Ce pendant que tu suis le lievre par la plaine,
Le sanglier par les bois, & le milan par l'aer,
Et que voiant le sacre, ou l'espervier voler,
Tu t'exerces le corps d'une plaisante peine,

Nous autres malheureux suivons la court Romaine,
Où, comme de ton temps, nous n'oyons plus parler
De rire, de saulter, de danser, & baller,
Mais de sang, & de feu, & de guerre inhumaine.

Pendant, tout le plaisir de ton *Gorde, & de moy,
C'est de te regreter, & de parler de toy,
De lire quelque autheur, ou quelque vers escrire.

Au reste (mon *Dagaut) nous n'esprouvons icy,
Que peine, que travail, que regret, & soucy,
Et rien, que le *Breton, ne nous peult faire rire.

*Le *Breton est sçavant, & sçait fort bien escrire
En François, & Thuscan, en Grec, & en Romain,
Il est en son parler plaisant & fort humain,
Il est bon compaignon, & dit le mot pour rire :

Il a bon jugement, & sçait fort bien eslire
Le blanc d'avec le noir : il est bon escrivain,
Et pour bien compasser une lettre à la main,
Il y est excellent autant qu'on sçauroit dire :

Mais il est paresseux, & craint tant son mestier,
Que s'il devoit jeusner, ce croy-je, un mois entier,
Il ne travailleroit seulement un quart d'heure.

Bref il est si poltron, pour bien le deviser,
Que depuis quatre mois, qu'en ma chambre il demeure,
Son umbre seulement me fait poltronniser.