Si apres quarante ans de fidele service,
Que celuy que je sers a fait en divers lieux,
Emploiant, liberal, tout son plus & son mieux
Aux affaires qui sont de plus digne exercice,

D'un hayneux estranger l'envieuse malice
Exerce contre luy son courage odieux,
Et sans avoir souci des hommes ny des dieux,
Oppose à la vertu l'ignorance & le vice,

Me doy-je tormenter, moy qui suis moins que rien,
Si par quelqu'un (peult estre) envieux de mon bien
Je ne treuve à mon gré la faveur opportune ?

Je me console donc, & en pareille mer,
Voiant mon cher Seigneur au danger d'abysmer,
Il me plaist de courir une mesme fortune.

Sortons (*Dilliers) sortons, faisons place à l'envie,
Et fuions desormais ce tumulte civil,
Puis qu'on y voit priser le plus lasche & plus vil,
Et la meilleure part estre la moins suivie.

Allons où la vertu, & le sort nous convie,
Deussions nous voir le *Scythe, ou la source du *Nil,
Et nous donnons plus-tost un eternel exil,
Que tacher d'un seul poinct l'honneur de nostre vie.

Sus donques, & devant que le cruel vainqueur
De nous face une fable au vulgaire moqueur,
Banissons la vertu d'un exil volontaire.

Et quoy ? ne sçais-tu pas que le bany Romain
Bien qu'il fust dechassé de son peuple inhumain,
Fut pourtant adoré du barbare coursaire ?