*Magny, je ne puis voir un prodigue d'honneur
Qui trouve tout bien fait, qui de tout s'esmerveille,
Qui mes faultes approuve, & me flatte l'oreille
Comme si j'estois prince, ou quelque grand seigneur.

Mais je me fasche aussi d'un fascheux repreneur,
Qui du bon & mauvais fait censure pareille,
Qui se list voluntiers, & semble qu'il sommeille
En lisant les chansons de quelque autre sonneur.

Cestui-la me deçoit d'une faulse louange,
Et gardant qu'aux bons vers les mauvais je ne change,
Fait qu'en me plaisant trop à chacun je desplais :

Cestui-cy me degouste, & ne pouvant rien faire
Qui luy plaise, il me fait egalement desplaire
Tout ce qu'il fait luymesme, & tout ce que je fais.

Je hay du Florentin l'usuriere avarice,
Je hay du fol Sienois le sens mal arresté,
Je hay du Genevois la rare verité,
Et du Venetien la trop caute malice :

Je hay le Ferrarois pour je ne sçay quel vice,
Je hay tous les Lombards pour l'infidelité,
Le fier Napolitain pour sa grand' vanité,
Et le poltron Romain pour son peu d'exercice ;

Je hay l'Anglois mutin, & le brave Escossois,
Le traistre Bourguignon, & l'indiscret François,
Le superbe Espaignol, & l'yvrongne Thudesque ;

Bref, je hay quelque vice en chaque nation,
Je hay moymesme encor' mon imperfection,
Mais je hay par sur tout un sçavoir pedantesque,