D'ou vient cela (*Mauny) que tant plus on s'efforce
D'eschapper hors d'icy, plus le Demon du lieu
(Et que seroit-ce donq si ce n'est quelque Dieu ?)
Nous y tient attachez par une doulce force ?

Seroit-ce point d'amour ceste allechante amorse,
Ou quelque autre venim, dont apres avoir beu
Nous sentons noz espritz nous laisser peu à peu,
Comme un corps qui se perd sous une neuve escorse ?

J'ay voulu mille fois de ce lieu m'estranger,
Mais je sens mes cheveux en fueilles se changer,
Mes bras en longs rameaux, & mes piedz en racine.

Bref, je ne suis plus rien qu'un viel tronc animé,
Qui se pleint de se voir à ce bord transformé,
Comme le Myrte Anglois au rivage d'*Alcine.

Qui choisira pour moy la racine d'*Ulysse ?
Et qui me gardera de tomber au danger
Qu'une *Circe en pourceau ne me puisse changer,
Pour estre à tout jamais fait esclave du vice ?

Qui m'estreindra le doy de l'anneau de *Melisse,
Pour me desenchanter comme un autre *Roger ?
Et quel *Mercure encor' me fera desloger,
Pour ne perdre mon temps en l'amoureux service ?

Qui me fera passer sans escouter la voix
Et la feinte douceur des monstres d'*Achelois ?
Qui chassera de moy ces *Harpyes friandes ?

Qui volera pour moy encor' un coup aux cieux,
Pour rapporter mon sens, & me rendre mes yeux ?
Et qui fera qu'en paix je mange mes viandes ?