Pilloni chi sesi
Pilloni chi sesi de tantis e tantis
Non serbit chi cantis; torrandind'andai.
Torrandind'andai ai cuddus limonis
Ai cuddus arrangius, chi aprimu abitasta;
Aundi cun suavis, e bella canzonis
Is oras, is mesis, is annus passasta:
Su cantu mudasta de dognia genia
Cun fint'armonia po tindi burlai.
Po tindi burlai mudasta su cantu
In cussu giardinu de floridas plantas,
A chini has lassau tristura cun prantu
In cambiu de s'affettu chi mostras e vantas!
Invanu mi cantas, pilloni fingiu,
In giardinu miu non podis intrai.
Intrai no podis in custu giardinu,
Poita si nci fessit planta preziada,
Prus de sa viola, gravellu, e gesminu,
O de una rosa sa prus delicada,
Est arriservada po cust'arrexoni
A mellus pilloni de dda meritai.
Est arriservada sa plant'a unu solu
Pilloni innozenti de sa primavera,
Chi tenga su cantu de arressignolu,
Comenti cumbenit a sa giardinera.
Lassa sa chimera; torra a is primus follas;
Salvu chi non bollas aturu provai...
Salvu chi non bollas fai ataras provas,
Gira sa campagna canta, gioga, e fui:
Custa giardinera zertu no dd'imbovas
Cun su dulci cantu chi presumis tui.
Là! po no arrui t'avvertu, pilloni,
Don'attenzioni, lassa s'ingannai.
Lassa s'ingannai; tui beni scis,
Chi portas pesantis is pinnas in palas;
De su chi ti nau forzis tind'arris,
E de matta in matta, mischinu, ti scialas.
Mira poi is alas non tanti seguras;
Si no ti ddas curas, lassas su bolai.
Pilloni chi sesi de tantis e tantis,
Non serbit chi cantis, torradind'andai.
Efisio Pintor Sirigu
18th century Campidanese
