HISTORYA NIN BANUAAN

"The History of the Town of Irosin"

 By
Sabiniano Gacias and Elias Cuadro

 

CAPITULO VI

An magna Enot na Capitanes asin Presidentes can Irosin : 1887-1897

 

53 – Don Ramon Galindes, na siring man sana,

ochenta y siete, ochenta y ocho, Capitan na sadya;

pinagtatacutan nin tauong gabos na,

huli ta maignat can catondan nia.

 

54 – Sominonod caini, Cleto Galarosa,

ochenta y nueve, noventa, an torno saiya;

daing caawayan, malinig magdara,

can administracion nin saiyang banua.

 

55 – Don Rosendo Gabionza, sominonod naman,

noventa y uno, y noventa y dos, sia an Capitan;

sarong caballero na guinagalangan,

can saiyang donong, minsan anong bagay.

 

56 – Ta marhay magdara, capot na timbagnan,

huli ta maboot sa daing casalan;

con iguang maguibo nin magna caratan,

mabagnison sia sa pagejecutar.

 

57 – Sominonod saiya, Don Sabas camara,

noventa y tres, noventa y cuatro, pag-governar nia;

magna ca-Inchican, sinasaquit sinda,

anti-extranjero an ogale nia.

 

58 – Capitan na ini, day nacatapos,

sarong taon sana, govierno natapos;

dahel ta may fleyto, tuyong isinotsot,

Inchic na mayaman, “Que-Pangco” an apod.

 

59 – Hinale saiya an pag-Capitan,

asin ta nagbogtac, sarong accidental;

Agustin Arellano, na Vice-Capitan,

iyo an nagtapos, saiyang catongdan.

 

60 – Can ini matapos, sonod na sorteo,

iyong nagcapalad, Luciano Gabito;

noventa y cinco, noventa y seis, y noventa y ocho,

Iyo nang pag-abot, Revolucionario.

 

CAPITULO VII

An Panahon nin Revolucion asin Commonwealth

 

61 – Natapos an turno nin magna Capitan

dahel can macosog na pag-iriwal;

Filipino, Castila asin tinabagnan,

nin Americano,iyong pagtiwasay.

 

62 – Dagnan can omabot, taon mil nueve cientos,

an magna govierno, nareformar gabos;

Presidente-Vice, iyong nagcacapot,

patin Consejales, lambang municipios.

 

63 – An gabos na bagay na gustong gubohon,

gabos pinaagui, por medio de session;

tolos linalagda, sarong resolucion,

o ordenanza man na pag-ootoban.

 

CAPITULO VIII

An magna Governadorcillos, Alcaldes, asin Presidentes can Panahon nin Commonwealth : 1901-1945

 

A.     1901-1933: An magna Partido Political

 

64 – Presidenteng enot si Don Pedro Fruto,

enot na Capitan caining municipio;

sarong taon sana, saiyang servicio,

asin ta nabotas, nueve-cientos uno.

 

65 – Nueve-cientos uno y nueve-cientos dos, na siring man sana,

Presidente Municipal, Ciriaco Galeza;

iba an pagboot, ta iguang reforma,

Democratang tunay an pinagdadara.

 

66 – Feliciano Ejercito, sominonod naman,

nueve-cientos tres y nueve-cientos cuatro, iyong nagnataman;

general-eleccion, day pa caiyan,

principales pudientes, pinagbobotohan.

 

67 – Natapos an turno caining Presidente,

Anastacio Rentoria, iyong nagcasuerte;

nueve-cientos-cinco y nueve-cientos-seis, saiyang pagsirve,

day nin abuso, mapadapit caini.

 

68 – Dagnan sominonod, Ruperto Ubalde,

iyong nabotohan,como Presidente;

igua nin maraot sa turno na ini,

may colera morbo can taon na ini.

 

69 – An magna masonod, igua nin eleccion,

pinagborotohan nin magna elector;

an dacol na boto an paloluason,

iguang Diputado asin Governador.

 

70 – An Governador, iguang tercer vocal,

Presidente Concejales, con sa municipal;

con an magcapalad na maca-triumfar,

sarong autoridad na iguinagalang.

 

71 – Can matiwasay na, day nang colera,

sominonod naman, Rosendo Gabionza;

toninong an gabos na sagcod sa banua,

ta marhay magdara can autonomia.

 

72 – Dagnan sominonod, Victorio Gratela,

Justino Bonofe, soronod-sonod na;

Zacarias Conspecto na siring man san,

Feliciano Fruto, nagsirve sa banua.

 

73 – Nicasio Navarro, sominonod naman,

siang Presidente caining banuaan;

si magna servicios daing canawayan,

nasatisfaceran ninda an banuaan.

 

74 – An gabos na ini na sacong sinambit,

Nacionalistang Partido an pinagmimidbid;

sa capdanayan nin tauong mahigpit,

Rosendo Gabionza, sinda nagnagnapit.

 

75 – An poder caini, ay inexpugnable,

nagcapirang taon, day napepierde;

icatocdo sana, iyong nangyayari,

day nin defensa, magana na pirme.

 

76 – Alagad ta igua nin caso natural,

minsan anong poder, day magdadanay;

gnapit o noodma, ini masasayang,

gnaran decadencia an masasagcoran.

 

77 – Ominabot an tiempo, dagnan na nabuhay,

Partido Tercerista, iyo an catumang;

diit na panahon, liniuat an gnaran,

iyong Democrata, ogma daing siring.

 

78 – Con siring an poder sa banuang Irosin,

day natimbagnan can pagcapaquiling;

mil-nuevecientos-veinte-uno, iyong nasa poder,

bando Democrata, ogma daing siring.

 

79 – Sa taon na ini, taon veinte-uno,

Eugenio Sayson, iyong nagtriumfo;

maraot na palad, cainihong tauo,

huling nacagadan nin capua tauo.

 

80 – Cipriano Franes, iyo an nagadan,

si Sebastian Franes na saiyang tugang;

sa camot an tama, baco man na mortal,

iyong nacaligtas, buhay sagcod gnonian.

 

81 – An nanidahelan, si pagbororatan,

huling nag-ogma, ta nacatriumfar;

si revolver nia pinagpoprobaran,

con pira catauo saiyang magagadan.

 

82 – Vice-Presidente, iyo an may cargo,

daing iba cundi si Juan Frivaldo;

nagre-eleccion pa, nagcamit triumfo,

huli can mabansay na paggo-govierno.

 

B.    1933 : An Diluvio

 

83 – Sa laog caini na saiyang turno,

taon treinta y tres, igua nin pelegro;

salog nagdacula, garo na deluvio,

dacol an nagadan, an iba salvado.

 

84 – Punto parentesis, sacong ibabalic,

na enot caini, si Martin Aviles;

taon veinte-ocho, iyo an nagcamit,

eleccion-general, gnaning nacalihis.

 

85 – Noche-buenang bangui, na may alas ocho,

si oran macusog asin ta continuo;

si gabos na tauo, anan na tranquilo,

ining Presidente, si Juan Frivaldo.

 

86 – Na nagdadalagan,cusog an curahao,

“Pamagmata camo, gnaning macalicay;”

day nia binale si cusog nin oran,

macalicay lamang, tauo sa banuaan.

 

87 – Iguang magna harong na pinag-aanod,

igua pa nin ilao, may tauo sa laog;

iguang nacasalvar, an iba naubos,

an nanidahelan, sa tubig nalamos.

 

C.    1934-1945

 

88 – Eleccion na naman can treinta y cuatro,

sagcod sa cuarenta, siring man na gayo;

Felipe Santiago, iyong nagcapremio,

ualong taon na posog sa paggo-govierno.

 

89 – Mil-nueve-cientos cuarenta, ultimong eleccion,

iyo nang pag-abot can soldadong Japon;

Victoriano Gamis, iyong naguin poon,

sa pagdolag sana, sagcod magna campon.

 

CAPITULO IX

An magana Cura-Paroco can Irosin: 1876-1952

 

90 – Digdi sa masonod, darahon co gnona,

sa ibang atencion, saindong pagbasa;

magna capadian, panahon enot pa,

iyo cong sasabihon na day nin tada.

 

91 – Enot na Paroco, Mariano Miranda,

Feliciano Lazaro, iyong ica-dua;

marhay na maghulit sa magna escuela,

asin matoninong magna tagabanua.

 

92 – Si Padre Casiano, iyo an ica-tolo,

De Vera an apod saiyang apellido;

iyong isinangle qui Padre Lazaro,

ta ini binogtac sa ibang destino.

 

93 – Ica-apat sa bilang, si Jose Clutario,

na pading maboot,patin cuidadoso;

sarong predicador asin ta celoso,

sa pagdesarollar, Santo Evangelio.

 

94 – Padre Antonio Josue, ica-limang bilang,

na siring man sana, daing caawayan;

pading mamomoton sa catoninognan,

an pinaghuhulit, idtong cababaan.

 

95 – Pading ica-anom, iyo daing iba,

Reverendo Padre Esteban Rivera;

como predicador, daing ica-dua,

nababantog sia na minsan sa Naga.

 

96 – Bilang ica-pito, sa banua nin paglaom,

Camilo Ubalde,curang mamomoton;

Malinis si gawe y banal-banalon,

Magna qualidades nin tauong madonong.

 

97 – Ica-ualong bilang, iyo an nahaloy,

Padre Pascual Gacosta, sarong Bulusanon;

huli ta inabot caidtong Revolucion,

preso sa Manila, nagcapirang taon.

 

98 – Na an ica-siam, padi na bendito,

honra can banuaan, digdi nadestino;

efectivamente, inabtan nin grado,

Dioceses nin Naga, sia nag-obispo.

 

99 – An inolvidable na Monseñor Reyes,

asin ta dacula an paghinanaquit;

an gabos na hulit, guiniguibong pirit,

na bastang sa marhay, an derechos gratis.

 

100 – Padre Balbino Vitero, ica-sampolong bilang,

day man nahaloy, alagad marahay;

minaoyon gabos, tauo can banuaan,

nin huli ta sia marhay magpalacao.

 

101 – Ica-sampolo may saro, Monseñor guiraray,

Antonio Bayona, saiyang pag-gnaran;

Prelado-Domestico, con sa pagcasaysay,

Asin ta halancao an capangyarihan.

 

102 – Ica-sampolo may dua, an masasabi co,

day mapapara,sa memoria nin tauo;

orgulio nin banua sa pagcatotoo,

huli can humildad, daculang merito.

 

103 – May cooperasyon sia sa banuaan,

na bastang sa marhay, cuyog-cuyog lamang;

sarong sacerdote na iguinagalang,

sa capua tauo, maignat magtaram.

 

104 – Detado nin Dios an siring na tauo,

daing iba cundi, si Eleno Prieto;

sa pagpacumbaba, sia an modelo,

minsan aquing sadang, saiyang amigo.

 

105 – Ica-treceng padi na day na gnonian,

haloy nang panahon, day matimbagnan;

daing caoyonan na caogalean,

solo sana sia na daing caratan.

 

106 – Siendo sa Irosin, sia nabubuhay,

banua despreciado, inda sana lamang;

day nin amigo na siisay pa man,

na con nagtataram, anan caognisan.

 

107 – Day nin cariño sa nasasacupan,

con marhay an payo naquiquipag-olay;

mapirang minuto, ica babayaan,

na itotocdo ca, dian sa hagyanan.

 

108 – Iyo ini an helang can banuang Irosin,

pinadarhan digdi nin padi na siring;

mamomoton sia caidtong caling-caguing,

tauong maquipirac na day nin siring.

 

109 – Iguang catanosan, ica-trece sia,

sa bilang na ini, magna pag-iriba;

sa doce Apostoles, hona-honaon ta,

an saro sainda, cargo de conciencia.

 

110 – Minsan minaabot an Fiesta Patronal,

day lamang sia, minsan anong bagay;

sa capua padi, day nainvitar,

tunay na paglicay na di magastohan.

 

111 – Can mil-nueve-cientos-cuarenta y ocho,

an bilang can taon, nag-aguing totoo;

an gnaran can padi, digdi nadestino,

mayong iba cundi, si Padre Ofrasio.

 

112 – Si Jose Ofrasio, an saiyang gnaran,

madonong, halangcao, saiyang inadalan;

sarong predicador, marhay magpalinao,

magna ceremonias, Santong Casuratan.

 

113 – Sampolo may apat an bilang na gayo,

magna capadean, digdi nadestino;

napanognod ini qui Padre Ofrasio,

pagcapadi nia sa banuang iniho.

 

114 – An pading masonod qui Padre Ofrasio,

sarong pading banal asin bendadoso;

saiyang paggnaran, Reverendo Gregorio,

Triumfante sa lucha, saiyang apellido.

 

115 – Apellido nia, may catotoohan,

nin huli ta sia, pading militar;

tropang Filipino, saiyang namotan,

Japon sominoco, na saindang caiwal.

 

116 – An quince misterio nin Santo Rosario,

iyong napanognod, saiyang numero;

ta ica-quince sia, pading nadestino,

sa banuang Irosin na maogmang gayo.

 

117 – Padre Triumfante, sa Army inapod,

halangcao na poon, ta sia maglingcod;

sa madaling horas, sia tomalicod,

ualat qui Imperial an trabajo gabos.

 

118 – Hasta sagcod gnonian, day pa mabatid,

no siisay an Cura, bilang masalihid;

magna tauo gabos, namaghinanaquit,

na si Triumfante, guiraray magbalic.