幾係我丫。
睇返中五的同學錄，我個陣寫的志願係---
做音樂教師，個陣仲唔知同邊個講，
我要帶領一支小學合唱團橫掃全香港拎冠軍，
咁我而家呢?我做緊乜野?p___________p

見大家許願，我又要玩。
1. 家人朋友和呆子都要身體健康。
2. G4和A4各自找到自己所愛。
3. 有一次機會去到台灣 exchange。
4. 搵到份做得開心又穩定的工作。
5. 和呆子開開心心就好。
6. 開心的事就寫下來，不開心的事就埋進內心深處好了。
7. 成日笑，唔可以令到朋友擔心自己。
8. 各人的願望成真。
9. 自己的願望成真。

「祝我幸福快樂，我愛過每一個，
請保祐我。」^o^

30.09.2003 tue 03:17am 珮大人生日快樂!!!=)

今次想講下我對足球的睇法。

其實大家熟我都知道，
我睇波，但係我唔會記得d人既名，
因為在我角度而言，我剩係睇住d人點扭，點射，點傳，
已經覺得好好睇，我會認得邊d人踢咩位置，
但係我又唔會有心記得佢個名，
我唔算對足球好狂熱，
但係記得的就會記得，
唔記得的就會當係波一場黎睇，
所以，我都覺得自己唔識睇波，
但係我自得其樂。
或者我都係適合自己一個睇波的人，
免得好似阻住人咁。

surprise today 那張相，
我係由timmy page度copy過來的，
加埋timmy的旁述，我覺得好好笑，
同埋，liverpool輸左。

其實我不喜歡在我的日記�媮羲i，
因為我覺得我唔識睇，
自然就唔識寫，
但係昨天liverpool輸左，
我唔服。

就是這樣，下不違例。

21.09.2003 sun 07:30pm 事情不應該是這樣的。

這兩天都是勞動日，
昨天走了去馬路邊拍功課，
由中午一點幾拍到黃昏五點幾，
太陽好猛烈，曬到兩隻手臂都黑哂，
不過好彩係昨天去拍，如果唔係今日咁大雨，
諗落都狼狽死。

大致上我覺得自己的productivity都唔錯，
今晚寫埋個scriptwrite就有覺好訓了。
其實咁樣做做做做做，
都唔係唔好丫，最緊要有得比我訓，
不過今天去唔到義工個度，
個心掛掛咁...p___p

week 4來了，
我要繼續努力，振作!振作!

19.09.2003 fri 10:30pm

究竟點做先可以令自己開心起來呢?

好累，坐在廳睇電視(因為套野講社工所以諗住睇下)，
都訓得著...平時呢個時間的我，
都係一個活蹦亂跳的小寶寶，
經過一星期的勞動，我已經累得不似人形，
只係剛過了week 3，咋。

works NEED to do in weekend---
assignment
-scriptwriting (character)
-moving image shootingDONE
reading
-Art Admin. (Hong Kong Culture)DONE
part time
-cue dv to masterDONE
-copy n pieces from masterDONE

works WANT to do in weekend---
-sleepingDONE
-reading new comics
-gathering with friends

but i only have 48 hours...

呀，謝謝嘉盈的心意卡，
我在信箱收到的時候是多麼的感動，
謝謝，謝謝，謝謝，
不過我想說，我們今年是十周年呀!!

近日同呆子意見上有好多分歧，
argue多了，自然就不開心，
我都知道呆子做緊的事都是為我而做，
但係我仍然要求多多，
唔知自己想點，唔知道自己唔想點，
希望呆子原諒我的煩躁，
明白我的傻其實只不過，
只有我活在自己傻氣�堛漁伬唌A
我才覺得我還是我。

我真係覺得，再係咁落去，
我會抑鬱症。

14.09.2003 sun 09:05pm

之前的日記好像寫了些不太人道的說話，
所以被我刪改了，看完chris的message再看自己寫的話，
真的好像被我寫到exchange的人都是為了出名而去，
很不妥，所以被我刪掉了，>__________<
真的對不起，怪只怪我沒有留意自己的措詞，
而自私的只想把自己的想法表達出來，
真的對不起...p_____p

今天做完義工之後和大伙去唱k，
一邊聽著唱一邊很感慨，
想當年我和聯權都是合唱團的一份子，
基本上唱咩歌就算唔好聽都唔會係難聽，
但係我把聲自小五我啞左兩日之後，
(我諗現在只係得juney知道呢件事哈哈)
我的聲線一年比一年差，
我常常想，好似容祖兒咁，
如果再咁樣沙落去，我就會冇得唱歌了。
今日我唱的歌唔多，因為我已經發現，
我把聲已經冇左了，我覺得自己唱得好難聽，
我已經唔係以前的開籠雀，
而係開籠烏鴉了，點算?點算?
好唔開心，但係冇辦法，
我已經叫自己唔好成日叫，成日大聲講野，
但係...今日唱完k，我知道，
我把聲已經玩完了，嗚嗚!!@______@

如果有一天我真的由畫眉變烏鴉，
你會把我打下來拎去燒嗎?

13.09.2003 sat 04:53pm 中秋節快樂之請簽新 guestbook...

中秋節，總是希望人月兩團圓。

近日聽到菇子說有關於exchange programme的事，
我就想其實自己都幾想去exchange，
我在想，如果我去exchange，一去就是半年，
雖然只是半年，可是媽子會寂寞，哥會捨不得，
呆子就更可能會不理我了，
媽子說過，她要我自己來衡量去exchange所得回來的balance是否值得，
好似在exchange時期�媥ヮ鴘漯F西。
是否能填補我金錢上、時間上、感情上的犧牲，
不過現階段來說，我想我會走不開，
因為我冇錢，又想做好多野，而且呆子和朋友們又很重要，
其實而家開開心咪幾好，諗咁多做乜。

script writing 的第一份功課，
要我們寫一個自己人生中最深刻的故事。
其實在我周遭，又或自己身上是發生了很多事，
可是就是沒有一樣是可以好似拍戲咁，
迂迴曲折、轟轟烈烈的，
也可幸，原來我一直都擁有平凡的幸福。

中秋節開始對我們來說，
是一個普通的日子。
以前我們會玩燈籠�岍諢A
會邊看月亮邊食月餅水晶梨，
會求媽子帶我們去玩去睇花燈，
今年我沒有玩燈籠�岍諢A
月餅水晶梨只放在雪櫃�堙A
回到家，媽子已經在房�媞庰菑F。

05.09.2003 fri 02:26am 不愛，就不會在乎。

上星期連續3日都和g4混在一起，
先是星期五晚做義工，
好久沒有回到那裡了，
在跳跳笑笑間，我們不分你我，
只是一起感受那時融洽和諧的氣氛。
星期六日和g4一起去澳門，
回想起來，這還是我們第一次齊人去香港以外的地方玩，
之前有幾次g4其他同伴去旅行，
回來後拍的照片，我常常想，
如果我都有去就好了，好似個張在火車站f4海報前的合照，
每次看我都在想，如果我都有去就好了。

就在大家都記著提醒我要帶齊野的同時，
真的估不到...呵呵呵，阿權比我還大意，
不過不要緊，反正我也試過不少大意事情，
我是會體諒妳的。
話說回來，我們雖然不是去了很多地方，
但我都玩得好開心，夜晚發燒的時候，
多得溫柔的阿茶照顧照顧，
我都不敢說，當我行街的時候，
整個人都是搖搖晃晃的，
同埋個頭好似fing下fing下咁，
夜晚訓一覺好多了。
每每我們聚在一起的時候總是這麼騎呢，
好似在黑沙灘猜包剪泵，擰卡決定運氣如何，
我運氣最背了，擰不到之餘又要拎到個已經轉會的，
都是阿茶運氣好，使我們有錢分。
唔知下次我地可以齊人去玩會是什麼時候呢?

發現自己的情緒愈發不穩，
其實g4在酒店那晚談論的事情我也有想過，
當自己未拍拖的時候，我會想，
自己事都未做好，又點拍拖呢?
之前又諗，自己又唔鍾意好似牛皮糖咁，
日夜都見住，日夜都要掛住，
但係原來到頭來個事實係，牛皮糖係我，
醋酲係我，軍火庫都係我。
呢層認知令我覺得我已經唔係我，
但係可能呢個先至係我。
其實我覺得大家唔好將現時的心態當成將來的心態，
因為當發現自己原來唔係別人眼中的自己，
而又不能接受自己是這樣的人時，
會非常非常苦惱。
人就是從矛盾中成長，
我接受不了自己是一個這樣的人，
我有想過，只要我不拍拖，我就會變回真正的自己了，
但係，可能，牛皮糖、醋酲、軍火庫先係真正的我，
平時的我只不過是我的面具而已。
咁我會好慶幸，有人迫到我個真面目出來，
另一方面，我又會覺得，
當面具脫落，真實的一面坦蕩蕩咁呈現出來，
我就會開始變得懦弱、多疑和不安。
呢個情況令我覺得我築構多年的城堡正在逐漸崩塌。

其實我好鍾意阿茶個份工，
雖然人工少，但係可以在附近返工，穩定而且簡單，
我愈來愈覺得，我已經懶到接受唔到壓力，
又或者，已經懶到，如果要我煩我就寧願唔要/唔讀/唔理。
醫生我係唔係已經冇得救?

我好累，但係開學了。

29.08.2003 fri 01:29am

這幾天的心情總是上上落落，
我不明白為何要放棄自己一直堅持的原則，
更甚是根本沒有人會知道當中種種，
只認為這是一種愚蠢的執著。
旁人基本上不能明白，
自己設下的低線或原則多少是一種心靈的寄託，
一旦要放棄了，又或是變得蕩然無存，
那種失落誰人能夠為自己分擔?
到頭來別人認為我已經放下了，
自己卻默默承受空虛的那種苦，
要是那種苦能化作一種味道的話，
我想就是當你第一口咬落99%純度朱古力的時候，
那種苦澀、那種乾渴、那種令人面容扭曲的味道。

昨天看了姊魅情深，
若果大家當作一套懸疑片看便可以，
因為它有一貫懸疑片的冗長與沉悶，
但最後只要稍稍用腦，
便不難明白整個故事的內容。
之前和winghan與peppy笑笑看看吃吃，
一天又一天的青春在悄然流逝。

我笑，我笑，我笑笑笑笑，
當中的失落在大海中沖掉。

24.08.2003 sun 03:06am

先不要理會surprise today�塈琩滬茷Npose，
那是由機場往台北市中心的巴士，
巴士內的椅子全是真皮梳化，
成張梳化係架車入面都唔好話唔好笑。

我回來了! ^o^

今次去台灣逛的地方比上次不同，
不過去過的地方也和三年前不同了，
六蚊漫畫店執左、光華變左電腦城、
西門町多了啄啄、士林變大了...
感覺就好似第一次去，仍然充滿期待和新鮮感。
在台灣一樂園撞到陳嘉上和黃子華，
又在當代藝術館撞到擺展覽的artist，
真是星光熠熠。
今次多是買東西給朋友，
自己的東西，沒有多買漫畫小說，
反而書和衣服卻買多了。
在西門町有一間 ikea+muji 的舖頭叫「生活工場」，
在金山有一個「朱銘藝術館」，
(我一聽到個名就諗起gymmy呵呵呵)
在敦化有一個京華城，
台灣當代藝術館、淡水日落、書街、台灣大學，廿四小時誠品，
都去過了，都感受過了，
街邊小食、咖啡店、塌塌米日本食店、
百分百西瓜汁、阿宗麵線、小店的蛋餅豆漿，
好吃到不得了。
嘻嘻哈哈胡胡鬧鬧吃吃喝喝看看跳跳，
吃吃哈哈鬧鬧跳跳胡胡看看嘻嘻喝喝，
但願我們永遠都這樣快樂。
特別鳴謝同行的朋友們。
美好的回憶，好像又多了一點。

回來就是回到現實，
這幾天reg.科都有點亂，
說真的，做完港台之後有點想法唔同左，
想讀好d英文，想再寫故仔，
想比心機，想珍惜現在還是讀書的日子。
返工不好過，不過我還是希望，
他朝有日出來工作之時，
我仍是這個我，天真簡單而偶有白痴之時，
縱然這個我是不可能在社會立足的。

今朝起來聞到了開學的氣味，
就是那種秋天預備來了的草草味，
讓我想起中學的日子，
阿權還記得嗎?我們都是因為sailor moon而認識的，
那些信我全都留著，
感情太重了，不可以掉也不能掉，
我想妳掉之時也有很多掙扎的。
心情鬱卒，就想個辦法逃出來，
別讓自己沉底啊!!
阿聯阿珮阿茶也要加油!!!

好想寫一個像藍色大門般的故事，
淡淡的，淡淡的，淡淡的，淡淡的，
好喜歡藍色大門啊!

09.08.2003 sat 11:00pm 得意生日快樂!

放左假個幾星期，我終於有心情再寫返野。

港台的intern.已經完左啦，
唔知係我能力問題，際遇問題定係乜野，
又或者係因為我team人八月都放假去哂旅行，
三個intern.入面得我一個唔使做埋八月，
其實我入到去做都已經覺得係人生的一個bonus，
兩個月好似發夢咁見到好多野，
又好似海綿咁吸收左好多野，
認識到浸大的朋友仔，
it's so bonus~
而且我都覺得應該比返一個月假自己，
宜家雖然開始放假，但係日日都唔悶，
我好享受呢種生活。

臨完intern.之前我老細比左個機會我去機場睇人整飛機，
我咁大個女第一次張開口久久不能自已，
我去的地方除了係維修飛機的地方，
(大家有冇睇good luck?正正是一模一樣的地方!!!)
我還走到跑道上看一架又一架的飛機在我身旁降落，
咁近架飛機比我個感覺好震撼，
所有人都穿著淡藍色的工衣穿梭著，
為著一架飛機的安全而共同努力，
之後我們仲上了運貨的飛機上看，
入面好似海底隧道咁，乜都冇，
d飛機好似模型咁，我可以用手摸到佢地，
直到而家我仲記得個種心動的感覺。
不得不提，個度有二千幾個工作人員，
只有一個係女人，而且那些男的質素真的非常不錯，
就在我近距離看到一間港龍機離開，
有一位貌似eric kwok，穿著淺藍色工衣的男士，
揮手和機師拜拜，簡直型到爆炸。
臨別秋波，真的很不錯。^o^

今日睇報紙，蘋果的國際版頭條講美國新起了一班「快閃黨」，
(本人覺得剩係個名已經好有娛樂性。)
佢地會約定一齊做一些古怪的事然後突然散去。
好似大家約三百幾人進入一間書店然後不停問個度的店員一些不存在的書，
然後突然間所有人一起拍掌再火速離開書店，
整個過程異常搞笑，全程不過15秒。
美國報章訪問那裡的人為什麼要這樣做，
每一個人的理由都唔同，其中一個說，
大家在同一個地方做同一樣古怪的事不是很超現實嗎?
我看到這已經笑到手震，有些人就覺得這些才是藝術，
原來日本之前已經有「快閃黨」，
佢地仲一齊扮殺人網絡廿二世紀入面的史密夫，
著哂黑西裝載哂黑超咁，過過下馬路然後突然散去，
仲超現實。

surprise today 張相係上年在法國南部影的，
行第五那個便是我，正在站著影這張相。
當時有一個攝影師希望我們行多次比佢影相，
我突然間好想知道佢個日影唔影到，
同埋個感覺係唔係都係同我一樣，
我覺得呢張相比我諗到好多野。

有時真係會慶幸自己所遇到的，
比自己所想到的好。
「你去邊我就去邊!」
很孩子氣，也很可怕，哈哈。

但多謝你這句諾言。

05.08.2003 tue 01:17am

相片有時比文字更能帶出心中的感覺。

29.07.2003 tue 10:53pm

我要盡快寫哂我要寫既野佢，
相就下次先upload啦，太多野想講，我。

近期完全走進了王貽興的文字世界裡，
感受他那腦電波和我完全相同而產生共鳴的奇異感覺。
我喜歡他，是因為難得我看到一本書，
內容想法以及那流光溢彩的感覺，
令我心靈上得到滿足，
亦知道原來有人和我的想法差不多，
而莫名其妙的鬆了一口氣。

22號菇生日，那天有多熱鬧有多慶烚烚現在就不再多說了，
不過我想中學同學和大學同學混埋一齊，
組成一個大同的世界，真係奇葩，
如果唔係菇，呆子都只不過係路人甲，
不過都多得菇，呆子才能成為我心中的「鄭智瘴」，
還是要多謝菇，生日快樂，希望妳的電腦快快乖起來。

星期日，星期日係一個又大又好的日子，
利記來香港了!多麼令人振奮，
還記得奇連士文掛靴後，
我對菊說「噢冇波睇lu」，
阿菊就回了一句「利記幾好睇架，捧下啦」
於是就開始睇了，還記得個陣仲有科拿同埋麥馬拿文，
之後睇睇下鍾意左麥亞里士打，
直到而家。講真我就真係記唔哂所有人的名，
好似個日睇波我都認錯個門將，真係失禮。
哈哈哈，但係我鍾意睇成隊人點樣去踢，
雖然我唔係好認得人，但係我都睇得好開心呀，
baros簡直是爭取表現，不過唔知點解，
我對heskey特別有興趣，成日都追住佢睇，
可能佢真係幾易認，同埋有一雙修長的腿啦。

星期六和wing han，peppy唱k，
好久沒見她們了，我們都玩得很癲，
只有peppy冷靜些，哈哈哈。
不過今天peppy告訴我她的寵物鼠離去了，
我想牠選擇悄悄的離去是因為不想妳看見牠痛苦的樣子，
還記得中七時上phy堂我們一起談過的事嗎?
不知道點解我們都喜歡在phy堂哭呢，
妳當時是為了小bb，我就為了那該死的鋼琴比賽証書，
那時，真的發生很多事呢。
peppy要為小bb振作呀，

星期四就和吳彥祖錄影，
可能是第二次見他，已經沒有特別的感覺了，
也開始感到只是工一份，
當時除了希望快點收工之外，
完全沒有睇明星的雅致。
不過佢真係好pro，同埋好認真，加佢分。

而這幾天就忙於做這個粵港澳小學常識問答比賽，
即係梁添好鍾意參加個d的小學版。
都有好多野做。
最搞笑今日我又做禮物小姐，
要入化妝間做「意大利批蕩」，
我完全十分非常覺得我化左妝個樣係唔靚的，
我呢d粗粗魯魯，都係算吧啦，哈哈哈，
總之我就唔希望見到自己化妝個樣啦，
太恐怖了。m________m

都好似講左好多啦，累累，訓了，

20.07.2003 sun 08:32pm

今個星期過得好快，快得好像有點虛。

星期四是阿其的生日，
我們大伙兒十個人去了唱k，
好久沒有這樣聚在一起了，
不過正如阿其所說，生日就這樣嘻嘻哈哈過去，
也不會期望下年會有多盛大，
不過人長大了，所祈求的都是平平穩穩的生活，
只要大家都在，大家都開開心心，
不已是最好的嗎?=)

g4有三人去了旅行，所以有很多手信，
謝謝珮聯船了，我都想去旅行，
阿權，我們不可以輸了，
聽著阿聯去雲南的趣事，
我都好像去了一趟回來，賺左。
有一個趣事我好想講，
哈哈哈，阿聯話個度d人為左做生意，
即係騎個d收費耗牛，d人會在你側邊唱beyond的海闊天空，
然後見到耗牛，就會指著那些牛在你耳邊說:
「帥哥，你看，那是耗牛。」然後又會繼續唱beyond，
阿聯扮返出黎個陣真係好好笑，
哈哈哈哈哈....

跟住今日係g4聚，
在阿聯家傻傻癲癲又一天，
我在聯家找到一本手相學的書，
打開來研究一下，
真係好奇怪，明明係唔準，
但係我們偏偏就會信佢，
然後見到係好的就會大笑，
唔好的就會話唔係，
不過我都係信之前其中一個相士所說，
手掌上的紋是你一生的傳記，
不是過去的現在，也不是現在的將來。

呢個星期都唔係話太開心，
又和呆子吵，自己又有壓力，
講真，我可能真係冇錢去旅行，
如果是真，我會好好好失落，
不過冇辦法啦，我都唔可以咁自私。
人生的快樂都只不過係一場虛火，
之嘛。

16.07.2003 wed 03:12am

happy birthday juney...
i know i am late...
but i really remember your birthday
and miss you very much.
everytime your birthday comes,
i remember i was missed your birthday every year before
for sth...(do u remember that?)
and now, i sincerely send my greeting to you
and hope you are having a wonderful trip
with love.=)

13.07.2003 sun 10:35pm

希望我今晚有覺好訓，唉。

真的很頂頂，我睡的床竟然斷了，
是真的「拍勒」一聲咁樣斷左，
成張床板都跌左落地，我自問體重尚可，
冇理由會斷架?!而家要訓地下，
好彩新床明天就會到了，
不過執就有排執，我間房第三次大執，
又要翻箱倒篋咁將d回憶從原位拎出黎，
刺激完自己一輪之後佢又好若無其事咁放在第二個地方，
搞到今晚個人有d怪怪的，好似突然好唔捨得一d野，
但係我又唔可以講出個d係咩野。

上星期四國際動畫節開幕加首影，
我的角色就係遞紀念品俾人再俾嘉賓的「紀念品小姐」，
當然速遞、場記、票務、聯絡等等都要做，

著住呢對高跟鞋真係好慘，
如非必要，我以後都唔著高跟鞋了，
不過著得咁formal做野真係第一次，
我覺得成個人都大個左，
原來同著住工人褲的感覺真係好唔同，
我都係鍾意工人褲多d，
感覺冇咁拘束，自由d，無憂無慮d，又開心d。

之前日日都有政治版真情睇，
黃生仲送了一個粗口手勢給自己的選民，
真係睇到拍哂手掌，不過屯門公路事件真的很突然，
現在每天我乘車經過那裡都會想到那件事，
很無常，生命就是這樣，
不過，我在想，至少到現在，
還沒有什麼東西令我覺得遺憾和後悔，
有我愛的人，有愛我的人，他們都健康愉快，
生活如此，予願足矣。

05.07.2003 sat 11:34pm

近期都係滲著淡淡的哀愁，
人生無常，最緊要對得住自己，好好生活。

7.1最後我都因為要工作而去不到遊行，
其實我是非常非常失望的。
可是當我看見香港五十萬人這麼團結，
雖然當中各人目的不同，但政府還是有注意到了，
同事告訴我，政府說有六萬人去嘉年華，
但他們拍攝的看見只有六千多人。
上星期有兩日要出車去送小冊子同埋海報同埋飛，
同司機哥哥傾偈講開，佢話佢地個日見到有幾個支持政府的人打遊行的人，
然後又有小小的騷動，他說也有很多是新聞沒有報導出來的。
我聽到也只是笑笑，我們知道多少呢?

這個星期也比較忙，
其實我好像一直也沒有告訴大家我工作的內容，
大致上，我跟的監製在暑假會搞一個國際動畫節，
由我入去做開始，我便幫手寫那些animation的synopsis，
譯中文字幕、count時間、對格式、出信、搵 footage，
等等等等等等諸同此類的工作，
另外也會做錄影、影劇照、寫新聞稿，
再然後又會寫寫會議紀錄、打無數個電話、
抄帶打字、寫信封、執飛、統計人數、紀錄訂飛情況、
在廣播道徘徊(因為要送野去唔同地方)，
今個星期則是做速遞，香港九龍新界周圍去送海報，送小冊子，送飛，
海報和小冊子其實都幾多幾重，第二次去送得我一個，
都幾吃力，好彩司機哥哥好人，
記得去到長江中心同埋中環貿易廣場的停車場都非常複雜，
而其中貿易廣場我抬住一疊海報一箱小冊子唔敢自己去搵lift，
司機哥哥陪埋我一齊去，上到去加拿大領事館，
佢企埋一邊尷尷尬尬咁，因為佢著住背心短褲仔白飯魚，
個secure都眼望望，跟住去法國領事館，
佢幫我抬箱野去到lift口就唔敢跟我上去了，
不過呢個司機哥哥真係好唔話得，
其實咁樣周圍去都幾好玩，
好似去到法國領事館見到個領事，
叼住口煙在一個黑色而凌亂的大房內做野，
個reception姐姐又靚女，仲講得一口流利的法文，
我係度諗，佢一定係在法國住過一排，
同埋原來我潛意識好想成為呢類型的女人，
上到車我都一直諗住諗住，仲同司機哥哥分享，
司機哥哥顯得冇乜興趣，不過佢跟住同我講佢老婆同埋佢個女，
其實原來個d男人平時粗聲粗氣，但係一斯文起黎真係好好笑，
好似司機哥哥原本打電話同緊第二個爆哂粗口咁又乜又物，
跟住佢過左目的地，我唔好意思咁打斷佢，
就咁擰到個頭都甩埋望住目的地走左，
司機哥哥意識到之後爆粗鬧佢電話入面的人累佢行錯路，
我又唔識時務咁打插話「呢度落得啦」，
佢個樣仲係維持緊粗口樣但就擰轉頭好溫柔咁同我講「好呀，小心車呀」，
我真係笑左出黎，哈哈哈。

之後返到office都要繼續做做做做，
所以晚晚返到屋企其實都幾累，
通常都係沖涼睇報紙然後訓覺，
到了第二天又是這樣，如是者，一個月已經過去了。
久沒有見的朋友們，你們好嗎?

昨天高考放榜，有兩個同事都有份，
收回來都是好消息，真是太好了，
雖然我當年中七慘不忍睹，但如今我都好好的，
所以得失也不要看得太重呀。

剛才和菇來了場soulful talk，
好爽，爽爽爽爽爽爽爽爽爽，
好耐都未試過傾偈同埋大聲叫了，
星期一就見到妳，好野，
我真的真的好久沒有見到你們了，
傾完之後所有的不安都冇哂，
唔...*菇子．掂*!!
v ^______^ v <----星期一做比我睇!!

最後想講許志安呢首medley係我近期首選，
雖則我冇乜點開電腦，但係一開都會聽呢首歌的，
file 大左d，但係有感情聲靚，
唔 download 都開黎聽下。

╮(╯◇╰)╭

29.06.2003 sun 03:35pm

客觀黎講，我唔係覺得有廿三條係特別的事，
但係一條影響咁大的法例立得咁急，
又唔聽從民意，政府又一味做表面功夫，
我覺得真係有d唔妥，
個人黎講，我覺得董伯伯政府的辦事能力真的不太好，
沒有仔細周詳的計劃，好似八萬五，母語教學同埋副學士等等，
而家全部都話唔得，其實初步諗都知要好多錢架啦，
所有野都做到一半話唔得，sars死咁多人都話要慶祝，
又搵返自己人查自己人，高官又話問責但又不負責，
香港而家失業率高到成8.3%，
經濟又打到落花流水，我覺得，
有好多野可以避免的，
不過我唔係政治家，我只係一個小市民，
所以我不懂。
我出街只不過是想宣洩對政府某些辦事方法的不滿。

星期一和呆子去看beyond，
整晚都好high，好好玩，
差不多全場的人都站起來跳舞，
原本我都想替呆子打出他的感想，
不過他的說話真的打不落手，
還是算了吧。哈哈哈。

juney!!你玩成點呀...
好歹也send我一封email吧，
擔心死了。

近排又進入了自我厭惡期，
心煩、氣燥、冇自信，
常常胡思亂想，苦了別人又苦了自己。

但願人長久。

22.06.2003 sun 11:26pm

雖然已經想睡覺，
但係我應承自己一定要個個星期 update，
所以又上來了。
今天是我們G4聚頭的日子，
雖然只是吃了一個午餐，
但有日本的手信呢!!
多謝珮，呵呵呵，條「天空之城」鍊，
我比我個阿哥睇佢話摸住都有飄的感覺呀，
哈哈哈....d糖都好好食...不過都幾甜...
同埋藍色個粒真係...食完好似吞左粒藍泡泡咁呀，
NANA 7.8 真係好正，我返到屋企已經不停咁翻閱，
仲妄想自己畫到個D草圖添啦，
我想化那個娜娜妝呀....

菊其實今日見到妳都落哂形啦，
我都知道那種辛酸不足為外人道，
正如妳說的對，只有我們去迎合社會，
而不是社會迎合我們，
不過對自己太過嚴謹真的不太好，
有些時候給自己放縱一下，
都冇問題呀，生活就這樣過的了。
要頂字呀，利物浦黎緊啦!!!!
you will never walk alone!!

茶我一定支持妳去旅行架，
因為咁我就會有手信啦，
下次我都會借個兩本原夢比妳的，
我成日借左妳d漫畫成幾個月都唔還，
哈哈哈哈哈...(好似 cafe 吉祥寺咁，因為...太型啦實在!!)
不過你放心，我流口水流夠了，
就會還你的了，你仲有盒巨星夫婿係我度呀!!
=p 我到而家都會成日開黎睇的，
不過我下次一定會還給妳的了，
謝謝茶!(好鍾意你突然拎轉頭好甜的叫我一聱「朱」，
然後我又好甜的叫妳一聲「茶」的感覺...呵呵)

天微影的相就最搞笑的了，
我都係最鍾意影到我貪婪的樣子那張，
不過我係唔會post出來的，
咁醜惡點可以出街架，不過我想post另一張阿聯影好得意的，
哈哈哈...雖然影唔到我，不過呢個角度好搞笑。

明天是返工的第四個星期，
為左令自己的生活唔好剩係朝九晚五，
所以明晚我會去睇 beyond 演唱會，
我要努力向上!!!

15.06.2003 sun 02:10pm

0. 天氣真的不怎麼好
1. 我為我不能做的事而心痛
2. 呢幾日我覺得自己好似一塊海綿咁
3. 你也未曾遇過，永遠未停下來的我，要你付出不算多
4. 細菌大王，你的手下搞到我喎，咁點先?
5. 智者話，青春是荒唐的
6. 我的英文進入第三期發育
7. 從前共你講，不要分別，不要歸去，明明還流過一點眼睙
8. 縱使我不認同一句說話就會有其可信性，但「我愛你」
9. 辦公室不是我該待的地方
10. 我發現我唔係咁適合在社會做事
11. 我唔係逃避
12. *累*
13. 今個星期的productivity好勁
14. 每天話比自己聽「我好精神」就會神奇的功效
15. 如果，我是說如果
16. 我想剪頭髮，又或者玩下新花款
17. 有冇人聽到我心�堛獄☆�?
18. you will never walk alone
19. miss my friends to dead
20. 在辦公室那無辜的表情絕對不是扮出來的
21. 喂？喂？

04.06.2003 wed 04:47pm 我還記得十四年前的這一天

學業篇

工作篇

就是在還未清楚知道發生什麼事之後，
我進了香港港電台開始了實習工作。
第一天進港台，已經出trip去拍野，
之後拍完返回港台，就參觀整個電台運作，
簡直係遍佈整條廣播道，
其實第一天返完工後個感覺不太好，
原因我總括有三，
第一係大部份港台的人都是浸大傳理的人，
而某一個監製同我講，
我係第一個城大入到去做的實習生，
壓力都幾大，好似我做得唔好，
cm 的名就會因此而蒙羞，
感覺都係得自己一個，
雖則我都係覺得自己做好自己就罷，
但係監製明顯的語氣我聽到後好唔舒服。
第二係一入到去就聽到"是是非非"，
話邊個唔好邊個唔好，跟到佢就慘云云，
咁計埋我在內，一共有三個實習生入左去這個部門，
我們要一人跟一個監製，
其實開頭都覺得冇乜所謂，
但係我最怕就係呢d是是非非，
我明知道自己出來做野會比人恰，
我就要諗辦法去避開呢樣野，
好彩昨天佢地開完會之後，
我被丟到去 creative and animation part，
我想我跟的是一個好監製，
總算放下了心頭大石。
講真之前d暑期工都係hea下hea下，
而家入到黎，樣樣野都好講效率，
又認真，連credit/roller(即係最後出個d名)都要認真咁計哂時，
我覺得自己有好多野都要學，
同埋原來自己讀的野真係少得咁可憐。
我參與的第一個節目係英文節目，
叫"world animation"，好開心係監製知我修 photography，
佢叫我去影相訪問鄭中基，我之前真係好驚我學既野係冇用，
因為同浸大個d朋友仔比埋，我真係弱好多好多，
原來我都有d用，我都可以幫到佢地。=)

我會繼續努力的。

朋友仔篇

好耐冇見到我的朋友了，
好掛住佢地，不過我想我不可能可以好似之前咁，
日日上網 icq 了，好彩朋友仔們都有寫 diary 的習慣，
我都會知道他們發生了什麼事，
覺得自己還是和他們在一起。

權---我和你實習都要加油，
而我在工作時每每看到一些事，
就會想起你上年對我說的話，
我等緊你本「如何在兩個半月實習期生存!!」，呵呵呵!

聯---希望妳搵到份好工，
或者自己做老闆其實都好好搵...
等緊你第一份糧呀!! =P

珮---日本行順利，影多d相，
如果可以睇到宮騎俊的相就好了...呵呵呵，
出門要小心呀...

茶---我都係想講個句「你的好與不好，
都在我們的懷抱�堣あ角F愛。」
哈哈哈哈...唔好滴汗。
仔仔會和我一起支持妳的。

芬芬、ka ying---對不起，我們玩的日子又遠了，
不過我相信，今個暑假，點都要搵返日出黎癲!!
加油!!

june---很開心妳將會過一個開開心心的暑假，
總之凡事小心，have fun!!

koo chris jean banana zoe---
開始實習後便很少時間相見食飯遊玩，
某程度上是有失落，
天知道我有多掛念大家。

其他的朋友仔，不是我忘了大家啊，
我還是有留意大家的行縱的，
希望大家都有一個充實開心的暑假，
阿朱用閃閃令的光輝照耀大家!!

心情篇

同學仔的離去其實都令到自己幾唔開心，
又做唔到d乜，感覺上好怪，
我真的覺得很不好意思，
我不知道我可以怎樣，
但我希望他能知道我的小小心意。
希望他在另一個世界找到自己所想要的。
in memories.

呆子篇

昨天和前天情緒大幅度上落，
嚇壞了呆子，真的很對不起。
之前你摺了一粒霉運星星和兩粒幸運星星給我，
咁我就希望你的bad luck 會隨霉運星星而去，
(但係我打死都唔會要個粒霉運星星架啦)
而你比我個兩粒幸運星星，
就主力照耀你去考試，
考得好好睇睇，靚靚仔仔啦!

昨天的事我真的很內疚，
問題係，我估唔到原來咁做會令到你咁擔心，
而我跟本冇諗過你的心情，
所以我真的有點覺得自己白痴，
不過，該介意的我還是會介意，
要是我不介意，我喜歡的可能就不會是你。

對不起，謝謝你。
一個月了。

我會惜福。

28.05.2003 wed 11:50am in School of Creative Media

這裡的冷氣還是該死的凍!!!凍死了!!!

剛剛去了港台 interview，
應徵做呢個 production assistant，
大家一縷都知道我一 interview 就會發癲，
就好似今日咁，我已經好刻制自己千萬不要做傻事，
但係個 interviewer 實在太似 betty 阿姨啦，
搞到好似同佢好熟咁，我又覺得好好笑喎，
所以就勁笑啦，佢又問埋我個d非常假設性的問題，
例如有佗地向導演收數，我地 P.A. 應該點做，
我就答我會叫佢有咩同我傾，
佢就話「咁勁?」
根住佢問我導演係做咩，
我竟然答佢「導演係用黎叫"cut"既。」-____________-
佢聽完笑到收唔到聲...不過氣氛就好好囉，
好舒服，如果第時次次interview都可以咁就好啦，
其實我都冇乜點緊張，情況就好似個陣 in cm 咁，
因為覺得都唔係屬於自己既野，點解要緊張，
不過可能我因為咁諗，所以就入唔到社工啦，
正所謂你緊佢佢唔緊你....

講開社工系，近排政府傾緊要cut哂city 13個副學士，
雖然我最緊張的social work 同埋 cm 都冇事，
但係我就覺得政府咁做好似唔係好好咁，
正如一個人車大炮，你唔講冇人知你係點，
但係如果一個人應承左做一d野，就應該貫徹始終，
雖然政府冇錢我都知，但係當初都知道開副學士要好多錢架啦，
如果有評估過認為冇事，點解開左個兩三年就話 cut?
呢個唔係支唔支持副學士的問題，係政府的誠信問題呀，
更不用說有多少個教授失業，多少個學生願望落空，
多少的資源浪費呢?

大家關心的fyp仍然在進行中，
哈哈哈哈哈...看見大家都說畢業，
我都想說說，因為我都係應屆畢業生。
其實在cm兩年好似發夢咁，
識左好多我以為唔會識到的人，
做左好多我以為做唔到既野，
見到好多我以為唔會見既事，
入左黎真係多左好多機會，
雖然我成日覺得自己唔係cm人，
但係事實上我又係一個cm人喎，
所以今日開始見到有人interview cm，
見佢地咁緊張，我就「挺胸收腹」咁係佢地面前行過，
哈哈哈哈哈哈....覺得自己好威咁，
其實我都覺得幾威，因為呢度實在臥虎藏龍，
太多勁人啦，我都唔知點講，
總之我覺得好開心好榮幸入到創意媒體學院，
我希望我可以升到BA，
因為我仲未探索完自己，
仲未探索完creative media。 呵呵呵...

25.05.2003 sun 03:26am

屋外下著大雨呢，滴滴答答的，
有一陣草味和雨味，好舒服。

今天去了很多地方，
走了去天后的一個有閣樓的茶餐廳，
才知道那裡的沙嗲牛肉米好好好好食，
走了去愛民村找到住村時的感覺，
食了一支細個好鍾意，有三節的雪條，
頭個節係朱古力加糖碎，第二節係牛奶，第三節係士多啤利味雪條，
嘉頓出的，以前日日都會食一支，估唔到比我再次食返，
仲有玩扭蛋機，記得細個鍾意執d空蛋返屋企，
都幾無聊，有次媽子要丟哂我d空蛋，
我就攬住d蛋喊左好耐，都唔知點解當時會當d空蛋係寶咁。
跟住去了廟街的一間茶餐廳，
食完就行廟街，真係第一次行...
好得意有好多人睇四仔，
咁既時勢四仔都咁好生意，
睇黎好掂。
睇了 matrix reload，
有少少搵笨，點搵笨唔講啦，
但係我明點解導演會話第三集半年內會完成仲會好收得，
完場戲院都有少少噓聲，哈哈哈。
不過睇特技就好好睇...

今日都影了好多好多相，
希望夠用。
努力!

20.05.2003 07:48pm

透透氣。

情緒方面大起大落，
才剛想著做埋 animation essay，
就可以輕鬆快活無憂愁，
點知一個措手不及，
收了 theresa 的 email，
話比我聽要我 re-do 份 fyp，
睇完之後個心好似比人打左一拳咁，
好痛好痛，個陣仲笑住咁話比呆子聽，
「唉又要做過啦!」
轉頭 physically d 眼淚水就係咁巴巴聲咁黎，
其實我知道我要re-do的原因可能真係我做得未夠好，
我知道我唔可以因為別人唔認同我，
我就懦弱得要哭，
可是那份功課我真的很比心機做，
做了很多天，用了很多心思和腦汁，
現在只是一個email 便否定左我那咁多天的成果，
當然會唔開心。
但係我知道我要堅強，接受否定才可進步，
我 mentally 知道呢點，
所以我其實冇乜野，
之不過 physically 同埋 mentally 的分別，
令我在掙扎的過程中邊笑邊喊，
我覺得好古怪。

剛和嘉盈談了一會，
知道她實習得不是太愉快，
原來有很多人都和自己一樣，
拚命地想做好一樣野卻不得要領，
初初的熱誠如光速般向下降，
點解會咁架呢?

今日做完篇 essay 明天就去見 theresa，
其實我一直都好驚佢，
但係我知道我跟佢會學到野，
同埋愈驚我就要愈埋佢身，
所以搞到而家咁緊張，
我好耐冇試過咁驚一個人，
而家我的感覺就好似幼稚園第一次返學，
比老師捉住然後望住媽媽遠去個隻「驚」，
唉....謝謝珮和天微，還有june june，
希望我可以做得更好。
希望朋友們，包括嘉盈，
都能順順利利過關。

我要做 he-man，
骷髏頭堡錫我力量!!!!!!

18.05.2003 sun 12:45am

好熱，今日真係好熱。

仲有幾份功課未交，
之前以為份animation final係研究下 DivX 就算，
點知今日再睇返原來係要做以下的東東...
1. independent learning of the software "icarus 2.08"
2. study the "making of avalon vfx" video

真係大件樹，熟我的人都知我係一個學習+電腦白痴，
上面的野聽都未聽過...
仲有四日咋....嗚嗚嗚嗚嗚嗚....

收到email要填 BACM 的 major，
好急咁要星期一之前交，
又講到好嚴重話選擇會直接影響升唔升到喎，
原先想揀 independent study，
但係今年個分高左，要成3.3先揀到，
唉...其實我覺得自己係應該要讀 animation，
但係呢科太熱啦，所以我諗我會揀 mila，
如果真係下年就無今年咁hea了，
不過...都係個句，升到先算....=)

天氣咁熱，令我諗返起中學個陣，
去小食部用2蚊買舊雪到硬哂的菠蘿咬，
好食又解暑，好掛住好掛住，
其實如果可以時光倒流個陣的時間，
仲可以咬住舊硬菠蘿坐在充滿溫書學生的小小canteen，
仲有玩自由體操的同學，去球場打波而放低哂個書包的同學，
尋回那只有仲夏在學校才聞到的氣味，
這些感覺真好。

tracy 收到妳的禮物了，
謝謝妳一直的支持和鼓勵，
我知道你一直都有留意我的。
thanks so much! =)

14.05.2003 wed 12:24am

原本想upload首歌仔，
但係個人軟吱吱唔想郁，
所以都係混下水摸下魚咁今日，
fyp 終於都做完了，
比我估中都係有個d失落的感覺，
即係...你考完會考al之後個種失落感覺呢，
好想加入 etv 的行列，
好想食士多啤利芭菲，
唉....

fyp 封面，為左呢份功課，
我差不多五日足不出戶，
日夜趕工，發揮我的小小宇宙，
呵呵呵....終於完成了，
我好耐冇試過咁專注做一樣野了。
呵呵呵呵呵呵呵呵......

好累了，下次再談。
仲夏快樂。=)

05.05.2003 mon 11:39pm

我拍拖了。=)

我想了很久，都不知要如何告訴我的好友們，
因為我相信對於他們來說，
這個消息來得太突然了，是吧?
事情就只不過是有一個呆子，
不知道何故地揀了一個樣不算好，
脾氣有點古怪，有點精神分裂，
有點自戀狂而又有些暴力傾向的人做他女朋友。
之前還打下「邊個鍾意阿朱邊個就是盲的」的誑言，
真是狂妄。
之後擾攘了一段時間，$@#%$@#%@#$@@@#$$@，
就這樣了。哈哈哈...

其實朋友們不要擔心，
那個呆子對我好好，
我很感激呆子在我多番拒絕後，
仍然堅持和相信，
就是那位在我 guestbook 寫下「水滴石穿」的無聊傢伙。
其實對於我來說，這段時間我很不習慣，
我很擔心我的朋友會想，
這樣是不是就等於少了一個朋友，
之前我有一個好朋友告訴我要拍拖的時候，
我真的失落了好一段長的時間，
(不過可能你們就好想好似掃垃圾咁快d將我送走，哈哈)
我想我不會讓這些事情影響到我交友的，
我很重視我的朋友，我相信呆子也知道這點，
而我們亦有compromise我不會棄我的朋友不顧的。

本來我想親身告訴所有朋友的，
但現正值考試旺季，
這麼突然的事還是在這裡宣佈好了，
大家不要以為我有了呆子就不需要大家，
我很喜歡大家的呀!!

謝謝菇子。
謝謝那些恭喜我的人。
謝謝那些曾經擔心過我的人。

謝謝某一天在愉林讓我遇見了你。

04.05.2003 sun 01:05am

今日媽子個死黨個仔結婚，去了金鐘的力實軒飲，
佢d菜好好食，同埋最後用炸竽頭混糖漿的甜品簡直一絕。
新郎其實是我們的朋友，以前住村都有成日一齊玩，
今日見佢西裝骨骨咁，靚仔左，
新娘都好靚，整個氣氛很浪漫，
播著他們由相識到結婚的mtv時，真的很溫馨。
原來新郎新娘由中六到現在已經拍了八年拖，
我覺得好勁，試想想，整整的八年，
有多少事可以發生，
一起八年真係令人感動的事，
可喜的見他們恩愛地進入人生的另一階段，
希望他們白頭偕老，永結同心。=)

以前希望讀到社工，
除左因為自己有興趣之外，
仲覺得「社工」學到的東西自己都可以用，
而且是終身可用個隻。
個陣我成日搵社工傾偈，
佢地同我講，其實社工同醫生一樣，
能醫不自醫，當時我覺得好奇怪，<
因為社工唔同，有乜唔開心可以自己安慰自己，
但係原來現實完全唔同，
當有事發生在自己身上時，
根本唔會有那種冷靜和客觀的心和自己說話。
這時候的壓力、不安和擔心，
都只會愈來愈大，愈來愈近。
我突然好想請教番那位社工姐姐，
咁究竟當佢唔開心的時候，
佢會點樣做呢?

其實我冇事的，
只不過可能近日天氣比較悶，
功課又未做完，
正所謂的「五月病」發作，
所以朋友們不需擔心。 =)

30.04.2003 wed 12:02am

chris 對不起。
不要問我為什麼，我對自己的不識時務，
已經有點討厭，或者你會覺得我白痴，
但我真的不是有心的，
希望你的心情可以盡快好起來。

大家有冇食過鳥結糖?
佢係一粒好硬的糖，
我成日覺得鳥結糖好得意，
鳥結、了結，
如果食一粒可以了結一件事，
不費吹灰之力，不用等事過境遷，
那有多好。

明天考日文，要溫書了，
隨著時間飛逝，心情愈發低落起來，
有沒有一個可以讓心情180度大扭轉的方法?

28.04.2003 mon 10:20pm

大鑊了，我似乎忘記了交功課，
今日收到了email，佢話而家交都要扣分了，
我仲諗住佢冇咁快添....>_____<
明天要光速咁去交了。

近期睇緊本書叫「傷心咖啡店之歌」，
佢入面刻意舖排的人物所帶出來的社會批判其實我就唔係好受，
而且佢將「睇禾馬珍愛小說」的人都設定為整天只愛發夢，
不切實際的無知少女，我就覺得有冇搞錯，
就算係那些小說無聊，人總要做夢，
沒有夢想的人生就得於沒有水一樣，
隨時會枯竭而死的。
雖然呢本書鬼咁現實，但係佢個開頭同埋結尾都幾吸引我，
所以我決定睇哂佢。
(其實我未睇哂本書架，話唔定我睇完之後會愛上呢本書呢....=P)

我今日用了一天的時間，
都整理唔到我的頭緒。
真係水深火熱。

24.04.2003 thr 10:43pm

昨天是茶茶的生日，我們一行人到了尖咀茶樓食飯，
呵呵呵呵呵...諗起都搞笑，我地的行動無疑令茶茶臉上無光，
首先，我們在酒樓的牆上貼了用手搣的"茶"字，
然後又請得聯權二人為茶茶拉對聯，
派利是，送光一，寫迎賓冊，
雖則茶茶在全程之內都好刻制地控制自己難受的表情，
好可惜，當光一出現的時候，
茶茶面上出現詭異的笑容。
哈哈哈哈哈哈哈...可惜我要早走去電影節啦，
如果唔係就可以玩耐d...不過我諗我再唔走，
班男仔就會用廚房d烏蠅膠紙痴住我個口架啦....
哈哈哈哈...=)

電影節看罷「愛不適打」，更加覺得原來感情可以這麼不堪一擊，
人與人之間相處的微妙，我到現在仍然覺得很玄，
也未懂得如何巧妙處理，太多太多的悲歡離合，
太多太多的生離死別，我們怎去經營、維繫，
才能做到一生一世?

一生一世，係唔係唔敢講一生一世，
大家就唔係親人、唔係朋友、唔係愛人?

「我無奈地苦笑，在默然無聲的電話之中，
你send過來異樣的message，
激憤也好，不爽也罷，
並不曾使我的笑聲變小，
因為令我無奈的，不是你的字�埵瘨﹛A
而是我堅定的心。」

23.04.2003 wed 02:56am happy birthday to tea! =D

22號係蕉的生日，希望你過得開心。
雖然我�縝b城大門口的舉動唔係好文雅，
但係我諗呢個驚喜都唔會有咩人會做架啦....
呵呵呵....希望你真係開心啦...

21.04.2003 mon 03:00am

上次唔記得介紹，旺角家樂商場開左間 strawberry forever，
成間舖頭都係食strawberry的甜品(都有少量麵食)，
好似我呢d鍾意食士多啤利成狂入到去真係興奮到喊，
多謝菇同埋媽媽的好介紹，
我地入到去就叫左四個甜品，
超好食!不過價錢就貴左少少少，
不過我唔理，我點都要試哂全部甜品佢!
臨走個陣偷左個紙袋、數包糖同埋紙巾走，
上面都有strawberry forever個logo架!!
好得意好靚...
大家快d去食啦!!=)

19.04.2003 sat 03:47am

我又轉番以前的版面了，還是舊的好，
好多朋友仔見我轉左版面，要click多幾重野之後，
就懶惰起來，而我都因為下下要開dreamwaver update，
所以都懶起來了，現在只要開番note pad，
我又可以打過日記，還是簡單而又愚蠢的方法比較適合我。

你們睇唔睇到d字？
因為我知道唔同的電腦睇到的顏色會有少少唔同，
如果睇唔到就話比我知啦，我會好好調較調較的，
今次都係以藍色為主，係我由細到大都鍾意的顏色，
本人比較偏好灰藍，鍾意藍色就好似我鍾意奇連士文一樣，
唔會因為時間而改變的。
有好多人以為我最鍾意的是粉紅色，
其實粉紅色就是奧雲，如果佢再唔踢好些，
我就會鍾意代表橙色的gerrard，
哈，近來睇波的日子又多了，
也有和阿權講波，不過個次liverpool慘吞四球，
我睇到火起之餘阿權佢話成場波冇講過一句說話，
真係估唔到我睇邊場死邊場，
其實我應該支持曼聯。(。﹏。)

阿權對不起要你擔心了，
謝謝你的message，
我就知道g4是我一個可以安身立命的地方。
多麼希望我們仍然在同一間學校讀書，
笑著玩著罵著看著年復一年，
然後我仍然是你們口中的溫室小花，
不用經歷任何不愉快的變遷。
我總是、總是感到在我身邊的人，
像走馬看花般永遠捉不住，
就像跳交換parter的社交舞，
我在某個時段確實地捉住了某個人的手，
剎那間已經不是那個人了，
慢慢我知道這只是一個機械化的工序而已，
有什麼比要認知事實、長大和領悟來得更重要呢?
我還是喜歡孩堤時那單純的世界，
至少那時喜歡和不喜歡都會寫在臉上，
什麼時候開始，我會把自己的感覺珍而重之地收藏起來，
不願與人分享呢?
其實，作為朋友的最大希望，
都只是想有人需要自己而已。

如果唐瑄在五月頭出書，
我的fyp就一定趕唔切做的了。
珮還有「來便來，誰怕誰」的氣勢，
難不成唐瑄比畢業重要?
我不要呀!! P_____P

飛碟形仍然猖獗，各位小心好好保重!!
...happy easter...

<---想看再之前的軼事嗎? n_n