Education Update

The Newsletter of the Education Committee of Hmong Community, Inc.

Winter-1998

INSIDE THIS ISSUE

Mivnyuas Moob Coob By: Nyaj Ntxawg Kwm
Nujnqe Ntawm Kev Kawm Txuj By: Txwj Nruag Kwm
Ua Le Caag Mivnyuas Txhaj Noog Lug By: Nyaj Ntxawg Kwm
LAIB! LAIB! LAIB! By: Xeev Ntxawg Kwm

Mivnyuas Moob Coob
Tug sau: Nyaj Ntxawg Kwm, Newsletter Coordinator

Nyob rua huv Detroit Public School (DPS) hab Macomb Intermediate School District muaj mivnyuas Moob kawm ntawv coob heev le. Cov mivnyuas Moob taagnrho yog muaj 1,375 leej; cov kws eligible rua bilingual yog 1,015 leej. Huv Detroit, muaj 20 lub tsev kawm kws muaj naikhu Moob nyob rua huv. Cov naikhu Moob muaj taagnrho yog 26 leej. Txhais tau has tas muaj ib tug naikhu Moob paab rua 39 tug mivnyuas Moob. Ib tug naikhu yeej paab tsi tau 39 tug mivnyuas kuas zoo npaum le tug naikhu lub sab xaav le. Yog le ntawd, peb tseem tu ncua naikhu rua cov mivnyuas Moob.

School Teacher(s) # of Hmong Students # Eligible for Bilingual
Barbour Ntsuab Kaub Kwm 24 10
Burbank Tooj Nchai Kwm 21 14
Burroughs Xeev Ntxawg Kwm Ntsuab Kaub Kwm 125 95
Cleveland Ntsuab Kaub Kwm 21 11
Columbus Ntsuab Kaub Kwm 11 9
Denby Ntxhoo Yeeb Tsaab 25 25
Fleming Npib Vaaj Pov Vwj Meej Vaaj Tooj Zeb Yaaj Tub Ntxhw Haam 200 135
Golightly Txawjkhwv Kwm 37
Grant Ntsuab Kaub Kwm 17 15
Law Ntxhoo Yeeb Tsaab 24 23
Macomb Intermediate School District Tub Xyooj Joe Vwj Lauj Lis 200 133
Marquette Tooj Nchai Kwm 12 9
McGregor Tooj Nchai Kwm 22 15
Nolan Ntsuab Kaub Kwm 20 17
Osborn Txwj Nruag Kwm Paaj Ntxawg Kwm 183 153
Pulaski Ntxhoo Xwm Kwm Cecilia Lis 60 34
Richard Npib Hawj Maiv Npauj Vaaj Num Tuam Tsaab 165 115
Trix Amanda Kwm Tub Huas Yaaj 50 37
Von Steuben Lauj Vaaj Num Xuv Hawj 86 82
Wilkins Yeeb Kwm Txawj Pov Tsaab 109 83
20 schools 26 teachers 1375 1015

Macomb Intermediate School District yog cov tsev kawm ntawv feem ntau nyob rua Warren (8 mile rov rua peg). Huv Detroit mivnyuas Moob kawm ntawv coob tshaajplawg. Cov kws kawm nyob rua elementary yog muaj 790 leej; cov kws kawm rua junior high yog muaj 177 tug; hab cov kawm rua high school yog muaj 208 leej.

Nujnqe Ntawm Kev Kawm Txuj
Tug sau: Txwj Nruag Kwm, Teacher Osborn High School

Lub tebchaws twg muaj kev vaammeej, cov nom cov tswv ntawm lub tebchaws ntawd yeej muab txuj kev kawm txuj kawm ci saib tseemceeb tshaaj plawg txhua yaam huv tuabsi.

Tseeb tag, cov tebchaws xws le, Amesliskas, Faabkis, hab Zijpeem muaj kev vaammeej tshaaj plawg rua qhov tas luas muaj cov tuabneeg txawjntse coob heev.

Has txug ntawm peb cov Moob ne, yuav ua le caag peb txhaj le yuav muaj kev vaam meej xws le luas lwm haiv tuabneeg hab? Kuv yog ib tug Moob ib yaam nkaus le koj hab. Yog le ntawd, kuv thov teb rua koj paub tas yeej tsi muaj lwm txuj kev le lawm ntaag, tsuas yog kawg nkaus rua tuab txuj kev kawm txuj kawm ci xwb. Yog tas peb Moob tsi muab txuj kev kawm txuj kawm ci saib rau nqe ntshai peb yuav tsi muaj txuj kev vaammeej lawm yaav tom ntej vim tas txuj kev kawm txuj kawm ci yog tug yumsij kws yuav qheb peb lub qhovrooj moog rua txuj kev vaammeej.

Peb Moob yuavtsum ncu ntsoov tas peb yog ib cov tuabneeg poob teb poob chaws, zoo ib yaam nkaus ib cov mivnyuas qab kws tsi muaj nam kawm. Peb nam peb txiv yog ib cov tuabneeg toj sab kws yeej tsi muaj kev kawm txawj kawm ntse ib txwm lug.

Thaum kws peb paub peb Moob lub keebkwm lawm, peb cov ua tub los ntxhais yuavtsum rau sab ntso kawm ntawv kuas kawg sab kawg ntsws saib peb lub neej yaav peg suab puas yuav zoo tshaaj le peb nam peb txiv. Yog tas koj muaj kev txawj kev ntse lawm, koj yuav muaj peevxwm paab tau koj tsev tuabneeg. Dlhau ntawm koj tsev tuabneeg, koj yuav paab tau koj tej kwvtij hab tej neejtsaa. Dlhau ntawm, koj yuav paab tau lub teb lub chaws. Thaum kws koj muaj kev txawj ntse lawm, koj yuav dlhau moog ua ib tug tuabneeg paub sab paub qeg, yoojyim, sab ntev, sab dlawb sab zoo, hab muaj kev hlub tshua txug lwm tug.

Nub twg, peb Moob muaj cov tuabneeg txawj ntse coob le tau has lug sau nuav ces nub ntawd ntaag luaj peb Moob yuav muaj kev vaammeej xws le luas lwm haiv neeg.

Ua Le Caag Mivnyuas Txhaj Noog Lug
Tug sau: Nyaj Ntxawg Kwm, Newsletter Coordinator

Koj tug mivnyuas coj tug mojyaam zoo le caag tom tsev kawm ntawm tub yog vim thaum nyob tom tsev nwg yeej raug qhuabqha kuas ua le ntawd. Yog le ntawd, yog tas tug naikhu qha rua koj tas koj tug mivnyuas tsi tshuam noog lug, tej zag nwg yeej tsi noog lug tom tsev hab. Ua le tej yaam nraag qaab nuav yuav paab kuas koj tug mivnyuas coj zoo tsi has huv tsev lossis tom tsev kawm ntawv.
1. Ua yaamntxwv zoo rua nwg pum. Yog tas koj xaav kuas koj tug mivnyuas ntseeg has tas kev sis ntaus lossis kev sis ntsuag zug tsi yog yaam kws yuav dlaws tau teebmeem ces koj tsi xob siv nrig, siv taw, los siv tej paas ntaus nwg thaum kws nwg ua txhum.
2. Tsim kuas muaj kevcai (rules) rua koj tsevneeg. Tej nqai kevcai nuav yuavtsum yog tej yaam kws tsimnyog hab yoojyim rua txhua tug totaub. Tsi xob tsim muaj ntau ntau nqai.
3. Yuavtsum qha kuas koj tug mivnyuas paub tseeb has tas yog nwg hlaa tej kevcai ntawd, koj yuav rau txim lecaag rua nwg. Koj yuavtsum ua lawv nraim le koj has.
4. Paub hab txhawb tej kevcai tom tsev kawm ntawv. Qha rua koj tug mivnyuas tas nwg yuavtsum ua lawv le tej kevcai tom tsev kawm ntawv.
5. Txhawb hab qhuas koj tug mivnyuas txhua zag lossis txhua yaam kws nwg ua tau zoo.
6. Has zoo zoo xwb thaum kws koj qhuabqha koj tug mivnyuas. Kev tshev hab thuam tsi paab tug mivnyuas tabsis hajyam ua rua nwg poob qeg xwb.

LAIB! LAIB! LAIB!
Tug sau: Xeev Ntxawg Kwm, Chairman of Education Committee

**Mivnyuas laib yog ib yaam teebmeem luj kws taamsim nuav peb cov Moob ntsib nyob rua ib cheebtsaam nroog Detroit. Yaav taag lug peb tsuas nov luas has nyob rua California, Minnesota, losis Wisconsin. Tabsis taamsim nuav yog nyob rua huv peb zej peb zog, peb tsoom kwvtij neejtsaa, hab huv peb lub cuab lub yig lawm. Yog peb tsi ua tuab zoo saib hab lug thaam txug qhov nuav, peb cov mivnyuas hajyam yuav moog ua laib coob zuj zug tuaj xwb.
**Teebmeem yog tshwm qhov twg lug? Lawv le lub summer dlhau lug nuav, kuv tau ua ib qhov research txug tas Vim le caag mivnyuas Moob ua laib? Ib qhov luj kws peb nrhav tau yog tim lub cuab lub yig, tshwjxeeb yog tim peb cov kws yog leej txiv tsi lug tswj peb tej mivnyuas (fathers are losing their influence with their children).
**Tseeb tag yog peb xaav kuas mivnyuas tsimtxaj peb yuav tau qhuab. Peb Moob muaj ib lu lug has tas; "Hlub tsajtxu yuav tsum khi, Hlub tubki yuav tsum qhuab". Tej kws kuv xaav muab nthuav qha rua peb nuav tsi yog lug ntawm kuv tej tswvyim tabsis yog lug nyaj lug kub kws lug ntawm ib cov leejtxiv , xwbfwb, hab thawjcoj kws tub ntsib hab tshawb txug tej teebmeem nuav lawm.
**Qhov kws yuav paab tau kuas peb cov mivnyuas tsi moog ua laib ntxiv, peb cov kws yog leejtxiv yuav tsum tau ua peb yaam lawv le tau teev nyob rua huv phoo Family Studies, Book 1 le nraag nuav:

Leejtxiv yuav tsum ua tug coj: (Fathers who lead)
**Cobqha peb tej mivnyuas (teach our children).
*Kev cobqha yuav tsum pib qha thaus yug moog txug 12 **xyoos.
Qha kuas paub ua dlejnum huv vaaj huv tsev,
***ntxhua khaubdluag, ntxuav taig dlav, cheb tsev, txav nyom, *paub cai, txawj xaav, paub kwvtij neejtsaa hab hu luas lawv phaaj.

**Qhuab ntuag tej mivnyuas (discipline our children).
*Qhuab ntuag kuas paub qhov phem qhov zoo,
txawj coj **cai,
*fwm qhov yog hab ntxub qhov phem.

**Nrug peb tej muvnyuas uasi (do things with our children)
*Leejnam leejtxiv yuav tau coj tej mivnyuas nrug yug moog *vacation, moog saib kwvtij neejtsaa, noj mov cov zog, ***tabsis *yuav tsum tswj yug tej mivnyuas kuas nrug **yug txhua lub sijhawm xob pub puab moog dlha ywj *sab. Leej txiv ua *dlaabtsi *yuav tsum coj yug tej tub *nrug yug ua, leejnam moog qhov twg yuav tsum coj *tej ntxhai nrug moog, tsi has nuv ntseg ncaws pob, **ua teb, losis ua paajntaub.

Leejtxiv yuav tsum coj txuj kev zoo sab hab nyob kaav sab lug rua tsevneeg: (Fathers who bring contentment and happiness).
Ua rua tej quaspuj tubse txaus sab hab *nyob kaaj sab rua huv lub cuab lub yig yog leejtxiv le dlejnum. Tej ntawd yog lug ntawm leejtxiv txuj kev hlub, tug cwjpwm, kev coj, losis lub ncauj lub lug.

Leejtxiv yuav tsum muaj txuj kev ntseeg: (Fathers must *take a stand).
Qhov kawg nuav, leejtxiv yuavtsum ua taug txivneejyawg. Paub txavtxim sab rua yaam kws yug yuav ua xws le yuav coj yug lub cuab lub yig moog teev ntuj losis teevdlaab. Yog yuav ntseeg Vaajtswv, yuav tsum lawb dlaab hab coj quaspuj mivnyuas moog teev ntuj (moog church). Yog yuav ua dlaab, yuav tsum txi xwmkaab rua huv tsev kuas tej mivnyuas paub tas puab txiv tug Vaajtswv yog tug twg tag. **Tej kws tau has lug sau nuav yog tej yaam pib kws leejtxiv yuav tsum tau ua. Tseem tshuav ntau yaam kws yuav tau ua tomqaab tej kws has taag lug nuav. Peb suavdlawg le maam uake saib ntxiv moog nyob rua lwm tsaab xuvxwm.

HOME