Flatter un crediteur, pour son terme alonger,
Courtiser un banquier, donner bonne esperance,
Ne suivre en son parler la liberté de *France,
Et pour respondre un mot, un quart d'heure y songer :

Ne gaster sa santé par trop boire & manger,
Ne faire sans propos une folle despence,
Ne dire à tous venans tout cela que lon pense,
Et d'un maigre discours gouverner l'estranger :

Cognoistre les humeurs, cognoistre qui demande,
Et d'autant que lon a la liberté plus grande,
D'autant plus se garder que lon ne soit repris :

Vivre aveques chacun, de chacun faire compte :
Voila, mon cher *Morel (dont je rougis de honte)
Tout le bien qu'en trois ans à *Rome j'ay appris.

Marcher d'un grave pas, & d'un grave sourci,
Et d'un grave soubriz à chacun faire feste,
Balancer tous ses mots, respondre de la teste,
Avec un Messer non, ou bien un Messer si :

Entremesler souvent un petit, Et cosi,
Et d'un son Servitor' contrefaire l'honneste,
Et comme si lon eust sa part en la conqueste,
Discourir sur *Florence, & sur *Naples aussi :

Seigneuriser chacun d'un baisement de main,
Et suivant la façon du courtisan Romain,
Cacher sa pauvreté d'une brave apparence :

Voila de ceste court la plus grande vertu,
Dont souvent mal monté, mal sain, & mal vestu,
Sans barbe & sans argent on s'en retourne en *France.