Magkatapat Na Pag-Ibig
Minsan mayroong pag-ibig na nabuo
Na labis na nagpagulo sa tahimik kong puso
Pati sa isipan ito ay nagpalito
Ni hindi ko na alam ang gagawin ko

Buong maghapon magdamag pati sa gabi
Madalas na ako'y nagtatanong sa sarili
Pag-ibig kaya ito tanong ko sa isip
Pilit kong kinakapa sa aking dibdib

Pag-ibig na ito'y hindi kailanman nawaksi
Sa bawat araw at bawat oras ay lalong tumitindi
Madalas nangangarap na sana'y mapansin mo
Ang pag-ibig na itong nanatili sa puso

Lihim kong ito'y nanatiling lihim
Hanggang isang araw, ako'y iyong napansin
Naging malapit tayo't naging magkaibigan
Kaysarap ng nadarama kong kaligayahan

Akala ko'y lihim ko'y hindi mabubunyag
Hindi ko alam kung sino sa iyo'y nagpahayag
Pag-ibig kong ito na pilit kong itinatago
Sa isang iglap lang, iyong nabatid at natanto

Ngayon tila gumuguho ang aking mundo
Minsan naisip kong umiwas na lang sa iyo
Ngunit pag-ibig ko palang ito na isinekreto ko't itinatago
Ngayon pala'y mayroon katapat na kaligayahan sa puso

Nabatid ko ngayon at aking nalaman
Ang iyong niloloob at nararamdaman
Lihim rin pala pagmamahal mo sa akin
Sa takot mo na ika'y hindi ko mapansin

Nang malaman mong ikaw pala'y mahal ko
Nagkaroon ng lakas at sumigla ang iyong puso
Wala na ngayon ang pangambang ipadama sa akin
Ang pag-ibig mong minsan ri'y naging lihim

Pagmamahalang wagas ngayon ay nabuo
Kailanma'y sana huwag nang maglaho
Pangako ko sa iyo'y pagmamahal ko'y wagas
Pangako mo rin nama'y pag-ibig mo'y hanggang wakas

Kaysarap magkaroon ng katapat ang pag-ibig
Nadarama mo'y nadarama rin ng kanyang dibdib
Ang kaligayahan ninyo'y walang kahulilip
Anuman ang mangyari di mawawaksi sa iyong isip

Pag-ibig nga naman kung para sa isa't-isa
Magwalay man ng landas,sa huli'y kayo rin ang magsasama
Anuman ang naisin ng inyong mga puso
Buong ligaya't buong tamis itong matatamo...
Home Table of Contents Previous Next
1