*Gordes, que *Dubellay ayme plus que ses yeux,
Voy comme la nature, ainsi que du visage,
Nous a fait differents de meurs & de courage,
Et ce qui plaist à l'un, à l'autre est odieux.

Tu dis : je ne puis voir un sot audacieux,
Qui un moindre que luy brave à son avantage,
Qui s'escoute parler, qui farde son langage,
Et fait croire de luy, qu'il est mignon des Dieux.

Je suis tout au contraire, & ma raison est telle :
Celuy, dont la doulceur courtoisement m'appelle,
Me fait oultre mon gré courtisan devenir :

Mais de tel entretien le brave me dispense,
Car n'estant obligé vers luy de recompense,
Je le laisse tout seul luy mesme entretenir.

Cent fois plus qu'à louer on se plaist à mesdire ;
Pource qu'en mesdisant on dit la verité,
Et louant, la faveur, ou bien l'auctorité
Contre ce qu'on en croit fait bien souvent escrire.

Qu'il soit vray, prins-tu onq tel plaisir d'ouir lire
Les louanges d'un prince, ou de quelque cité,
Qu'ouir un *Marc *Antoine à mordre exercité
Dire cent mille mots qui font mourir de rire ?

S'il est donques permis, sans offense d'aucun,
Des meurs de nostre temps deviser en commun,
Quiconques me lira, m'estime fol, ou sage :

Mais je croy qu'aujourdhuy tel pour sage est tenu,
Qui ne seroit rien moins que pour tel recogneu
Qui luy auroit osté le masque du visage.