Il fait bon voir (*Paschal) un conclave serré,
Et l'une chambre à l'autre egalement voisine
D'antichambre servir, de salle, & de cuisine,
En un petit recoing de dix pieds en carré :

Il fait bon voir autour le palais emmuré,
Et briguer là dedans ceste troppe divine,
L'un par ambition, l'autre par bonne mine,
Et par despit de l'un, estre l'autre adoré :

Il fait bon voir dehors toute la ville en armes,
Crier le Pape est fait, donner de faulx alarmes,
Saccager un palais : mais plus que tout cela

Fait bon voir, qui de l'un, qui de l'autre se vante,
Qui met pour cestui-cy, qui met pour cestui-la,
Et pour moins d'un escu dix Cardinaux en vente.

Veuls-tu sçavoir (*Duthier) quelle chose c'est *Rome ?
*Rome est de tout le monde un publique eschafault,
Une scene, un theatre, auquel rien ne default
De ce qui peult tomber es actions de l'homme.

Icy se void le jeu de la Fortune, & comme
Sa main nous fait tourner ores bas, ores haut :
Icy chacun se monstre, & ne peult, tant soit caut,
Faire que tel qu'il est, le peuple ne le nomme.

Icy du faulx & vray la messagere court,
Icy les courtisans font l'amour & la court,
Icy l'ambition, & la finesse abonde :

Icy la liberté fait l'humble audacieux,
Icy l'oysiveté rend le bon vicieux,
Icy le vil faquin discourt des faicts du monde.