Tomo III, Blg. 3 Hulyo-Setyembre 2004
Tomo III, Blg. 3 Hulyo-Setyembre 2004
San
Hulyo 8, 2004 pormal na inaguraran an bag-o na Philippine National Police, Irosin
Station sa bag-o na puwesto sini sa may kaabay san Irosin Public Market sa pangunguna
ni Mayor Lil B. Gonzales, an mga empleyado san munisipyo nan miyembro san Sangguniang
Bayan san Irosin, mga maestro y maestra san Irosin Central School, Gallanosa
National High School nan mga tawo na inbolbado sa pagmantiner san katoninongan
sa bongto. Espesyal man na inimbitaran si PNP Provincial Director Jose Arne
De los Santos nan DILG Provincial Director Rodolfo Binosa.
Sayo na banal na misa sa solod san estasyon an sinelebrar ni Reberendo Padre
Pewee san Botag Parish, Bulan, Sorsogon. Sumunod man an pagbendisyon sa palibot
nan itaas san bag-o na building para iharagyo sa mga remalaso nan mga kadimalasan.
Sa pagbalyo san bag-o na edipisyo hali sa dati na puwesto sa sulod san munisipyo,
nagtutubod an kadaghanan na mas maaatinderan san mga pulis an manongod sa paz
y orden sa palibot san bongto lalo na an lowas nan sulod san Irosin Public Plaza
kon diin haragni-on an puwesto sini.
Sa surunod na tolo ka-taon, an Irosin mao an bongto na inkikilala
bilang "pinaka-malinig nan pinakaberde an kapalibutan" san "first
to third class" na mga munisipyo sa bilog na probinsiya san Sorsogon. An
bongto san Irosin mao man an nagrepresentar san probinsiya sa pangrehiyon na
pirilian sa Gawad Pangulo sa Kapaligiran kon diin mao an nakakowa san ikadowa
na puwesto hali sa ikatolo na puwesto san nakaagi na taon.
An
ebalwasyon hinimo san Agosto 4, 2004 na pinangungunahan san mga representante
hali sa Department of the Interior and Local Government, Philippine Information
Agency, Department of Agriculture, Department of Energy and Natural Resources,
Department of Tourism, Department of Health, Department of Education nan sayo
na opisyal san Non-Government Organization an Tanggol Kalikasan.
Sa napagkasarayoan, an ebalwasyon san mga programa nan proyekto san lokal na
gobyerno manongod sa mantinido na kapalibutan san bongto mao an naging basehan
san kapangganahan na mao man an makusog na inpapaotob sa bilog na probinsiya.
An mga binasehan: an bisay nan kalinigan sa poblasyon (Central Business District);
mantinido na mga pasilidad pampubliko; presensiya sin mga "environment-friendly
practices" o pagmanehar san basura nan sanitasyon; mayad na pangangataman
san kabubudlan, sustinable na pagkaon san mga tawo; eksistido na central nursery-eco
garden; nan an malinig na bongto.
An
Alay Lakad Foundation san Irosin sa pangunguna san Municipal Social Welfare
and Development kaopod an mga eskuwelahan sa pribado nan publiko, an Knight
of Columbus, mga non-government organizations, an Department of Education nan
iba pa na sector nagkaoyon na magkonduser sin pagralakaw hali sa poblasyon pakadto
sa may Sanbenon sa Barangay Monbon san Setyembre 27, 2004 batog na alas sais
an aga.
An ralakaw na may tema na "Piso Mula sa Puso, Alay sa mga Kabataan"
pinartisiparan san mga estudyante san Holy Spirit Academy san Irosin, Gallanosa
National High School, Veritas College of Irosin, an mga empleyado san Gobyerno
Lokal san Irosin, an grupo hali sa ABAKA Inc. Sangguniang Kabataan, mga Day
Care nan Health Workers, nan mga representante san national agencies sa Irosin.
Katuyohan man san nasabi na aktibidad an makatipon sin pondo para sa mga proyekto
sa Economic Development and Educational Assistance san mga kabataan lalo na
an 0ut-of-School Youth.
Kada
bulan san Hulyo, inkokomemorar an Bulan san Nutrisyon. An selebrasyon pinangunahan
san Municipal Nutrition Office sa paagi sin sayo na makolor na parada na pinartisiparan
san mga estudyante san iba-iba na Day Care Centers nan Kindergarten Schools
sa Irosin, an mga empleyado san Lokal na Gobyerno nan iba-iba na sektores na
nagkokooperar sa padagos na pagpromoter san mga programa sa nutrisyon. Pagarayonan
sin mga karosa na nagpopromoter man san tama nan balanse na pagkaon sakay an
kani-kanira musa. Sayo sa nanggana bilang primer premyo, an karosa san Holy
Trinity Community School na naoyon sa tema san selebrasyon na "Breastfeeding
Panatilihin, Dagdagan ng Wastong Pagkain".
Katakod sini na selebrasyon san bulan san nutrisyon, nagkamay-on halip-ot na
programa sa Irosin Public Auditorium kon diin espesyal na bisita si Doktora
Jazel Sabdao san Department of Education Division Office na sayo man na taga
Irosin. Sa mensahe, sinabi niya na dapat pangatamanon ta unang-una an salud
san mga kabataan. Pirmi maging malinig sa lawas nan sa palibot san balay na
mao an espeho san pamilya na may mantinido na kalinigan nan tama na nutrisyon.
Biyernes,
Agosto 13, 2004 personal na inimbitaran ni Congressman Jose G. Solis sa kaniya
balay sa Bulan, Sorsogon sira Mayor Lil Gonzales, Kagawad Paring Delmonte, Kagawad
Yolly Balaoro, MSWDO Gieh Martinez nan mga Kapitan san barangay kaopod an mga
Day Care Workers san Irosin para sa sayo na programa may relasyon sa idodonar
na mga libro para sa mga Day Care Centers sa bilog na Segundo Distrito san Sorsogon
na nag-kakantidad sin singko milyones de pesos. Espesyal man na bisita sa nasabi
na programa si DSWD Regional Director Eliseo Copian para sa pagpromoter nan
pasasalamat san dako na danon na naekstinder sa mga programa san Department
of Social Welfare and Development sa mga barangay.
The third year students of Science and Math Oriented Class
(SMOC) Research Class of the Gallanosa National High School conducted there
yearly activities at the Irosin Municipal Library on August 17, 2004 headed
by their teacher, Ms. Esmeralda H. Araña and Ms. Judy Astillero to familiarize
themselves with library resources.
A lecture cum workshop was conducted on shelving of books and how to locate
a book with or without catalog cards. A short talk on the importance and use
of the library was explained. The students actively participated in the lecture
cum workshop though they were complaining of the temperature inside the library.
Altogether they suggested and wished that an air-conditioned system be installed
so as to make the room conducive to learning. These students were so thankful
that they have a place to go for their research studies and reading purposes
and thereby extended their appreciation to the administration lead by Honorable
Mayor Lilia B. Gonzales for the extensive improvement of the Irosin Municipal
Library.
Hali
sa Las Vegas, U.S.A., onom na kahon sin mga libro an dinonar ni Mr. Felix Sabio
nan an kaniya mga pagkauropod an nag abot sa Municipal Library san Irosin san
Hulyo 20, 2004. Ini bilang pag-otob san panuga kan Mayor Lilia B. Gonzales san
maimbitaran ini sa Induction ceremony san Filipino community sa nasabi na lugar.
Dako na danon man ini sa mga residente san Irosin lalo na an mga estudyante
bilang reperensiya san kanira mga asignatura nan an mga nagpapalipas san kanira
oras sa pagbasa para sa dagdag na kaaraman.
An
mga libro nagtutukar manongod sa salud, pagnenegosyo, siyensiya, mga pocket
books nan iba pa na segurado dako an maikokuntribwer sa ato mga estudyante nan
mga kliyente di lang an mga taga Irosin, kundi pati san mga mahilig magbasa
hali sa iba na bongto.
Sa paagi sini pinapaabot nira an dako-dako na pasalamat kara Mr. Felix Sabio
nan kaniya pamilya, mga kaamigo nan katrabaho na nagdonar san kanira mga libro
nan iba pa na babasahon. Pinapapasalamatan man sira Atty. Rodolfo F. Gonzales,
Engr. Tanny Balmes, Kgd. Barog Gacias, Ex-Kagawad Teddy Apil, Dadoy Bilbes,
Francis Ubalde, Jovito Tagum, Mila Hecita, Ani Camson, John Delos Santos, Rosita
Allanza, Luningning Mercado, Merly DeOrtube, Loida Gracilla, Omar Hannmann,
Veritas College of Irosin, UP-Hin-ay students, Monbon Barangay Library nan Gabao
Barangay Library. Pinapasasalamatan man si Ms. Nelia Gancero sa electric fan
na hinatag niya para sa Kiddie Corner. Salamatonon tabi saiyo intero. Dios Mabalos!
Makaoogma pag-isipon na an saato mga kabataan lalo na an
mga estudyante, may mga intereses man sa pag-uswag san saato municipal library
na sa abot san kanira kakayahan, naghihinguha man na makadanon.
Ini na mga kabataan kompwesto san mga estudyante hali sa Holy Spirit Academy
san Irosin nan sa Gallanosa National High School. Sa kanira oro adlaw na pagbisita
sa library, inorganisar nira an Learner’s Cradle Club nan nag-ilihir san mga
opisyales na mamumuno sini. Nailihir bilang Presidente si Kris Gracilla, si
Jazmine Gapas bilang Bise Presidente, Neslie Rebares, Secretary, Kimberly Nagutom,
Treasurer, Melchor Fundano nan John Dominic Gapas bilang mga Public Information
Officers, Edgardo Fortajada nan Thea Hate bilang mga Auditors. Sa primero na
taon may-on na sira sin 36 na mga miymebro. An grupo inrerekognisar man an liderato
san gobyerno lokal dahilan san mayad man na katuyohan sini.
Sayo sa kanira mga proyekto an magkonduser sin "story telling" sa
mga bata kada Sabado nan Domingo batog na alas 3:00 an hapon. Ini aktibo man
na inpapartisiparan san mga bata. Sa paagi sini pinapaaram man sa intero na
magurang na darahon an kanira mga kabataan na may edad 4-7 anyos sa nasabi na
adlaw nan oras. Katuyohan man na magkamay-on interes an mga bata sa pag gamit
san library, maging ugali an pagbasa nan pag-adal. May mga plano man na tree
planting activities an grupo bilang partisipasyon sa pangangaataman san saato
kapalibutan.
An mga remalaso, kadimalasan nan maraot na mga pangyayari
sa buhay san sayo na tawo bigla na nabotwa sa oras na diri ta in-aasahan. Sayo
sa mga istorya, san mabalita sa Barangay San Juan na may-on sin biktima sin
dengue. Tolos-tolos na nagmonitor an Rural Health Unit san Irosin nan pinaimbistigaran
an nasabi na lugar. Positibo na naglowas sa imbistigasyon na may nabiktima san
dengue sa lugar na tolos man pinadara sa Irosin District Hospital. Looy san
Diyos diri man ini namatay.
Sayo
man sa makaborobigla, san may makagat sin ayam sa Barangay Monbon na kompirmado
na may rabies. Diri maaraman san mga kababaryo kon nano an hihimoon, pero sa
mahigos nan aktibo na paghiwag, napadara tolos an pasyente sa Sorsogon Provincial
Hospital para sa madali na obserbasyon nan pagbolong. Looy man sin Diyos, diri
nadagos an pagbawi san hodam niya na buhay.
Naging signos man, san imprebentaran san kaniya mga kaoropod na diri ngon-a
mag-uli an sayo na amyerista sa Barangay Monbon kay hubogon nan pulay-polay
na an lakaw pero diri nagbati. An mga kaparyentihan niya diri man naghohona
na maliligis ini nan mamatay sadto na gab-i sin sayo na bus na nagbi-biyadhe
hali sa Samar pakadto sa Manila.
Diri ta aram an buhay san tawo, bigla naparong sa diri ta aram na panahon. Irog
sini an mga pangyayari, bigla na naabot, kaya ihanda ta an saato sadiri sa paagi
sin pag-ayo giya sa oro-adlaw ta na lakaw, kay diri ta segurado an mga masunod
na mangyayari. Nan magpasalamat kita sa Mahal na Diyos san mga biyaya na naresibi
ta. Mag-ayo sin kapatawaran san mga pagkukulang na diri ta aram na nahimo ta
didi sa kinab-an. Domdomon ta na baga ini an makawat o holdaper na bigla na
naatake sa diri ta aram na biktima.
San
Hulyo 9, 2004 setenta y kuwatro na mga trainees an naggradwar sa LGU-TESDA training
na inkokondukta kada Sabado nan Domingo sa Bulusan National Vocational and Technical
School, Bulusan, Sorsogon. Ini an ika-opat na grupo sin mga kabataan na nag-aradal
sa Automotive Mechanic, Basic Auto Driving, Basic Computer Operation nan Building
Wiring Electrician sa solod sin onom kabulan batog san Enero 2004.
San Setyembre 4 nagbatog naman an ika-lima na batch na maatinder sa nasabi na
programa san Lokal na Gobyerno san Irosin sa danon san Technical Education and
Skills Development Authority (TESDA). Katuyuhan san nasabi na pa-training an
madagdagan an kaaraman san mga konstituwentes san Irosin nan sa mga bongto san
Sorsogon na sakop san nasabi na TESDA School lalo na an mga Out-of-School Youth
na sa niyan diri nag-eeskuwela.
Sa mga nakagradwar na, inaayo san lokal na gobyerno na ipaabot sa opisina san
Mayor o sa TESDA Coordinator/Municipal CTEC kon nano an mga kolokasyon na nasolodan
niyan o kon hain na an persona basi maaraman o madanonan sa kon nano man na
trabaho o sa pagkolokar diri lang didi sa lokal kundi pati sa iba na lugar sa
lowas san nasyon. Sayo san obheto san nasabi na programa an mahatagan trabaho
an mga OSY na porsigido makapagtrabaho sa danon san gobyerno, san TESDA nan
san mga pribado na ahensiya.
San
Hulyo 8-9, 2004 dowa kaadlaw na nag-atinder sin seminar workshop an mga empleyado
san Lokal na Gobyerno san Irosin manongod sa values formation na medyo nalilimutan
na. Sa primero na adlaw, tinukar nira Public School Division Supervisor Juan
O. Zamora nan School Principal Violeta B. Santiago kon nano an daanis na relasyon
o kaugalian san mga empleyado nan mga kaopisina para sa mga kliyente na nagtotoyo
didi. Pinaliwanag san dowa an importansiya san mayad na pakikibagay diri lang
sa mga kaoropod kundi sa mga tawo na insiserbisyohan na tigsayo o bihira man
magbisita sa mga opisina.
Sa
ikadowa na adlaw hinatagan doon ni Guest Speaker Josephine Dellosa san Civil
Service Commission an Republic Act 6713 o an manongod sa Rules of Conduct and
Ethical Behavior san sayo na nagtatrabaho sa gobyerno. Sa nasabi na akta mandato
na dapat an sayo na empleyado komitido sa kaniya pagserbisyo sa tawo. Maging
propesyonal, sinsero nan pantay an pagtrato sa mga kliyente o kaopisina. Responsable
nan dedikado na nag-aatinder san kaniya trabaho para man sa kaniya sadiri na
pag-uswag. Simple an pamumuhay nan may pagkahadok sa Diyos.
Sa mensahe, pinadomdom ni Mayor Lil B. Gonzales sa mga nag-atinder san dowa
kaadlaw na seminar na maging honesto nan responsable an mga empleyado sa kanira
mga trabaho lalo na yadto na may mga hatag-as na katungdan na bisayon o hingayadon
an diyo na mga deperensiya sa solod san sakop nira na departamento.
Onse
na mga estudyante an nag-entra sa Mayor Lil Poster Making Contest na may temang
"Malinig na Kapalibutan, Matoninong na Banwaan Nagkakasararo Pakadto sa
Kauswagan" na kinondukta san Agosto 30, 2004 sa Senior Citizen’s Building.
An mga parakorit na mga estudyante hali sa Irosin Central School, Holy Spirit
Academy san Irosin nan Gallanosa National High School. Katuyuhan san nasabi
na pakontes na magkamay-on ideya san ido-drawing na mural sa atobangan san munisipyo.
An resulta, nakowa san Holy Spirit Academy an primero na premyo na may cash
prize na P1,500, ikadowa an Gallanosa National High School na may premyo man
na P1,000. An iba na partisipantes may konsolasyon tig sanggatos pesos kada
sayo.
Sa mensahe na sinabi ni Mayor Lil B. Gonzales sa awarding na hinimo sa Mayor’s
Office, nagpapasalamat siya sa dako na partisipasyon nan kadonongan san mga
kabataan sa pagreparo san mayad na katuyuhan san gobyerno lokal manongod sa
kapalibutan. Dako man na pasasalamat an pinapaabot niya sa mga nag-enganyar
sa mga partisipantes kon nano an kahulugan san tema san kinunduser na poster
making contest.
Municipal
Information Office, Municipal Compound Irosin, Sorsogon
Nagluluwas kada tolo ka-bulan Tel./Fax No.: 557-3043 Email: irosin@geocities.com
Mga Nagkontribwer: Erlano Gacias, Beni
Pantua, Rose Portillo, Rachel Panti, Pamela Madrid, Ari Grajo
Online na Edisyon: Noel Mercado II
Back Issues:
Back to top