Lu Bordon du m'grand-pére

Dja stu naheter so l'bèrôdi
avå lès vîs rahisses,
tos affaires qui polèt chèrvi
mais dju n'sé qwand ni wice.
Tunant c'pagnêye a dès cruchons,
ås findâwès botêyes,
i-aveût la dès trawés bouchons,
dès casserales sins orêyes.
En-one neûre cwène, vola quu dj'vêu,
duvins l'ombe èt l'mistére,
come su d'èsse la i-èsteût honteûs,
lu bordon du m'grand-pére.

Tot l'cuhoyant po s'neûr nåli,
po fer toumer l'poussîre,
dj'a ruc'nohou l 'bwès dè mèsplî
ossi dâr quu dèl pîre.
Si dj'aveû mème trové d'l'årdjint,
on malkè d'blankès pèces,
dju n'areû né stu pus contint,
télmint quu dj'li fi fièsse.
Dju pou bin dire qu'a ç'moumintµla,
com s'i m'l'aveût fait lère ,
c'est m'bèle djônèsse qu'i m'runovela
lu bordon du m'grand-pére.

Vola pus d'cwèssante ans d'çoula :
mès deûs vîs sont rèvôye.
Bin vite dju sèrè d'vins l'même cas :
asteûre c'est mi qui plôye.
A m'tour, dju prinds, po m'raspouyî ,
su dj'mousse foûs dè manèdje,
lu bone èt fwète cane du mèsplî
po fer l'tour dè viyèdje.
Dju n'vou pu nol aute cupagnon
Dusqu'a tant qu'on m'ètére,
Et dj'wåde, come souvenir, lu bordon,
lu bordon du m'grand-pére.

JEAN-BAPTISTE BASTIEN

	Lu prumî pas
	A hamê
	Home Page
	Envoyer un mail à ANDRE LE PATISSIER

This page is hosted by Get your own Free Homepage