Untitled

        Bacche, bene venies
Bacche, bene venies gratus et optatus,
per quem noster animus fit letificatus, 
  
        Istud vinum, bonum vinum vinum generosum,
        reddit virum curialem, probum, animosum. 
  
Bacchus forte superans pectora virorum
in amore concitat animos eorum. 
  
  
Bacchus sepe visitans mulierum genus
facit eas subditas tibi, o tu Venus. 
  
Bacchus venas penetrans calido liquore
facit eas igneas Veneris ardore. 
    
Bacchus lenis leniens curas et dolores
confert iocum, gaudia, risus et amores. 
  
Bacchus mentem femine solet hic lenire
cogit eam citius viro consentire. 
  
Bacchus illam facile solet expugnare,
a qua prorsus coitum nequit impetrare. 
  
Bacchus numen faciens hominem iocundum,
reddit eum pariter doctum et facundum. 
  
Bacche, deus inclite, omnes hic astantes
leti sumus munera tua prelibantes. 
  
Omnes tibi canimus maxima preconia,
te laudantes merito tempora per omnia.