Tomo III, Blg. 4 Oktubre-Disyembre 2004

MGA SULOD:

KONPERENSIYA SA EKOLOHIYA INATINDERAN

San Nobyembre 9-12, 2004 inatinderan nira Mayor Lil B. Gonzales nan Environment Management Specialist Noel Mercado an konperensiya manongod sa pangkabilugan na pagkonserbar san kabubodlan. Ini na konperensiya kinunduser sa Subic Bay Freeport Zone, Zambales sa pangunguna san Department of Environment and Natural Resources, an Department of the Interior and Local Government, an Haribon Foundation nan Birdlife International. May dos siyentos na mga partisipantes hali sa mga probinsiya nan munisipyo na nakapalibot sa Important Biodiversity Areas (IBA’s) o an mga lugar na may mga preserbado pa na kabubodlan an nag-atinder.
Sa primero na sesyon, tinukar ni DENR Secretary Michael Defensor an presente na estado san kabubodlan sa bilog na nasyon. Diniskuter niya an kapasidad nan kakayahan san kada lokal na gobyerno manongod sa tama na pagmanehar san kapalibutan, an mayad na partisipasyon san komunidad, an pagprotehir nan pangturismo na katuyuhan, an pangkabuhayan na danon sa mga nag-iistar harani didi, nan an paghatag asistensiya nan tama na pondo. Pira sa mga nagpaliwanag manongod sa tema san nasabi na konperensiya mao an mga siyentipiko san Haribon Foundation, an mga opisyales san DENR nan DILG, nan an mga representantes hali sa mga ahensiya pangpinansiyal.
Katuyuhan man san nasabi na konperensiya an makatipon mga ideya hali sa iba-iba na munisipyo may relasyon sa tama na pagmanehar san kabubodlan nan malinawan an mga trabaho na diniligar san DENR sa lokal na gobyerno (devolved functions). Sa urhi, linibot san mga partisipantes an magayon na lugar sa Zambales para imodon an tama na pagmanehar san ati, watershed nan eco-tourism. Paghali sa Subic Bay, Zambales, nagderetso si Mayor Lil B. Gozales sa Bangkok, Thailand kaopod an iba na mga hepe ehikutibo sa nasyon para man imodon o kaya irogon an magayon na sistema na inpapaotob sa nasabi na lugar may relasyon sa mga programa

Back to top

Dental Chair sa RHU, bag-o na

Awat na na panahon na inmamaw-ot ni Dr. Noel Tan, an dentista na nakadestino sa Rural Health Unit san Irosin na matukalan sin bag-o na dental chair an lomaonon na na ingagamit didi. Sa danon ni Mayor Lil B. Gonzales nan sa mahigoson na pagsolisitod san dentista, nareyalisar ini nan nai-deliver san Disyembre 23, 2004 na may kantidad na P150 mil kaopod an mga aksesorya nan bayad sa paghakot sini. Sa paagi sini na bag-o na dental chair na ingagamit na niyan, mas daghan pa an maserbisyohan san Municipal Health Office diri lang sa salod san ato mga konstituwentes kundi pati an mayad nan malinig na pangangataman san ato mga ngipon. Sa oro-adlaw na may nagpapakonsulta sa Health Center, may-on sin sobra 20 personas an nagpapagabot ngipon kaya napapanahon na may-on kita sin bag-o nan moderno na dental chair.

Back to top

Mga nanggarana sa Gawad Punong Bayan sa Kapaligiran 2004

Batog na Nobyembre 4, 2004 linibot san mga evaluators, base sa naka-schedule, an mga barangay sa bilog na bongto sa taon-taon na Gawad Punong Bayan sa Kapaligiran, an dati na Inter-Barangay Environment Development Contest (IBEDC). Ini an lokal na bersyon san Gawad Pangulo sa Kapaligiran na inpopromoter san Opisina san Presidente san Pilipinas kadanon an an mga ahensiya san DENR, DepEd, DOH, DOT, DSWD, DILG nan sayo na Non-Government Organization.
Base sa naaprobahan san mga miyembro san komitiba na pinapamunuan ni Kagawad Paring Delmonte, an Chairperson san Committee on Barangay Affairs and Beautification nan Kagawad Yolly Balaoro, totongaon sa dowa na kategorya an mga barangay, an Category “A” o an mga daragko na barangay, nan Category “B” o saragday na barangay. Dako na hahatagan puntos an mga barangay na may Material Recovery Facility (MRF), may Gabay sa Mamamayan Action Center (GMAC) na may logo nan pigeon hole, functional barangay nurseries nan community garden, herbal o medicinal garden, may mantinido, malinig nan ataman na kapalibutan kon diin mao ini an pinaka-katuyuhan san pakontes. Sayo pa sa naimod na pinaka-importantihon nan na-obserbaran batog san ilunsar ini na Gawad Punong Bayan sa Kapaligiran, mao an proper record keeping and documentation.
An mga nanggarana, sa Category “A” o an daragko na barangay, primer premyo an Barangay Carriedo na may score na 96.56%, ikadowa an Barangay Monbon (91.34%) nan ikatolo an Barangay San Pedro (89.96%). Sa Category “B” o an saragday na barangay, nanguna man an Barangay Casini na may score na 94%, ikadowa an Barangay Bolos (90.30%), ikatolo an Barangay Tongdol (89.86%). May-on man special awards para sa mga elementarya nan high school na aktibo man na nagpartisipar.Pinangganahan ini san Salvacion Elementary School nan Gallanosa National High School. Ini may cash prize na tig-tres mil pesos nan tropeyo.. An Barangay Casini nakowa man an premyo bilang Best Barangay in Community Participation, nan an Barangay Sto. Domingo bilang Best Barangay with Community Garden.
Sa mga premyo, sa Categiry “A” nakaresibi an Barangay Carriedo sin kinse mil pesos plus trophy bilang primer premyo, an Barangay Monbon – dose mil pesos nan tropeyo, nan an Barangay San Pedro – diyes mil pesos plus trophy. Sa Category “B” may-on man kinse mil pesos nan tropeyo an Barangay Casini bilang primer premyo, dagdag pa an dos mil pesos bilang Best in Community Participation. An Barangay Bolos bilang ikadowa, nakaresibi dose mil pesos plus trophy nan an Barangay Tongdol, diyes mil pesos plus trophy.

Back to top

National Forum sa Cebu inatinderan

An National Forum on Local Government Technical Exchange and Cooperation inatinderan nira Mayor Lil B. Gonzales nan Sangguniang Bayan Secretary Ms. Adona Esparrago san Oktubre 26-28, 2004 sa Waterfront Hotel, Lahug, Cebu City. An nasabi na forum kinudokta para maaraman an mga oportunidad para sa pag-uswag diri lang sa lado sin panglokal na ekonomiya, sosyo-sibiko, turismo, salud, nan inpormasyon teknikal kundi pati sa pang-internasyonal na kooperasyon sa paagi sin paghiras mga rekursos, kaaraman nan mga ideya.
An aktibidad inatinderan man sin mga prominente na tawo sa lokal nan nasyonal na sektor pareho nira Gobernador Robert Lydon Barbers san Surigao Del Norte nan PHISTA President nan DILG Secretary Angelo Reyes na nagkomiter na pakusogon an Local Government Technical Exchange and Cooperation Program. Dahilan man sadi na apirmasyon nan importansiya sa lado san lokal na gobyerno, inrekomenda ni Mayor Lil B. Gonzales sa mga kagawad san Sangguniang Bayan na tolos aksyonan nan himoon an tama na manera para didi.
Sa niyan, an Lokal na Gobyerno san Irosin miyembro na san Philippine International Sisterhood and Training Association (PHISTA) Incorporated kon diin inhuhulat na lang an konpirmasyon san posible na pakikipagmanghodan (sisterhood) sa iba na mga bongto didi sa Pilipinas nan sa iba na nasyon na may pareho na intereses sin pag-uswag.

Back to top

Pamaskong Gamutan ni Mayor Lil

San Disyembre 21, 2004 kinundokta an taon-taon na Free Medical and Dental Mission sa pangunguna nira Dr. Archie Tan M.D., Dr. Ludovic Tan M.D. san Irosin District Hospital, an mga dentista sa pamumuno man ni Dr. Noel Tan, Dra. Dainty Añonuevo Antig nan Dra. Bing Garcia. Ini na Pamaskong Gamutan sayo sa mga proyekto ni Mayor Lil para mahatagan libre na konsultasyon nan mga bolong an kawaraon ta na mga kons-tituwentes sa bilog na bongto. Apuwera san mga bolong na hinatag sa mga may hapdos, daghanon man an nagpagabot ngipon na libre man na sinerbisyohan san mga dentista na kadaghanan taga didi man sa Irosin.

Back to top

Programa sa filaria, padagos

Batog san Setyembre hanggan sa bulan na Oktubre 2004 padagos na inbobolong an mga may hapdos na filariasis. Ini na social mobilization na inhihimo san Municipal Health personnel sa bilog na bongto san Irosin may katuyuhan na ipasabot sa mga tawo kon pan-o ini malilikayan nan kon nano sini an mga sintomas. An bilog na bulan san Nobyembre mao man an paghatag mga bolong sa mga tawo na may edad dowa kataon paitaas. May mga tabletas sin bolong na inhahatag an mga personahe san munisipyo kadanon an Barangay Health Workers na mao an nakaaram san mga pasyente o kliyente sini. Sa opat kataon na padagos na pagkondukta san programa, maw-ot san Gobyerno Lokal san Irosin sa pamumuno ni Mayor Lil nan an Sangguniang Bayan na makontrol o kaya mailiminar na an hapdos na ini didi sa bongto.

Back to top

Nutri-mix nilunsar sa Irosin

San Nobyembre 9, 2004, nilunsar an Nutri-mix program sa bongto san Irosin sa pangunguna ni OIC-MNAO Rose Portillo sa danon san Provincial Health Office, Provincial Nutrition Office nan Department of Agriculture. Binatogan ini sin sayo na banal na misa sa pangunguna ni Rev. Padre Jimmy Barrozo.
An Nutri-Mix hali sa mga programa san Nutrition Center of the Philippines nan Department of Agriculture. Ini kompuwesto sin mga ingredyente na mongo, bogas, isda, gatas nan lana na inhahatag sa mga bata na may edad na onom hanggan 71 meses na nabibilang didto sa mga kabataan na severe o third degree malnourished sa onom na mga barangay san bongto. An grupo san mga Nutritionist-Dietitians na nag-atinder sa nasabi na programa hali sa Provincial Office kinabibilangan nira Mrs. Ofelia Lopez, Mrs. Grace Jardin, Ms. Evangeline Bañares san Office of the Provincial Agriculturist nan Dra. Ludivina Dorion. Presente man sa nasabi na okasyon sira Ms. Celina Cal-Ortiz san Irosin Central School, Mrs. Gloria Bañares san Gahika na aktibo man na nagsusuporta san mga programa sa nutrisyon. Laom san Gobyerno Lokal san Irosin na maibanan o kon diri man mahali na an malnutisyon sa bongto.
Katakod sini na programa sa nutrisyon, padagos man an supplemental feeding sa mga barangay sa danon san mga opisyales nan Barangay Nutrition Scholars, mga maestra sa eskuwelahan nan pribado na mga tawo na naghahatag libre na pagkaon sa mga bata sa koordinasyon san opisina san Municipal Nutrition Office. Pira sa mga ini sira Ms. Celina Cal-Ortiz, an Galindez Sisters, si Mrs. Luz Cielo, Fe Dreu nan Mrs. Lustre kon diin bolahos na inhihiras an kanira naresibi na grasya sa mga bata. Mao man ini an mga kadagdagan na puntos san padagos na pagresibi san bongto san Irosin sin Maintenance Awards kon diin hinatag an onra san Nobyembre 23, 2004 sa Albay Capitol. An awards rinesibi nira Mayor Lil Gonzales kaopod sira Kagawad Paring Delmonte, Kagawad Yolly Balaoro, Gieh Martinez san MSWD, nan Kapitan Awel Fortes san Barangay Monbon.

Back to top

Ika-108 na anibersaryo ni Rizal kinomemorar

San Disyembre 30, 2004 kinomemorar sa bongto san Irosin an ika-108 na anibersaryo san pagkamatay ni Dr. Jose P. Rizal sa Luneta sa paagi sin pag-alay mga burak sa monumento sini sa solod san munisipyo. An okasyon pinamahalaan san Departamento sa Edukasyon sa pamumuno ni Public School District Supervisor Juan O. Zamora, Irosin Central School Principal Ms. Violeta B. Santiago, an mga miyembro san Philippine National Police sa Irosin Station, nan an mga empleyado san Lokal na Gobyerno sa pangunguna nira Kagawad Yolly Balaoro nan Kagawad Paring Delmonte. An Gabao Elementary School Principal Mr. George Fuentes mao an Guest Speaker na nagpadomdom san mga kabayanihan ni Dr. Rizal. Nagkamay-on man sin halip-ot na programa sa Irosin Public Auditorium na pinartisiparan san mga maestro y maestra sa bilog na bongto nan san mga pili na mga estudyante sa elementarya na naghatag espesyal na numero sa entablado.
Sa pagkomemorar, sinabi ni Mr. Fuentes na diri ta paglimutan an mga hinimo ni Dr. Rizal na kabayanihan sa paagi sin silensiyo nan diri madugo na rebolusyon. Kabayanihan na nag-abot sa pagtaya niya san sadiri na buhay para sa demokrasya nan kaligtasan san mga Pilipino sa kamot san tagapagsakop na mga Kastila.

Back to top

Mga miyembro san BAC inreorganisa

Oktubre 2003 o sobra sa sangtaon an nakalipas san binilog an mga miyembro san Bids and Awards Committee sa munisipyo san Irosin na mao an nagmamanehar nan mapalakaw san mga pagbakal mga gamit sa opisina san gobyerno lokal. Ini an dati na Pre-Bids and Awards Committee (PBAC). Niyan na Enero 5, 2005, irere-organisa an bag-o na mga miyembro sini sa rason na tapos na an sangtaon nira na torno. Sayo pa, tutukalan an mahali na dati na Municipal Treasurer Mike Tan sa pagbalyo sini sa munisipyo san Barcelona. An mga bag-o na miyembro mao sira Engr. Ben Gabionza - Chairperson, Felix Ortile - Vice Chairperson, Rosemarie Sayson, Bicbic Tubianosa, nan si Edwin Garcia, bilang mga miyembro. An Technical Working Group kompuwesto nira Rachel Panti nan Ningning Lustestica.
Pira sa mga obheto san pag-reorganisa san mga miyembro san Bids and Awards Committee mao an magkamay-on "transparency" sa proseso san pagbakal nan pag-implementar san mga kontrata sa gobyerno; magkamay-on oportunidad an intero na gusto magpartisipar sa "bidding"; himoon an simple na paagi sin pagbakal susog sa moderno na teknolohiya o an Government Electronic Procurement System (G-EPS); nan magkamay-on estrikto nan tama na proseso base sa mga regulasyon na inpapaotob san Department of Budget and Management.
Sa kabilogan, an pagbakal san mga gamit sa opisina, an pangserbisyo na kaipuhan, nan an mga proyekto pang infra-istruktura na intitindog dapat maagi sa "public bidding". Pero may mga alternatibo o "exemption" man na inpapaotob kon kinakaipohan basta diri mabalga sa mga leyes na insusunod.

Back to top

Mga orig sa LGU pinaataman

San bulan na Nobyembre nan Disyembre 2004 nagpaataman sin 29 na mga ido sin orig (piglets) an Gobyerno Lokal san Irosin sa pangunguna ni Mayor Lil nan an mga miyembro san Sanggunang Bayan. Diyes y nuebe (19) na mga babaye na orig an libre pinaataman nan an napolo na lalaki pinabayadan sin un mil dos cientos (1,200) pesos kada sayo. An mga ido san orig hali sa tolo na pakal na inataman sa Patag Dumpsite kon haen sayo ini sa mga proyekto na inlunsar, an Livestock nan Poultry.
Madodomdoman na nagbatog an proyekto sin pag-ataman orig san Setyembre 11, 2003 kon diin nagbakal an munisipyo sin opat na pakalon nan paidoon na orig sa kantidad na un mil siyete pesos kada sayo. Pira kabulan an nakalipas, nagborod an tolo na pakal nan nag-ido. An sayo, dahilan sa medyo maloya an lawas, kinarne nan pinabakal para mabawi an gastos sa pagpakaon. Sa mga ido san tolo na pakal, mao yadto na mga pinaataman sa mga tawo sa paagi san mga opisyales san bongto nan tolo man na pribado na tawo. Sa niyan, may-on na lang dowa na inpapaido kay an sayo na pakal kinarne nan pinabakal san kapaskohan. Naglalaom an gobyerno lokal na madaghan an mahahatagan atamanon na orig pag nag-ido naman an kanira pinaataman sa mga kahimanwa na may katogonan na pagnakapaido, ihatag man sa iba an mga ini para domaghan an mga may ataman na orig.

Back to top

EDITORYAL: An Balos san Kapalibutan

AWAT NA NA PANAHON NA INPAPATANID SA MGA TAWO, DIRI LANG SA BARYO, KUNDI SA BILOG NA NASYON, NA MANTINERON AN SAATO KABUBODLAN, ATAMANON AN MGA KAKAHUYAN, NAN DIRI PAG-ABUSOHON AN KAPALIBUTAN. PERO NANO AN HINIMO SAN TAWO, BINALGA AN MGA LEYES NA NAGPAPANDONG DIDI.
PERO BAG-O KITA MAGHUSGA, ARAMON TA NGON-A AN MGA PANGANGAIPO SAN TAWO NA MAO AN PIRMI RASON O NAGIGING BASEHAN SAN KANIRA MGA PAGBALGA. PRIMERO, AN MGA REKURSOS SA KABUBODLAN PARA SA KANIRA ORO ADLAW NA PAG-BUHAY. SABI SAN SAYO NA TAGABARYO, NAGKAMAY-ON SIYA SIN TRABAHO DAHIL SAN MGA KAHOY SA BOLOD. PERO DIRI NIYA INISIP NA TUKALAN BAG-O NA TANOM AN MGA NAOTOD NA PUNO. WARA SIYA LABOT SA MAABOT NA PANAHON. APUWERA SAN MGA KAHOY, MAY MGA PAGKAON MAN NA NAKOKOWA DIDI PAREHO SAN MGA PRUTAS O BUNGA SAN KAHOY, MGA TAYOD SAN TINANOM PAREHO SAN GAWAY, KAMOTE NAN IBA PA. AN MGA KARNE SAN USA, BABOY SA KADLAGAN, MGA ILAHAS, AMID, TINGGARONG, NAN IBA PA. IKADOWA, HAPOTON TA KON NAKADANON INI NA KABUBODLAN SA KADAGHANAN? KON SASAYO-SAYOON TA AN MGA DANON, KULANG INI NA ISPASYO TA PERO, MAO INI AN PIRA SA MGA KAHAPOTAN NAN KASIMBAGAN NA KAIPUHAN TA HATAGAN KAPALIWANAGAN.
SA SAYO NA LADO, ARAMON TA MAN AN DOWA NA KLASE SIN TAWO NA INBOLBADO SA PAGKAAROT SAN MGA KABU-BODLAN. AN POBRE, NA MAO AN PIRMI SA BOLOD; NAN AN MAYAMAN, AN KAPITALISTA NA PIRMI MAN SA SIYUDAD. AWAT AN KANIRA PAG-OPODAN. DAGHANON NA GRASYA SIN KAYAMANAN AN KANIRA PINAGHIRASAN. PAGKATAPOS SAN MGA KADIANISAN, SAN LAMPAS SA LANGIT NA KAOGMAHAN NA MINSAN LIMOT AN MGA PROBLEMA SA BUHAY, AN BALOS SAN KAPALIBUTAN.
AN PAGBAHA. AN PAGTIRIS SAN MGA BOLOD. AN DILUBYO, AN PAGBASOL.

LGU Tok n Teks

Back to top

E-MAIL MESSAGES

From: teckle210@cogeco.ca  
Subject: Mabuhay an Irosin ! Date: 10 Nov 2004

I’m happy that we already have a website address.  I always feel that I’m home every time I open this website, good job folks.  We are now in high tech. I hope we will grow BIG and more improve compared to other places nearby.  I feel guilty that I’m far away from home and I don’t have any contribution, but Irosinians here in Ontario are planning to do something, we will let you know what it is.  Once again, CONGRATULATIONS! KEEP UP THE GOOD WORK!  
Tere  Encinares

From: albertah8000@msn.com
Subject: an appreciation... Date: 28 Nov 2004

greetings of peace! I was astonished to see the big improvements that Irosin had made in such a very short period of time. I think that everybody is doing a great job participating to get the tasks done successfully. Anyway, last month... I had a writing assignment, it could be a report, advertisement, biography etc. I then decided to do a report about Irosin suggested by my uncle Obet Castillo who had been keeping us informed on what’s going on in our amazing town...  and my pictures resource was gathered from this site.... my teachers and classmates was sooo astounded... I made them want to visit Irosin. my teacher gave me a perfect grade for my report and that is why I’m here people, to thank all of you... coz I know I couldn’t done it without u  my fellow Irosinians! god bless to all and more power!!!! w/ so much love,
   Aizza ( California, USA based)
albertah45@yahoo.com for any comments

From: Windisch.B@gmx.at Date: 30 Nov 2004

Hello! Nakita ko iyong homepage ninyo sa Irosin, laking tuwa ko lang ang ganda-ganda naman na homesick tuloy ako kung sino man ang gumawa nito T.Y. very much. Taga Irosin din ako.regards nalang diyan lahat sa taga Irosin the most to San Diego’ Family. kung ma receive or mabasa mo ito pls. answer back…Thanx in advance
Regards to Mayora and Tia Choling Gapas.
Nenith

Subject: Simbag Date: 30 Nov 2004

Hi! nabasa ko an e-mail mo salamat naman kay sinimbag mo. Nenith San Diego an ngaran ko taga San Juan kami basi kun kilala mo si Leo or si Reius kamanghod ko sira kun dire base si Fe an kakilala mo? paki paabot nalang sin pagkumusta ko doon sa kanira intero doon.Yadi palan ako sa Austria midyo taod-taod naman ako didi. Kumusta palan doon sa ato kay san last week may bagyo na naman nano na apektohan man an Irosin? kay didi sa news sa amo daghanon kuno an namatay! Sana naman dire masyado na abot an ato bungto. kumusta na lang sa pamilya ko doon nan sa imo man. t.y.
nenith

Back to top

May mga katarata pinaopera

An katarata sayo san mga hapdos sa Pilipinas na kawsa sin pagkabota sin sayo na tawo. Sa probinsiya san Sorsogon, may kinyentos na an nabobota san nakaagi na taon na kawsa sini na hapdos sa mata. Sayo man ini san dako na problema na nakaapekto san pagiging produktibo sin sayo na tawo nan pagiging progresibo man san sayo na komunidad.
Sa paghinguha san Lokal na Gobyerno san Irosin, an Rural Health Unit nan mga personahe sa pangunguna ni Dr. Archie Tan, nan an Sorsogon Integrated Health Services Foundation (SIHSFI) Inc., sayo na non-government organization didi sa bongto, nadanonan an mga kawaraon ta na kahimanwa na maprebentaran an kanira pagkabota sa pag-adaptar san Community Based Rehabilitation Program kon diin in-edukar, pina-training nan tinukduan sin tama na kaaraman sa pag-antabay man san kanira mga magurang, karamanghodan o mga kaoropod sa pamalay. Sinuportahan man ini sa paagi sin libre na transportasyon, "referrals" nan paggiya sa mga hospital sa probinsiya san Sorsogon nan Albay.
Sa pagdaranon man san mga nasabi na ahensiya, may-on na sin 58 na mga may katarata na taga-Irosin an napadara nan napaoperahan sa tolo na mga hospital hanggan san nakaagi na taon 2004, kon diin 17 na mga pasyente an pinaoperahan sa Sorsogon Medical Mission Group Hospital, Sorsogon Provincial Hospital nan Aquinas University Hospital, pira sa mga ka-partner na hospital na nagpromisa man na madanon sa pag-iliminar san nasabi na hapdos sa mata.

Back to top

Pamaskong Handog sa mga dukha

San Disyembre 29, 2004 kinunduser sa VCI campus an paghatag mga pagkaon nan mga groserya sa mga kaoropod na pobre didi sa Irosin. Ini pinangunahan nira Kagawad Yolly Balaoro, Kagawad Paring Delmonte san Lokal na Gobyerno san Irosin, an Knight of Columbus, nan an Parokya san San Miguel Arkanghel sa pamumuno ni Rev. Padre Jimmy Barrozo nan Helen Balderama, an Chairperson san Service Committee san Irosin Parish Pastoral Council. May 372 na resipyente sa bilog na 28 na mga barangay an maogmang nagpasalamat sa mga hinatag na grasya. Maw-ot man san grupo na inbolbado sa Pamaskong Handog na makahatag pa sin daghan na epektos diri lang sa mga taga Irosin kundi sa intero na nangaipo sa probinsiya san Sorsogon.

Back to top

Konsultasyon sa pag-quarry kinunduser

San Disyembre 14, 2004 nagtiripon an mga parahakot sin baybay nan graba sa Barangay Hall sa Barangay San Pedro, Irosin manongod sa padagos na pagkaykay sin baybay nan graba sa Cadac-an River sa may irarom san tulay. Ini kinunduser sa pagpagahoy san mga opisyales san Provincial Environment and Natural Resources Office (PENRO), kaupod an taga Lokal na Gobyerno san Irosin na si EMS Noel Mercado nan si Engineer Buenaventura Dayao san Mines and Geosciences-DENR.
Didi ineksplikar an manongod sa R.A. 7942 o an Philippine Mining Act of 1995 kon diin nakasolod sa nasabi na akta na inbabawal an pagkowa o pagkaykay baybay nan graba un kilometro hali sa may isturktura pareho san tulay. Pinaliwanag man san mga representantes na kon gusto nira maging legal an kanira trabaho, dapat may-on permiso hali sa opisina san gobernador o kon sin-o man na ahensiya na inbuwelto didi sa rason na nakataya man didi an kanira pagbuhay. Siyempre pa, kaipuhan man na sunodon an mga leyes na inpapaotob may relasyon didi.
Suhestiyon pa ni Engr. Dayao na magbilog sin sayo na organisasyon an saragday na parahakot baybay para sa masayon nan barato na pagkowa permit para sa nasabi na quarrying.

Back to top

Children’s Festival maogmang sinilebrar

San Oktubre 22, 2004 maogmahon na sinilebrar an Children’s Festival sa San Benon, Barangay Monbon, Irosin sa paagi sin sayo na programa sa sayaw, pagkanta, pagtula nan drama. Sa nasabi na selebrasyon hinimo man an "Draw and Tell Contest" kon diin nahasa an mga kabataan sa pag-drawing na may tema na "Bright Child Bunga ng Mapagkalingang Pamilya". In-eksplikar man sa mga audience an basehan o kriterya na mao an creativity (20%), content (40%), originality (20%) nan good presentation. Sa resulta, nanguna an Hacienda Monbon (92%), ika-duwa an San Julian (89%) nan Cawayan (86%). Hinatagan mga groceries an nanggarana bilang premyo. An mga hurado kinabibilangan nira Ari Grajo, an Information Officer san bongto, Ramil Astillero nan Pamela Madrid san MSWDO. Maw-ot man san nasabi na silebrasyon na mapukaw an kaisipan san mga kabataan manongod sa mayad na pangangataman nan disiplina sa solod san pamilya nan sa komunidad.

Back to top

PAISI SA GABOS

Ipinapaaram tabi sa gabos na poon sa Enero 1, 2005 hanggang sa Deciembre 31,2005 magkakaigwa kita nin

TAX AMNESTY
AMNESTIYA SA AMELYARADO

(Provincial Ordinance No. 03-04: Sorsogon Real Property
Tax Amnesty Program of 2005)

Magbayad po kita kan satuyang buwis sa daga (amelyarado) na daing penalidad, interes, o surcharge sa minasunod na iskedyul:

1. First and Second Quarter: 100%
2. Third Quarter: 50%
3. Fourth Quarter: 25%

Makipaghilingan lang tabi sa saindong tesorero probinsiyal o tesorero municipal para sa iba pang detalye.

Salamat po.

Hon. RAUL R. LEE-Gobernador

Hon. ANTONIO H. ESCUDERO, JR.-Bise-Gobernador

MABUHAY KA, IROSIN!

Municipal Information Office, Municipal Compound Irosin, Sorsogon
Nagluluwas kada tolo ka-bulan Tel./Fax No.: 557-3043 Email: irosin@geocities.com

Mga Nagkontribwer: Pamela Madrid, Felix Ortile, Bing Camposano, Rose Portillo, Tansing Fundano, Rachel Panti, Noel Mercado, Adona Esparrago, Jojit Cantonjos, Kgd. Yolly Balaoro, Ari Grajo

Back Issues:

Enero-Marso

Abril-Hunyo

Hulyo-Setyembre