Ar ais
Back
|
An Mianadóir Tadhg Ó Muiris, 1999 |
|
Tá greim an fhir bháite ag na giúiseanna liath' Ar tonnta an eibhir, stoirm gan séideadh 'S go mbíonn an gála síorchruata ag ciapadh Farraige reoite na Scéithe. Ach thíos sa sloc seo níl gaoth ná báisteach Ach cleatar an chaighin is scréach an chábla Crónán an chreasa 's an béalmhír ag gearradh 'Gus laetha gan solas na gréine. Na gleannta a shiúlfainn im bhuachaill óg Fríd ghlaise an Earraigh 's bladhm an Fhómhair 'S mo bhaile ar bhruach na hOttawa Móire 'Sé d'fhág mé an méid sin im dhiaidh. Is céadta míle 'sea chuas go léanmhar Ar traein go dtí an Torcán Craobhach I ríocht iargúlta an mhúis is an bhéabhair D'fhonn obair a fháil insan mianach. Níor mhór dom mo mhuintir a thréigint faoi léan 'S mo dhriotháir caoin a gheobhaidh an fheirm Na goirt á saothrú 'ge faoi laomthacht na gréin' Is an spéir réaltógach istoíche. Ach thíos sa mhianach ó am go chéile Druidim na súile is téim im aigne Ar ais san áit chraobhach ar fhág mé slán léithe An cailín 'tá fós i mo chroíse. Is cuimhin liom cumhracht na hoíche faoi dhrúcht 'S mé im luí 's mo stóirín sínte taobh liom An ghealach ag scuabadh a ciabhfholt rua Is a brollach ar crith faoi mo lámha. Níl gealach-loinnir anseo sa mhianach 'S gur dubh an oíche 's í gan chríoch Ach lampa mo chlogaide ag lonrú go drithleach Fríd phutógaí óir an fho-dhomhain. |