Nasubukan mo na bang
lakarin ang buong haba
ng Taft sa ilalim ng ulan?
Na sa simula'y balat mo'y
dinaplisan ng ambon
na dahan-dahang lumakas
at dumami ang patak
hanggang sa tuluyang bumuhos?
Nagawa mo na bang
imbis maghanap ng silong
sa mga gusali sa tabi
ng daan o sa ilalim ng LRT
ay hayaang mabasa ang
buo mong katawan, mula ulo
hanggang paa?
Naramdaman mo bang
tumaas ang tubig
mula sa kalsada, patungo
sa `yong talampakan hanggang
sa gitna ng `yong mga binti?
Nayakap mo na ba ang ulan
sa kabuuan nito't
pinayagang pumaloob
sa `yong katauhan?
Kung hindi pa'y nakikiramay ako
`pagkat hindi mo pa nararanasang
tunay na mabuhay.