Tomo III, Blg. 2 Abril-Hunyo 2004
Tomo III, Blg. 2 Abril-Hunyo 2004
San
Hunyo 30, 2004 nagtapos an primero na torno ni Mayor Lilia B. Gonzales nan an
onom na dati na mga miyembro san Sangguniang Bayan san Irosin na sira Pidoy
Cielo, Isol Michelena, Yolly Balaoro, Barog Gacias, Max Frivaldo nan Christian
Lim. Sa pareho na petsa, puwera kan Vice Mayor Peping Michelena, hinimo uli
an pagpasumpa sa kanira sa Irosin Public Auditorium, nan sa dowa na bag-o na
mga Kagawad na sira Endoy Fortes, na dati man na nag-ingkod bilang Kagawad san
bongto hanggan 2001, nan si Paring Delmonte, an dati na Kapitan san Barangay
San Pedro, Irosin. An pagpasumpa san Mayor nan walo na mga Kagawad san bongto
kinondukta sa pangunguna ni Gobernador Raul R. Lee na nagpasumpa san ika-kwarenta
na proklamado na Mayor Lilia B. Gonzales, nan si RTC Judge Fred Jimena mao man
an nag-pasumpa sa onom na dati nan dowa na bag-o na mga Kagawad.
Bilang
pasasalamat, pangako san bilog na miyembro san konseho munisipal na ipadagos
an mga programa na diri nahoman sa solod san nakalipas na tolo kataon. Mas hahatagan
gihapon nira sin prayoridad an mga proyekto may relasyon sa pag-asenso san bongto
pareho san komunikasyon o an Irosin Internet Project, na may nakakonektar na
sa mga balay nan mga establisyemento. Mahatagan dagdag na pondo an programa
sa salud. Madagdagan an kaaraman san mga kabataan sa paagi san programa sa edukasyon.
Maataman nan mabantayan an mga proyekto manongod sa kapalibutan. Bilog an paglaom
san grupo na wara na sin kaulangan para diri nira mahoman an mga pangaturugan
na maging progresibo an saato bongto sa pangunguna ni Mayor Lil, Vice Mayor
Peping Mchelena nan an intero na mga bag-o na ilihido. Sorpresa man na nagbisita
sa okasyon sira Vice Governor Kruni Eskudero san probinsiya san Sorsogon, si
Mrs. Flordeliza Solis, an asawa nan representante ni Congressman Joey Solis
san Segundo Distrito san Sorsogon, Bokal Arze Glipo nan an mga miyembro san
pamilya san mga pinasumpa na opisyales.
Kasugpon sini, pinapasabot man san mga miyembro san Sangguniang Bayan na may bag-o na proseso niyan sa session hall. Bag-o na iskima nan puwesto san mga ingkodan kon diin an sayo na miyembro may-on sin sadiri na lamesa na siway sa iba na mga miyembro. Nan kon an sayo na miyembro san konseho may sasabihon sa panahon sin sesyon, siya dapat makadto sa atubangan para ipresentar nan ipakilala an kaniya sadiri nan tema. Bag-o an sayo na mosyon o prosopuwesto, dapat maghatag ngon-a kagalangan una, sa Presiding Officer, ikadowa sa mga kaopod sa konseho, nan, o kon kankonay ini ipapaabot.
An
Gabay sa Hinaharap ng Kababaihan (Gahi Ka) Incorporated nagselebrar san ika-lima
na anibersaryo san Hunyo 12, 2004. Ini na organisasyon pinundar ni Mayor Lil
Gonzales na may ka-tuyuhan na makadanon sa mga ka-babayehan sa bilog na bongto.
An iba pa na mga opisyales na nag-atinder mao sira Gloria Bañares, Emma Monedo,
Alma Abear, Violeta Santiago, Aurora Soriano nan Soledad Gapas. Sa pagselebrar,
maw-ot san intero na miyembro na may bendisyon an Mahal na Diyos kaya binatugan
ini sin sayo na misa sa simbahan san San Miguel de Arkanghel. Pagkatapos san
misa, deretso na nag-oropod an intero sa sayo na parada sa palibot san poblasyon
sa pagkomemorar san adlaw sin katalingkasan kasabay san mga empleyado san munisipyo
nan iba-iba pa na grupo. Katakod sini, nagkamay-on sin maogmahon na programa
sa Gonzales Auditorium kon diin manlaen-laen na pauyag, ginahoy nira na Laro
ng Lahi, an inintrahan san mga miyembro pareho san piko, luksong lubid, kadang
nan iba pa. An mga nanggarana hinatagan man mga premyo hali sa kada miyembro
san Board of Directors. Apuwera san mga pauyag, inanunsyar man ni Mayor Lil
na may singko mil siya na ihahatag hali sa kaniya bulan-bulan na suweldo para
gamiton sa mga proyektong pangkabuhayan san kababayehan. Didto man pinakilala
an lima na mga iskolar na nakabenepisyar sa GahiKa Scholarship Program kon diin
maka-eskuwela libre sa solod sin opat kataon sa kurso na gusto sa Veritas College
san Irosin batog niyan na taon.
Kada
Hunyo 12 pirmi inkokomemorar an adlaw sin katalingkasan o Independence Day.
Sa bongto san Irosin, pirmi man inhihimo an sayo na parada sa palibot san poblasyon
pagka-aga san petsa dose na inpapartisiparan san mga empleyado nan opisyales
san gobyerno lokal nan nasyonal, an manlaen-laen na representante san Non-Government
Organizations, People’s Organization, an pribado na sektor, mga negosyante nan
miyembro san Senior Citizen’s Association. Katakod sini, may halip-ot man na
programa kon diin inpapadomdom sa mga partisipantes, sa paagi sin istorya, an
pangyayari san primero iproklama an independensiya san ato nasyon, nan kon pan-o,
o sin-o an mga imbuwelto sa pangyayari na ini. Naunabihan man kon nano an mga
kadianisan o bentahe san may demokrasya na nasyon pareho san Pilipinas. Sa pag-unabi,
nag-alay man mga burak an kada grupo sa atubangan san monumento ni Dr. Jose
P, Rizal bilang pasasalamat san pagpamangno, pagpromoter nan pangunguna san
pag-alsa kontra sa mga mananakop na mga dayuhan.
Niyan
na iriskuwelahan 2004-2005 beinte otso (28) na mga kwalipikado, matali nan pobre
na mga estudyante an nabenepisyaran base sa mga rekisitos manongod sa Scholarship
Program na inhahatag san Lokal na Gobyerno san Irosin sa pamamahala san Sangguniang
Bayan. Ini na mga estudyante naka-enrol sa gusto nira na kurso sa Veritas College
san Irosin na wara poproblemahon sa kanira tuition fee nan iba pa na mga bayadan
sa solod sin opat kataon hanggan maka-gradwar sa kolehiyo. Base ini sa Ordinansa
Numero 5 na pinasar nan inaprobahan san Sangguniang Bayan sa pamumuno ni Vice
Mayor Peping Michelena, apuwera kon an sayo na iskolar nagbalga sa sayo sa mga
probisyones na nakasurat sa nasabi na ley. Ini na prebilihiyo inhahatag sa mga
estudyante na may average na grado na 85% pataas, diri malampas sa trenta mil
pesos an taonan na intrada san magurang, wara maraot na kaugalian base sa sertipiko
na inhahatag hali sa barangay, nan masunod sa mga regulasyon na inpapaotob san
namamahala sini na programa.
Katakod sini, an 28 na mga iskolar kaopod si Kagawad Barog Gacias, an Chairperson san Komitiba san Edukasyon, nagkortesiya sa Hepe Ehekutibo san bongto na si Mayor Lilia B. Gonzales para magpasalamat nan maghatag kagalangan. Nangako sira na mahingoha na maotob an kamaw-otan san gobyerno lokal nan makadanon man, sa maabot na panahon, sa mga kasaragdayan na kwalipikado man sa nasabi na programa. Irogon an ehemplo na in-iimplementar san presente na administrasyon sa pangunguna san Mayor nan san mga miyembro san Sangguniang Bayan san Irosin.
San Mayo 7, 2004, an grupo sin mga para-habol sa Barangay Cogon, Patag nan Carriedo, Irosin, Sorsogon nagkasayo na mag-oropod sa educational tour sa Buhi, Camarines Sur para imodon an bantog na produkto san paghabol o loom weaving. Sa pag-estudyar san paghabol, naimod nira didto nan nagkamay-on ideya an grupo kon pan-o himoon an may kalidad na produkto na gamit an iba-iba na materyales nan desinyo. Inaram man nira kon pan-o ini naging mabenta sa merkado nan kon pan-o makadanon sa mga kababayehan na gusto magkamay-on dagdag na intrada sa pang-oro-adlaw nira na pangangaipo. An ralakwatsa sa Camarines Sur sayo na pag-aradal na in-isponsor san opisina san Municipal Social Welfare and Development sa pangunguna ni Pamela Madrid, an Social Welfare Officer san Irosin na mao man an namamahala san pa-training sa loom weaving sa mga barangay nan sa Hin-ay Regional Training Center. An mga partisipantes sa tolo na mga barangay mao man an magiging trainor o paratukdo kon nano o pan-o an mga dapat maaraman san kaniya kaoropod. An paghabol sayo sa mga programa san Gobyerno Lokal san Irosin para makadanon sa pagbuhay san mga pobre ta na konstituwentes lalo na an mga kababayehan.
San mga nakaagi na panahon, kon an bata na nabuhay sa mga magurang na diri kasal (illegitimate children) base sa Family Code of the Philippines, pirmi makowa sin apelyido san ina sa pagparehistro. Niyan, na naaprobahan an Republic Act No. 9255 san Pebrero 24, 2004, nagtutugot na na gamiton san bata an apelyido san ama sa pagparehistro nan makaayo suporta sa kaniya ama, depende sa kakayahan sini. Ini, mangyayari man kon an ama magtutugot na sunudon an regulasyon o kaya, inaako nan tinutugotan niya an irog sini na regalamento o obligasyon. Mientras tanto, an mga giya kon pan-o an mga manera san nasabi na transaksyon nan kon pira an mga bayadan sa pagpaliwat pangaran san bata maaraman batog sa bulan san Agosto niyan na taon.
An
Child and Youth Welfare Program sayo sa mga programa san Municipal Social Welfare
and Development Office na naghahatag mga benepisyo sa mga bata na may edad nuwebe
anyos hanggan katorse anyos nan miyembro san Irosin Children Federation. San
Hunyo 4-5, 2004 nagkatiripon an intero na mga miyembro sa Senior Citizen’s Building
para ipromoter an kalinigan, imantiner an mayad na salud nan kabisayan sa palibot
san kada barangay. Sayo pa san mga aktibidad na pinartisiparan san mga bata
mao an pagrecycle san mga plastik, bote, lata nan iba pa na mga intatarapok
na basura na puwede pa magamit. Ini pinorma nira na mga pencil holder, cellphone
holder, flower base nan iba pa na mga gamit sa balay, sa opisina nan sa eskuwelahan.
Katakod sini, tinukduan man sira kon pan-o an tama na pagmanehar san mga basura
na natutunaw nan diri natutunaw. Pinakaimportante an pagmangno san kalinigan
sa kapalibutan. Sa ikadowa na adlaw, nag-atinder sira sa sayo na seminar may
relasyon sa values formation o an mayad na pag-uugali, pakikibagay o pakiopod
sa tawo, nan kaaraman sa kahalagahan san pamilya kon diin sayo sira sa mga miyembro.
Daghanon pa an dapat maipadagos nan maimplementar na mga programa para sa mga
bata sa danon san lokal na gobyerno, an opisina san MSWD, nan san kanya-kanya
sadiri na pamilya, Pero ini marereyalisar lang kon may pagmakolog an kada sayo
na aramon an mga deretsos san mga kabataan.
Pira kaadlaw o bulan an nakaagi pagkatapos san eleksyon, daghanon na an naproklamar na mga nanggarana san kanira kandidatura batog sa mga Kagawad san bongto hanggan sa mga Senador, pero sa Presidente nan Bise Presidente, may duda pa kon sin-o talaga an legal na nanggarana, maski ngani sabihon ta na prinoklamar na sira san hatag-as na kongreso, daghan pa man gihapon an naghahapot kon tama lang na akoon an kanira pag-okupar sa puwesto. Sa parte san mga nagkapirerdi, daghanon an mga rason o ngaya dayaan kaya naaatraso an pagproklama. An iba, insasahotan na kon kaya kono nanggana kay naggamit sin kwarta para ipamakal sin boto. Siyempre may kanya-kanya dahilan para maibitaran an karaw-ayon sa tawo. Diri nira kaya akoon na sira napirde dahil maloya an makinarya, kulang palakaya nan diyo an kaaraman sa pagmamanehar kon pan-o manggana. Nan siyempre pa, kada sayo nagmamaw-ot kapangganahan sa malinig o maati na paagi o sa kon nano man na ralaban. Pero domdomon ta na an Diyos lang an nakaaram kon sin-o an makapuwesto pagkatapos san aktibidad, eleksyon man o sorogal. Pagkatapos san korosokoso, sayo sa mga puwede himoon san nag-eentra sa mga irog sini na oroyag, an akoon an kaperdihan, erespito an desisyon san kadaghanan, nan san mga awtoridad na nagdedesisyon sini. Wara dapat mag-isip na magkamay-on kariribokan dahil lang sa diri naotob an sayo na kapritso sin sayo na kandidato. An pag-aprobitsar san mga homot nan pagmo-motomoto san iba na diri nakaopod sa mga nanggana, diri dapat gatongan para lang maging popular o sikat sa sala na mga disposisyon. Paggalang nan pagpapakombaba an pina-kahatag-as na lebel sin pag-ako kaperdihan. Magkasarayo gihapon nan magdaranon para maipadagos an naatraso na pagpapauswag sa sayo na lugar maski an dati o an bag-o man na opisyal an nakaingkod sa puwesto. Limoton an mga kamonduan dara san eleksyon na an kadaghanan diri an mga kandidato an nagtatanom, kundi an mga kaalyado, mga lider, nan mga suportador san sayo na kandidato. Sa mga nanggarana, hingohaon na maotob an saiyo mga panuga, odok sa boot na atubangon an obligasyon nan pagserbi sa tawo. Ongodon an legal na pag-atulgar o pag-administrar san gobyerno, Para maski mag-otro magkandidato, may-on espiho o panalmingan sin mayad nan epektibo na liderato na mapagbabasehan san mga elektorados.
An
Summer Basketball Tournament o Larong Isports Lang (LIL) na inkokondukta kada
bakasyon para sa mga kabataan pinamahalaan niyan na taon san Municipal Federation
of Sangguniang Kabataan sa pamumuno ni SK Federation President Kgd. Christian
Imperial sa kooperasyon san Lokal na Gobyerno san Irosin sa pamamahala ni Mayor
Lilia B. Gonzales. An barasketbol binatugan san Abril 27, 2004 nan natapos san
Hunyo 27, 2004. Sa napolo na teams na nagpalista sa Junior Division, an San
Julian Team an nag-Champion. Sa Senior Division, may walo man na team an nag-entra
na pinangunahan san San Juan Team bilang Champion na mao man an napili na Best
in Uniform. Primyado man bilang Most Valuable Player si Edgardo Francisco sa
Junior Division, nan si Ferdinand Belo sa Senior Division Sa dowa na dibisyon,
nakaresibi an mga nanggarana sin mga tropiyo nan medalya hali sa Pederasyon
san mga Kabataan nan sa Lokal na Gobyerno san Irosin na hinatag pagkatapos mismo
san Championship games.
San Mayo 25-26 nan 27-28 san taon 2004, dowa na grupo san may 172 na mga miyembro san Barangay Tanod sa bilog na bongto an nag-atinder seminar sa Gonzales Auditorium sa pag-imbitar san opisina san Department of the Interior and Local Government (DILG) sa pamumuno ni MLGOO Felix Cal-Ortiz. Sayo sa mga tinukdo sa mga partisipantes mao an aktwal na pagparong san kalayo kon may sunog. Batog sa pagkabit san firehose sa firetruck, pag-abre san tubi sa firetruck nan pagbomba didto mismo sa nasusunog na bagay. Ini pinamunuan ni SFO2 Thomas Deo, an Provincial Fire Prevention Officer nan SFO2 Nelson Dioquino, an Municipal Fire Marshal san Irosin. Sa pagdepensa san kanira sadiri, tinukduan man ni Florentino Pecate an mga tanod manongod sa Arnis. Si Police Chief Edgardo Iglesia mao man an nagpaliwanag manongod sa mga leyes na dapat maaraman san mga Barangay Tanod. Sayo didi an kon pan-o an pag-aresto san suspetsado, an pagposas, nan an mga kaso na puwede isang-at sa nagkasala o sa mga tanod na nakabalga bilang sayo na awtoridad. In-eksplikar man ni Mr. Cal-Ortiz an mga limitasyon nan mga deretso san sayo na miyembro san Barangay Tanod, kon san-o ini dapat ipaotob o iaplikar, sa oras sin pag-atulgar san kanira katungdan na pangkatuninungan o sa pagsalbar sa peligro san mga tawo sa kanira komunidad.
An
mga empleyado na lalaki san Munisipyo san Irosin nagbatog na naman sa pagharawan
sa palibot san poblasyon batog san Biyernes niyan na Hunyo 11, 2004. Nagbatog
an pagrilimpya alas tress an hapon sa may kanto san Manuel L. Quezon Street
nan Teodora Alonzo Street pakadto sa may Claro M. Recto Street. An mga empleyado
na obligado magpartisipar nan nagdara mga sondang, kagkag, asadol, pala nan
mga silhig, dinanonan man san iba na mga empleyado san Sangguniang Bayan para
halion an mga ging-ot nan nagkamarag na manlaen-laen na ati. Sa hinimo na harawan,
inpapadomdom sa mga tawo nan sa bilog na konstituwentes san bongto an kadianisan
san malinig na palibot diri lang sa poblasyon, na mao an pinakasentro, kundi
lalo sa mga Barangay para maibitaran an pagdaghan san hapdos na dara san maati
na kaapalibutan. Maging halimbawa man ini san mga tawo na maski an may permanente
na mga trabaho pareho san mga empleyado san munisipyo naghaharawan, nano man
an rason para diri mahimo san mga kaoropod ta sa baryo.
Dowa na magkasunod na seminar-workshop an inatinderan san mga miyembro san Bids and Awards Committee (BAC) san Lokal na Gobyerno san Irosin sa Legaspi City san Hunyo 2004. An una, sayo na Enhancement Training workshop manongod sa Republic Act 9184 na hinimo san Hunyo 3-4 sa La Trinidad Hotel. Inatinderan ini nira BAC Chairman Engr. Ben Gabionza, an mga miyembro na sira Engr. Edwin Garcia nan Felix Ortile, an miyembro san Secretariat na sira Ma. Julie Tubianosa nan Rachel Panti, nan an Municipal Accountant Sol Jimena para maaraman an mga tama na pagmanehar. Katuyuhan man san nasabi na seminar na maipasabot an tama na manera sa pagbakal mga gamit sa opisina, mga proyekto, infra-istruktura, nan mga consulting services sa mga ahensiya san gobyerno.
An
nasabi na seminar-workshop pinangunahan san mga representante hali sa Department
of Budget and Management, DILG, Commission on Audit nan Philippine League of
Budget Officers sa koordinasyon san League of Cities of the Philippines. An
pangdowa na seminar hinimo man san Hunyo 22-24 sa Commission on Audit Regional
Training Center sa Rawis, Legaspi City na inatinderan gihapon nira Engr. Ben
Gabionza, an BAC Vice Chairman, Mike Tan, Engr. Edwin Garcia, Rosemarie Sayson,
Bicbic Tubianosa, nan Rachel Panti. Si Municipal Accountant Sol Jimena nagpartisipar
man bilang observer. Didi in-review an Republic Act 9184 o an Government Procurement
Reform Act and its Implementing Rules and Regulations. Lininaw man an mga isyu
nan problema na naeksperyensyahan san mga miyembro lalo na sa implementasyon
san mga bag-o na ley na dapat ipaabot sa Government Procurement Policy Board
(GPPB). Lininaw man an mga probisyon manongod sa RA 9184 na inaprobahan san
Oktubre 9, 2003. An mga representante hali sa COA na pinangunahan áÐÕ‚GET http://windowsupdate.microsoft.com/ita Nota nan Mr. Jose Rey Binamira mao an nagpasilidad
nan nag-eksplikar san mga tema may relasyon sa Bids and Awards.
From: Lorna Evasco <memberid@optoline.net>
To the Irosin Geocities.com Staff,
Matibayon an iyo grupo kay naipaimod niyo sa buong mundo an ato bungto! Congratulations sa mga bag-o na nailihir na opisyales san ato bongto. Right now, I am a teacher here in New York. You can visit my school website at www.ms158.org. I would like to greet my friends at the District of Irosin-most especially to Liezl, Coring, Tersing and the rest of Grade VI teachers. Kumusta man sira Flor, Etas, Mila and Moding. I hope to read more news from your website about our town. Regards and God bless to Mama and Papa, Manay and Bing, Adon and Mias, Andro, Igor and Ivana.
Malou
From: Jun Salao <aimeljun@macau.ctm.net
Mabuhay IROSINIANS! I just would like to congratulate our mayor elect Hon. Mayor Ma. Lilia B. Gonzales for another term to serve our hometown IROSIN. May you continue to serve your constituents as you have started. My deepest CONGRATULATIONS and more power!!! HELLO also to my brother Alan Gragas and the rest of the family. Mag-e-mail ka rin dito sa amin sa Macau. Balitaan mo kami ng nangyayari dyan tungkol sa election. Dios mabalos saindo gabos!!!
Laila Gragas
ERRATUM: AN IBA PA NA MGA MIYEMBRO SAN BIDS AND AWARDS COMMITTEE... sa pagkorehir san artikulo sa pahina 6 san Irosin Newsletter na naglowas san Enero-Marso 2004 na isyu, ikaklarado lang na diri kaopod si Municipal Accountant Consolacion B. Jimena bilang miyembro san Bids and Awards Committee san Lokal na Gobyerno san Irosin.
MABUHAY KA, IROSIN!
Municipal
Information Office, Municipal Compound Irosin, Sorsogon
Nagluluwas kada tolo ka-bulan Tel./Fax No.: 557-3043 Email: irosin@geocities.com
Mga Nagkontribwer: Pamela Madrid, Ghie
Martinez, Barog Gacias, Yolly Balaoro, Adonna Esparrago, Glo Bañares, Felix
Cal-Ortiz III, Ric Frivaldo, Rachel Panti, Erlano Gacias, Ari Grajo
Online na Edisyon: Noel Mercado II
Back to top