Pourquoy me gronde-tu, vieux mastin affamé,
Comme si *Dubellay n'avoit point de defense ?
Pourquoy m'offense-tu, qui ne t'ay fait offense,
Sinon de t'avoir trop quelquefois estimé ?

Qui t'ha, chien envieux, sur moy tant animé,
Sur moy, qui suis absent ? croy-tu que ma vangeance
Ne puisse bien d'icy darder jusques en *France
Un traict, plus que le tien, de rage envenimé ?

Je pardonne à ton nom, pour ne souiller mon livre
D'un nom, qui par mes vers n'a merité de vivre :
Tu n'auras, malheureux, tant de faveur de moy :

Mais si plus longuement ta fureur persevere,
Je t'envoiray d'icy un foet, une Megere,
Un serpent, un cordeau, pour me vanger de toy.

Si *Pirithois ne fust aux enfers descendu,
L'amitié de *Thesé' seroit ensevelie,
Et *Nise par sa mort n'eust la sienne ennoblie,
S'il n'eust veu sur le champ *Eurial' estendu :

De *Pylade le nom ne seroit entendu
Sans la fureur d'*Oreste, & la foy de *Pythie
Ne fust par tant d'escripts en lumiere sortie,
Si *Damon ne se fust en sa place rendu :

Et je n'eusse esprouvé la tienne si muable,
Si Fortune vers moy n'eust esté variable.
Que puis-je faire donc, pour me vanger de toy ?

Le mal que je te veulx, c'est qu'un jour je te puisse
Faire en pareil endroit, mais par meilleure office,
Recognoistre ta faulte, & voir quelle est ma foy.